----རྩིས་དངོས་རྫས་གསུམ་བོད་ཡིག་ནས་འཁྲིད་ན་སྦྱངས་འབྲས་མི་བཟང་ཟེར་བ་རྫུན་རེད།
རྒྱལ་ཁབ་ཀྱི་ཀྲུའུ་ཞིས་ཞི་ཅིན་ཕིང་གི་རིག་གནས་སློབ་གསོ་སྐོར་གྱི་གསུང་བཤད་ལས།
“ཀྲུང་ཧྭ་སྲོལ་རྒྱུན་རིག་གནས་ནི་ང་ཚོའི་ཆེས་གཏིང་ཟབ་པའི་འཇམ་ཤུགས་ནུས་སྟོབས་ཡིན།” ཞེས་གསུངས་པའི་དགོངས་དོན་དངོས་ནི།
སྲོལ་རྒྱུན་རིག་གནས་དང་དེའི་སྟོབས་ཤུགས་ལ་བརྟེན་ནས་རྒྱལ་ཁབ་སྐྱོང་ཞིང་། དེའི་སྟོབས་ཤུགས་ལ་བརྟེན་ནས་སྤྱི་ཚོགས་བརྟན་བརླིང་ངང་འཕེལ་རྒྱས་སུ་གཏོང་དགོས་ཞེས་པར་གོ་བ་བླངས་ན།
རང་རེ་བོད་ནི་ཀྲུང་ཧྭ་མི་རིགས་ནང་གི་ལོ་རྒྱུས་རིང་ཞིང་རིག་གནས་སྣ་མང་གཏིང་ཟབ་ལྡན་པའི་མི་རིགས་ཤིག་ཡིན་པར་ཁས་འཆེས་ཡོད་པ་ལྟར་རེད།
དེ་འདྲའི་ཕུན་སུམ་ཚོགས་པའི་རིག་གནས་འདི་ཉིད་རྒྱུན་འཛིན་དར་སྤེལ་གཏོང་མ་ཐུབ་ན་ཀྲུང་ཧྭ་མི་རིགས་ཧྲིལ་བོའི་གྱོང་གུད་ཡིན་ཞིང་།
རླབས་ཆེན་གྱི་ལས་དོན་འདི་འཐུས་ཤོར་དུ་གཏོང་བ་ནི་རྒྱབ་ཁབ་དང་མི་རིགས་ཀྱི་ལས་དོན་འཐུས་ཤོར་དུ་སོང་བ་ཅི་ལ་མ་ཡིན།
དེས་ན་རྒྱབ་ཁབ་བརྟན་བརླིང་དང་མི་རིགས་འདྲ་མཉམ་དར་རྒྱས་གོང་འཕེལ་ལ་གཞོལ་རྒྱུ་ནི་རྒྱབ་ཁབ་འདིའི་སྤྱི་འབངས་རེ་རེའི་གཟུར་མེད་འོས་འགན་དུ་གྱུར་ཡོད་མོད།
འོན་ཀྱང་ལྟས་ངན་འུག་པའི་ཧ་སྐད་ཇི་བཞིན་ཉེ་ལམ་ནས་ང་ཚོའི་རྔ་བ་ཁུལ་དུ་བོད་སྐད་བོད་ཡིག་གི་ལམ་ནས་རྩིས་དངོས་རྫས་གསུམ་དང་ས་ལོ་སྲིད་གསུམ་སློབ་ཁྲིད་བྱས་མི་ཆོག་པར།
སློབ་སྐབས་རྗེས་མ་ནས་ཁྲིད་ཚན་དེ་རྣམས་རྒྱ་ཡིག་གི་ལམ་ནས་ཁྲིད་དགོས་ཟེར་དང་། རྒྱུ་མཚན་ནི་བོད་ཡིག་ནས་ཁྲིད་པའི་རྒྱུགས་འབྲས་མི་བཟང་ཟེར་པ་དེ་རེད།
རྣ་བར་གཟན་པའི་གཏམ་ངན་དེ་ནད་ཡམས་ཇི་བཞིན་སློབ་གྲྭ་ཆུང་འབྲིང་གི་དགེ་སློབ་རེ་རེའི་རྣ་རྩར་མཆེད། གཏམ་ངན་དེས་ང་ཚོ་དགེ་སློབ་ཀུན་གྱི་རྒྱུན་ལྡན་གྱི་སློབ་ཁྲིད་སློབ་གསོའི་ཧུར་བརྩོན་གྱི་སེམས་ཁམས་དེ།
སྐད་ཅིག་དེ་ཉིད་ལ་མེ་ཐོག་ཏུ་ཆུ་ལྡུག་པ་ནང་བཞིན་འཁྱག་སོབ་སོབ་ཏུ་བཏང་སོང་།
ང་ཚོའི་སློབ་གྲྭའི་གནས་ཚུལ་དངོས་ནི་འདི་འདྲ་ཡིན་ཏེ།
ཉེ་བའི་ལོ་ཤས་རིང་ནས་མཐོ་དམའ་འབྲིང་གི་མཐར་ཕྱིན་དང་མཐར་ཕྱིན་མ་ཡིན་པའི་གཅིག་གྱུར་རྒྱུགས་ཚད་ཐེངས་རེ་རེ་ནས།
ཐོད་རྒལ་གྱི་འབྲས་བུ་ལེན་བཞིན་ཡོད། སྐར་འབྲས་ཁོ་ནའི་ཐད་ནས་བཤད་ནའང་། དམའ་འབྲིང་རིམ་པར་སྐར་མ་བདུན་བརྒྱ་ཡན་ལོན་མཁན་མང་ལ།
མཐོ་འབྲིང་རིམ་པར་སྐར་མ་ལྔ་བརྒྱ་ཡན་ལོན་མཁན་ལོ་རེ་བཞིན་ཇེ་མང་དུ་འགྲོ་བཞིན་ཡོད། གོང་གི་ཁྲིད་ཚན་དེ་དག་རྒྱ་ཡིག་གི་ལམ་ནས་འཁྲིད་བཞིན་པའི་ང་ཚོའི་ཁྱིམ་མཚེས་རྫོང་རྒྱ་ཡིག་སློབ་འབྲིང་དང་བསྡུར་ན།
སྐར་མ་བརྒྱ་ནས་ཉིས་བརྒྱས་ང་ཚོ་སྔོན་དུ་སླེབས་ནས་ཡོད། དེ་ལྟར་སློབ་ཆེན་དངོས་གཞིར་འཕྲོད་ཚད་ཀྱང་ང་ཚོའི་ཉེ་འཁོར་གྱི་རྫོང་མཁར་འདི་ཚོའི་རྒྱ་ཡིག་སློབ་གྲྭ་རྣམས་ལ་བསྡུར་ན།
གནམ་སའི་བར་ཁྱད་ཡོད་པ་མིག་མཐོང་ལག་ཟིན་ཡིན།
དེའི་ཕྱིར་ཁྲིད་ཚན་དེ་དག་བོད་ཡིག་ནས་འཁྲིད་ན་སྦྱངས་འབྲས་མི་བཟང་ཟེར་བ་དེ་སྐྱག་རྫུན་རང་ཡིན།
དེ་ནི་ལོང་གཏམ་འབའ་ཞིག་ཡིན།
བོད་རིགས་བྱིས་པ་ཚོར་བོད་སྐད་བོད་ཡིག་ནས་ཤེས་བྱ་སློབ་བཅུག་ན་ལོབས་སྐྱེན་པ་དང་།
བོད་ཡིག་བོད་སྐད་བཤད་ནས་མཚར་ལོངས་འབྱུང་བཅུག་ན་ལུས་སེམས་བདེ་ཐང་ཡོང་བ་ཆོས་ཉིད་ཡིན་ལ།
བོད་ཡིག་བོད་སྐད་ལམ་ནས་མི་ཆོས་བསླབ་བྱ་སློབ་ན་སློབ་གསོའི་སྐྱེ་ཁམས་ཆོས་ཉིད་དང་ཡང་མཐུན་པས།
དེ་ལྟར་མི་རབས་བདེ་ཐང་ཅན་ཞིག་འཚར་ལོངས་བྱུང་ན་རྒྱལ་ཁམས་བདེ་ཞིང་སྐྱིད་པ་ཡོང་བ་ཡང་ཆོས་ཉིད་ཡིན་མོད།
འོན་ཀྱང་དཔོན་པོ་འགའ་རེའི་ཀླད་པ་ཆུས་བཤལ་བ་ནང་བཞིན་ཆོས་ཉིད་ཡོད་ཚད་རྒྱབ་ཏུ་བསྐྱུར་ནས།
མི་བཤད་དགུ་བཤད་དང་མི་ལས་མི་དགུ་ལས་ཀྱི་བྱ་བ་མང་པོ་བསྒྲུབས་དང་སྒྲུབ་ཀྱིན་ཡོད།
མདོར་ན་ཁྲིམས་ལུགས་ཀྱི་བརྟེན་ས་དང་དངོས་ཡོད་གནས་ཚུལ་འདི་ལྟར་ཡིན་བཞིན་དུ་ད་དུང་བཙན་བསྐུལ་གྱིས་སྒྱུར་དགོས་ཟེར་ན།
དེ་ནི་དབང་ཤེད་ཅན་གྱི་མི་སྣ་རེ་ཟུང་གི་ལོག་སྤྱོད་རང་ཡིན་པས། བོད་ཡིག་ལ་དུངས་པ་ཟབ་པའི་བོད་མི་རེ་རེ་ནས་ཁྲིམས་ལུགས་ཀྱི་གོ་ལག་ཐོགས་ཏེ།
ཕ་སྐད་ཕ་ཡིག་གི་འཚོ་གནས་དང་འབྲེལ་ཟབ་པའི་སོ་སོའི་ཁེ་དབང་སྲུང་སྐྱོབ་དང་བརྩོན་ལེན་བྱེད་ཕོད་དགོས།
༢༠༢༠/༤/༡༢ མཛོད་དགེ་བོད་ཡིག་སློབ་འབྲིང་གི་དགེ་མིང་འཛིན་པ་དར་རྒྱས་ནས།