དེ་ཡང་བསམ་ཚུལ་སྣ་ཚོགས་ལས་བྱུང་བའི་གོ་ཐོས་སྣ་ཚོགས་ཤིག ཀྲུང་ཧྭ་མི་རིགས་ལྔ་དྲུག་ལས་བོད་རིགས་ཀྱི་མདོ་སྨད་རྔ་ཁུལ་འབྲོག་རྫོང་དག་གི་སློབ་གསོའི་ཐབས་ལམ་བསྒྱུར་འདོད་པ་དེ་དང་། སྐད་ཡིག་གིས་གོ་མི་ཆོད་པར་དམིགས་ནས་ཕན་མེད་དགོས་མེད་དུ་འདོད་དེ་དོར་བཅོམ་བྱེད་བསམ་པ་ནི་མི་རིགས་ཤིག་བརླག་ནས་གཞོམ་འདོད་པ་མ་ཡིན་ནམ། སྤྱིར་མི་རིགས་ཤིག་གི་སྐད་ཡིག་ནི་མི་རིགས་གང་ཡིན་པ་དེའི་ཚེ་སྲོག་ལྟ་བུ་ཡིན་ཙང་། དེ་ལ་བདག་པོ་བརྒྱབ་སྟེ་གཅེས་སྤྲས་དང་དར་སྤེལ་གཏོང་བ་ནི་མི་རིགས་གང་དེའི་མི་བུ་ཚང་མ་ལ་འགན་ཡོད་པ་མ་ཟད། ཏང་དང་རྒྱལ་ཁབ་ཀྱི་ཡང་དག་པའི་ལམ་ཕྱོགས་དང་སྲིད་ཇུས་ལའང་མ་འགལ་བར་གཏན་འཁེལ་བྱས་ཡོད་པ་བཞིན་ལག་བསྟར་བྱས་ཏེ་ཁྱབ་སྤེལ་གཏོང་དགོས།
མི་རིགས་གང་ཡིན་པ་དེའི་སྐད་ཡིག་ལ་སོ་སོའི་ཁྱད་ཆོས་དང་རིན་ཐང་ལྟ་ཚུལ།
འཇིག་རྟེན་ལྟ་ཚུལ་བཅས་ནུས་པ་མི་འདྲ་བ་དང་མཚོན་བྱེད་མི་འདྲ་བ་སྣ་ཚོགས་ཡོད་པས། ཀྲུང་ཧྭ་རིག་གནས་ཀྱང་འཛམ་གླིང་ལ་ངོམ་ཆོག་པའི་རིག་གནས་སྣ་འཛོམས་ཅན་དང་ཁྱད་ཆོས་གང་མང་ཅན་ཞིག་ཏུ་གྲུབ་ཡོད་པ་འདི་རེད།
གལ་ཏེ་མི་རིགས་གང་ཞིག་གི་རིག་གནས་ལ་གནོད་སྐྱོན་དང་གཏོར་བརླག་བྱུང་ཚེ་ཀྲུང་ཧྭ་སྤྱིའི་རིག་གནས་དང་གཅིག་ཏུ་གྱུར་བའི་གོང་བུ་ཆེན་པོའང་གས་ཆགས་སུ་འགྲོ་བའི་ཉེན་ཁ་ཡོད་པས།
དེ་ལྟ་བུའི་གནོད་འགལ་ཅན་གྱི་གཡོ་མི་བཤམ་ལ་བཤམ་པའི་སྤོབས་པའང་མེད་ངེས་རེད་སྙམ་ཡོད།
རང་རྒྱལ་ནི་ཡུལ་སྲོལ་གོམས་གཤིས་མི་འདྲ་བའི་མི་རིགས་མང་བོ་དང་རིག་གནས་མི་འདྲ་བ་སྣ་ཚོགས་ཀྱིས་གྲུབ་པའི་རྒྱལ་ཁབ་སྟོབས་ལྡན་ཞིག་ཡིན་ཙང་།
མི་རིགས་ཤིག་འཕེལ་རྒྱས་དང་དར་སྤེལ་དུ་བཏང་བ་ཡིན་ན་རྒྱལ་ཁབ་འཕེལ་བ་ཡིན་ལ། མི་རིགས་འཕེལ་རྒྱས་ཀྱི་གཞི་འཛིན་ས་ནི་སློབ་གསོ་ཡིན་པ་དང་།
སློབ་གསོ་དར་སྤེལ་གྱི་རྩ་བ་ནི་མི་རིགས་རང་གི་སྐད་ཡིག་ཡིན་པ་ཚང་མས་ཤེས་གསལ་རེད། དེ་ཡིན་ཙང་རང་གི་སྐད་ཡིག་དེ་རིག་གནས་སློབ་གསོ་དང་ཚོང་ལས་དཔལ་འབྱོར།
ཚན་རིག་ལག་རྩལ་། ལག་ཤེས་བཟོ་ལས་བཅས་ཀྱི་ཕྱོགས་ལ་བཀོལ་རྒྱུ་གལ་ཆེན་ནང་གི་དོན་ཆེན་ཡིན་པས།
ཏང་ཀྲུང་དབྱང་གིས་མི་རིགས་ས་ཁུལ་གྱི་སྐད་ཡིག་དང་རིག་གནས་དར་སྤེལ་གཏོང་དགོས་པའི་སྲིད་ཇུས་ལྟར་ང་ཚོས་འོས་འགན་དང་ལེན་བྱས་ཏེ་འབད་དགོས།
རང་ཉིད་ནས་མགོ་བརྩམས་ཏེ་འབད་དགོས་ལ་ལག་ལེན་དང་བཀོལ་སྤྱོད་གཏོང་རྒྱུ་དེ་བས་གལ་ཆེ།
གོང་རིམ་ནས་མི་རིགས་རིག་གནས་དང་སྐད་ཡིག་སྲུང་སྐྱོབ་དར་སྤེལ་གཏོང་དགོས་པའི་སྐུལ་མ་གཏོང་སྐབས།
བར་གྱི་མི་བུ་ཁ་ཤས་ཀྱིས་རང་གི་ཁེ་ཕན་ཙམ་གྱི་ཆེད་དུ་ཁྲིམས་མེད་ལུགས་འགལ་གྱི་གཏམ་སྒྲོག་པ་ན།
དེ་ལ་མཐའ་གཅིག་ཏུ་རྒོལ་དགོས་ལ་སུན་འབྱིན་བྱེད་དགོས་པའང་གཞིར་བཞག་རེད། རེད་དེ་གཙོ་བོ་རང་གིས་རང་གི་སྐད་ཡིག་བཀོལ་སྤྱོད་མི་གཏོང་བར་བཞག་པ་དང་།
རང་གི་བུ་རབས་ཚ་རྒྱུད་ལ་རང་གི་སྐད་ཡིག་དང་རིག་གནས་སློབ་པའམ་སྦྱང་དུ་མ་བཅུག་པར་བསྡད་བཞག་པ་དང་།
ཡང་མིན་ན་རང་གི་སྐད་ཡིག་དེ་དགོས་མཁོ་དང་བཀོལ་སྤྱོད་ཀྱི་རིན་ཐང་མེད་པར་འདོད་དེ་གཞན་ཞིག་ལ་སློབ་ཏུ་བཅུག་པ་དག་བྱས་ན་རང་སྲོག་རང་གིས་བཅད་དང་གཅོད་པ་ལྟ་བུ་མ་ཡིན་ནམ།
མདོར་ན། ང་ཚོས་རང་གི་ཁེ་ཕན་མི་སྲུང་བར་མི་རིགས་ཀྱི་དར་རྒུད་དང་རྒྱལ་ཁབ་ཀྱི་འཕེལ་རྒྱས་ལ་དམིགས་ནས།
ཏང་ཀྲུང་དབྱང་གི་ཡང་དག་པའི་སྲིད་ཇུས་འོག་ནས་རང་གི་སྐད་ཡིག་ལ་རང་གིས་བདག་པོ་ནན་མོ་རྒྱག་དགོས་པ་དང་།
ཤེས་ཡོན་པ་སུ་དང་སུ་ཞིག་ཡིན་ཡང་སྐད་ཡིག་སྲུང་སྐྱོབ་ཀྱི་འོས་འགན་དང་ལེན་བྱས་ཏེ་དགོས་མེད་ཀྱི་འཆལ་གཏམ་སྒྲོག་མཁན་དག་ལ་རྒོལ་དགོས་ལ།
མི་རིགས་ཤིག་འཕེལ་རྒྱས་སུ་འགྲོ་དགོས་ན་མི་རིགས་དེའི་སྐད་ཡིག་འཕེལ་རྒྱས་དར་སྤེལ་གཏོང་དགོས་པའི་སློབ་གསོ་དང་འབོད་སྐུལ་ཡང་གཏོང་དགོས།
ང་ཚོས་རང་ཉིད་ནས། བུ་རབས་ཚ་རྒྱུད་ནས། གཉེན་མི་ཉེ་འབྲེལ་ནས་མགོ་བརྩམས་ཏེ་སྐད་ཡིག་ལ་སློབ་གཉེར་བྱས་ཏེ་བཀོལ་སྤྱོད་བྱེད་དགོས་པ་དང་།
ལས་བྱེད་དང་ཟླ་ཕོག་ཙམ་གྱི་ཆེད་དུ་སློབ་གཉེར་མི་བྱེད་པར་སྐད་ཡིག་དར་སྤེལ་དང་དེ་ལ་བདག་པོ་ལེགས་པར་རྒྱག་ཐུབ་པར་འབད་ན་ལེགས་སྙམ་པས་སོ།།