ལོ་ཟླའི་གཞུར་རྒྱུན།

ཁ་བའི་ལྷ་མོ། 

དེ་རིང་ཕྱི་ཟླ་བདུན་པ་ཧྲིལ་བོ་རྫོགས་པ་མ་ཟད་ཕྱི་ཟླ་༨བའི་ཚེས་༡༠ཡང་ན་ཟླ་བརྒྱད་བའི་གསུམ་ཆ་གཅིག་རྫོགས་པ་རེད།འདི་ལྟར་དུས་ཚོད་ནི་ཆུ་ཚོད་དང་སྐར་མ་སྐར་ཆས་ཐག་སྒྲ་རེ་དང་མཉམ་དུ་གློ་བུར་གློ་བུར་དུ་འདས་འགྲོ་བཞིན་ཡོད་པས།དུས་ཚོད་ནི་བཞུར་བཞིན་ཟད་འགྲོ་བའི་ངོ་བོ་ན་ཡོད་པ་དེ་ང་ཚོ་མཐུན་མོང་གི་དུས་ཚོད་རེད་ལ་ང་ཚོ་མཐུན་མོང་གི་མི་ཚེ་རེད།ང་ཚོའི་མི་ཚེའི་སྐར་མ་དང་སྐར་ཆ་རེ་རེ་བཞིན་ཟད་འགྲོ་བའི་ཐག་སྒྲ་གྲགས་པ་དེས་ང་ཚོ་ལ་མི་ཚེ་ཟད་བཞིན་པའི་བརྡ་ཞིག་གཏོང་བཞིན་ཡོད་པ་རེད།

འདི་ལྟར་བསམ་ན་ང་ཚོ་ཞེ་གཏིང་ནས་འཇིགས་ཡོང་བ་ཞིག་དང་སྐྲག་ཡོང་བ་ཞིག་ཡིན་མོད།ང་ཚོས་ཐག་རིང་ཞིག་ཏུ་འདོད་བཞིན་པའི་ལོ་དང་ཟླ་བ།ཉིན་དང་ཞག་མ་ཟེར་བ་ནི་ང་ཚོའི་ཉེ་འགྲམ་གྱི་སྐར་ཆ་རེ་རེའི་གྲུབ་ཆ་རུ་གྱུར་ནས་ཡོད་པ་དང་།མི་གཅིག་གི་མི་ཚེའི་དུས་ཡུན་ཀྱང་དུས་ཚོད་སྐར་ཆ་རེ་རེའི་གྲུབ་ཆ་ཞིག་ཡིན་པ་དང་།མི་གཅིག་གི་མི་ཚེའི་དུས་ཡུན་ནི་དུས་ཚོད་ཀྱིས་ཐག་གཅོད་ལྟ་བུ་ཞིག་ཡིན་སྟབས།མི་ཚེར་གཅེས་སྤྲད་ཟེར་བ་ནི།དོན་དུ་ཆུ་ཚོད་སྐར་ཆ་རེ་རེར་གཅེས་སྤྲད་བྱེད་དགོས་པ་ཞིག་ཅི་ལ་མིན་ཨང་།

ནུབ་གླིང་གི་བརྩམས་སྒྲུང་ཅིག་ཏུ་དུས་ཚོད་ནི་ཁ་ངོ་དཀྲུ་སའི་འཁྲུས་གཞུང་དུ་ཡང་བཞུར་ནས་བུད་འགྲོ།མི་ཚེའི་རིན་ཐང་ཡང་འཁྲུས་གཞུང་དུ་བཞུར་འགྲོ་བ་ཞིག་རེད་ཟེར།མི་གཅིག་གི་མི་ཚེའི་ནང་རིན་ཐང་ཞིག་འཚོལ་དགོས་པར་དུས་ཚོད་དམ་འཛིན་ནི་ཡོད་ཚད་ཀྱི་རྩ་བ་ཞིག་རེད།མི་ཞིག་གི་སྐྱེས་འཆི་ནི་སྐར་ཆ་རེ་ཡི་ཐག་གཅོད་དུས་ཡུན་བར་ན་ཡོད་པས།དུས་ཚོད་ནི་མི་ཚེའི་གཞུར་རྒྱུན་དང་ངོ་བོ་དབྱེར་མེད་ཅིག་ཡིན་པས་ཚེ་སྲོག་དང་རིན་ཐང་ལ་གཅེས་ན་དུས་ཚོད་ལ་གཅེས་སྤྲད་བྱེད་ཐུབ་དགོས།