 |
| རྩོམ་པ་པོ། བོན་རྒྱ་བསྟན་འཛིན་རབ་རྒྱས། |
རྒྱ་དམར་གཞུང་གིས་བོད་པ་ས་ཡ་གཅིག་ལྷག་དམར་གསོད་བཏང་བ་རེད།འུ་ཚོས་དེ་ལོ་ངོ་དྲུག་ཅུའི་རིང་ལ་བསྒྲགས་པ་རེད།གླེང་བ་རེད།བོད་ཡུལ་གྱི་ལུང་ཁུག་ཅིག་ནས་མི་རེ་བཟུང་ནའང་།གོ་མ་ཐག་འུ་ཚོས་བསྒྲགས་པ་རེད།འདི་འུ་ཚོའི་འགན་འཁྲི་རེད།བསྒྲགས་ལོས་དགོས།ངེས་པར་དུ་དགོས།ཡིན་ནའང་།རང་དབང་ལུང་བ་ནས་རྒྱ་ནག་པ་ཞིག་གིས་བོད་མི་གཅིག་ཡོངས་གྲགས་ངང་བསད་པ་ད་རེ་ཐེངས་དང་པོ་རེད།འདི་ལ་ཀུ་ཡངས་མེད།བཟོད་པ་མེད།རང་དབང་ལུང་བ་ནས་བོད་པ་གཅིག་བསད་ག་ལ་ཆོག།བོད་པ་གཅིག་གི་བ་སྤུ་གཅིག་སྒུལ་ནའང་མི་ཆོག།ཁ་སང་རྒྱ་མི་མཐོང་ཚད་ལ་གཅར།རྒྱ་ཡི་ཚོང་ཁང་དང་ཟ་ཁང་རིག་ཚད་བཅག་ནས་གཏོར་ནས་མ་སོང་བ།བླ་མ་ཐམས་ཅད་མཁྱེན་པའི་བཀའ་སློབ་ཁོ་ན་སྙིང་ལ་བཅངས་པ་ལས།བོད་པ་ཚོས་མ་ཕོད་པ་དང་མ་འཇོན་པ་གང་ཡང་མ་རེད།རང་དབང་ལུང་བར་ལམ་སྲོལ་དེ་འདྲ་མེད་པའང་མ་རེད།ལྷག་པར་ཧྥ་རན་སིའི་མི་མང་ལས་འགུལ་ཡོང་ཐེངས་རེར་བཅག་གཏོར་མང་པོ་ཡོང་གི་ཡོད།དཔེར་ན།ཉེ་བའི་ཆར་གྱི་སྟོད་གོས་སེར་པོའི་ལས་འགུལ་སྐབས་སུ་དངུལ་ཁང་ཚོང་ཁང་སོགས་ལྕགས་ལེབ་ཀྱིས་ཤན་ནས་ཉེན་སྲུང་བྱས་ནའང་།སྲང་ལམ་ལ་མེ་བཏང་།ཚོང་ཁང་དང་དངུལ་ཁང་གཏོར།ཉེན་རྟོག་པ་དང་གདོང་ཐུག་བྱུང་བ་སོགས་ང་ཚོས་དངོས་སུ་མཐོང་བ་རེད།ཡིན་ནའང་།བོད་པའི་བཟང་སྤྱོད་མ་བརླག་པར་དགྲ་བོའི་རྒྱུ་རྫས་ལས་གཞན་གང་ལའང་བཅག་གཏོར་མ་བྱས་པ་ཧ་ཅང་ཚོད་ཐུག་པ་རེད།
ཁ་སང་བོད་ཆོལ་ཁ་གསུམ་ཙམ་ཡར་ལངས་པ་མ་རེད།བོད་པའི་རིགས་སུ་གཏོགས་པའི་ཧི་མ་ལའི་རི་རྒྱུད་ཀྱི་སྤུན་ཟླ་ཚོ་དང་བཅས་ཡར་ལངས་པ་རེད།ང་ཚོའི་ཁོག་ན་མེ་རི་ལྟ་བུའི་ཤ་འཁོན་ཡོད་པས།ཤ་འཁོན་གྱི་རི་བོ་སྒུལ་མི་ཉན།འདི་ངས་ཕྱི་ལོགས་ཀྱི་རྒྱ་རྒན་ཚོར་ཁ་ལ་བྱས་པ་ཡིན།"རྒྱ་སྐྲག་ལ་མཐའ་མེད།
།"ཅེས་བཤད་སྲོལ་ཡོད་པ་ལྟར་ཁ་སང་ཕ་རེ་སི་ནས་རྒྱ་རྒན་ཚང་མས་ལྭ་བ་དཀར་པོ་གོན་ནས་འགྲོ་གིན་འདུག་པས་སྙིང་རྗེ་བ་ཞིག་རེད།རྒྱ་མིའི་སྦྱིན་བདག་ཚོས་ལས་འགུལ་སྤེལ་སའི་ཉེ་འགྲམ་གྱི་ཟ་ཁང་ཚོང་ཁང་དག་གིས་རབ་ཡིན་ན་སྒོ་མ་ཕྱེ།སྒོ་ཕྱེ་ནའང་སྒོ་བརྒྱབ་ཆོག་ཆོག་གྱིས་ལ་བརྙན་མིག་ཡག་པོ་གཙང་ཕྱིས་བྱོས་ཞེས་སྔ་ཉིན་ནས་དོགས་སོན་བྱེད་ཀྱི་འདུག།འུར་ཆེ་ཙམ་བཤད་ན།ཁ་སང་རྒྱ་རྒན་ཚོའི་སྙིང་རིལ་རིལ་ཁོག་ན་འདུག་གི་མི་འདུག།ང་གད་མོ་ཤོར་བ་མ་ཟད།དགའ་བ་ཞིག་ཀྱང་ངང་གིས་སྐྱེས།ལ་ལས་མི་རིགས་གཞན་ཞིག་གིས་བོད་མི་ཞིག་དེ་ལྟར་བསད་ན་འདི་ལྟར་ངོ་རྒོལ་བྱེད་ཕོད་དམ།
བོད་པ་ནང་ཁུལ་བ་ཞིག་གིས་འདི་ལྟར་བསད་ན་ཅི་བྱེད་ཅེས་རྨོངས་འདྲི་བྱེད་ཀྱིན་འདུག།མི་རིགས་གཞན་ཞིག་གིས་དེ་ལྟར་བསད་ཡོད་ན།ངོ་རྒོལ་བྱེད་ཕོད་ཀྱང་མི་བྱེད།རྒྱུ་མཚན་ཧ་ཅང་སླ་བོ་རེད།ང་ཚོའི་དབར་ན་ཞེ་འཁོན་ཅི་ཡང་མེད་པས་སོ།
།མི་སྒེར་གཉིས་ཕན་ཚུན་དབར་ལ་ཁོང་ཁྲོའི་མགོ་གནོན་མ་ཐུབ་པའི་རྐྱེན་ཙམ་ཡིན་པས།དེ་ལ་ཡར་ལངས་བྱེད་རན་མེད།ངོ་རྒོལ་བྱེད་རན་མེད།ཡིན་ནའང་།རྒྱ་རྒན་ཞིག་གིས་བ་སྤུ་ཞིག་སྒུལ་ནའང་ངོ་རྒོལ་བྱེད་འོས་པ་མཐའ་དག་བྱེད་ངེས་ཡིན་ལ།བྱེད་ཀྱང་དགོས།དེ་ཙམ་ཡང་བྱེད་ཀྱི་མེད་དུས་བོད་དོན་ཤི་ཚར་བ་ཡིན།
བོད་ཀྱི་ཞེ་འཁོན་ཤི་ཚར་བ་ཡིན། བོད་ཀྱི་ཞེ་འཁོན་ཤི་ཚར་རྗེས། བོད་དོན་ཞིག་གང་ན་ཡོད།
དེར་བརྟེན། ད་རེའི་ངོ་རྒོལ་མཐའ་དག་ཡག་པོ་བྱུང་། བརྩེ་བའི་སྤུན་ཟླ་ཚོ། བཀའ་དྲིན་ཆེ།
ད་ཡང་ནང་ཁུལ་གྱི་དམག་མི་ངར་མ་ཚོས་ཆོལ་ཁ་བཤད།
སྲིད་སྐྱོང་དང་སྲིད་ཟུར་བཤད་ནས་ཡོང་གི་འདུག དེ་དག་ལ་བསམ་ཚུལ་ཅི་ཡང་མེད།
མི་རིགས་གང་ལའང་ནང་ན་ཡར་བཤད་མར་བཤད་ཡོད་པ་རེད། མུ་མཐུད་དུ་ཤོད་དང་།
རང་དབང་ལུང་བའི་ཁྱད་ཆོས་དང་རང་དབང་མཚོན་ཆས་ཤིག་ཁྱོད་ཚོའང་རེད།
གཙོ་བོ་དགྲ་ལ་ཐུག་དུས་མཐུན་སྒྲིལ་རྡོག་རྩ་གཅིག་ཡིན་པ་དེས་ངའི་བློ་ཁ་ཚིམ་ཡོད།ཧྥ་རན་སིའི་བོད་པའི་མི་འབོར་དང་ཁ་སང་གི་འདུ་འཛོམས་བསྡུར་ན་ཧ་ལས་པའི་ཚད་རེད།ཁ་སང་གི་བོད་པའི་མཐུན་སྒྲིལ་གྱི་རྣམ་པ་ལ་མི་རིགས་གཞན་གྱིས་ཀྱང་ཡིད་སྨོན་བྱེད་ཀྱི་འདུག།རྒྱ་རྒན་ཚོའང་འགྲམ་ཆུ་ལྡང་གི་འདུག།དེ་ཁོ་ནས་ངའི་འདོད་པ་ཡོངས་སུ་ཚིམ་ཡོད།གཞོན་སྐྱེས་ཚོ་སོང་ནས་ལག་དམར་ཚང་གི་ཟ་ཁང་གཏོར།ལག་དམར་གྱི་རླངས་འཁོར་ཁ་ལོ་བརྗེས་ནས་ཡོང་དུས།བོད་པ་ཚོ་ལོས་དགའ།ས་གནས་ཀྱི་ཡུལ་མི་ཚོའང་དགའ་ནས་ལམ་ལ་བུད་དེ་དགའ་བསུ་བྱེད་ཀྱི་འདུག།ཡིན་ནའང་།ལ་ལས་འཚེ་མེད་ཞི་བའི་ལྟ་གྲུབ་དང་འགལ་རབས་གླེང་གི་འདུག
སྲོག་མེད་ཀྱི་ཅ་ལག་བཅག་པ་འཚེ་བ་ཡིན་པའི་རིག་པའི་གཞུང་ལུགས་ཤིག་ཡོད་ན།རིག་གནས་དེའང་གད་སྙིགས་ཀྱི་རིགས་སུ་གཏོགས་པས་རྣམ་དཔྱོད་ཅན་གྱིས་བླངས་པར་བྱ་བའི་ཡུལ་མ་ཡིན་ནོ།
།
ས་གནས་དང་རྒྱལ་ཁབ་གཞན་དང་གཞན་ན་ཡོད་པའི་དྲ་འབུ་སྣང་བ་མཐའ་ཡས་ཚོས་ཧྥ་རན་སིའི་ལས་འགུལ་ལ་བརྒྱ་ཆ་རྒྱག་ཁུལ།ལམ་སྟོན་བྱེད་ཁུལ།ལུང་བསྟན་རྒྱག་ཁུལ་བྱེད་ཀྱི་འདུག་མོད་ངས་བལྟས་ན་ཁྱོད་ཚོར་དེ་མི་མཛའ་གི།ཧྥ་རན་སིའི་བོད་མིའི་སྤྱི་ཚོགས་འདི་སྤྱི་ཚོགས་གསར་བ་ཞིག་ཡིན།སྤྱི་ཚོགས་འདི་༢༠༡༠
ཚུན་ཆད་ལ་འདུས་པའི་སྤྱི་ཚོགས་ཤིག་ཡིན།འདིའི་ནང་ན་གསར་རྙིང་མེད།ལངས་ཕྱོགས་མེད།ནམ་རྒྱུན་ལས་འགུལ་གང་ཞིག་སྤེལ་ནའང་ས་གནས་ཀྱི་ཚོགས་པ་ཚང་མ་མཉམ་རུབ་ཀྱིས་སྤེལ་གྱི་ཡོད།འདི་ན་གཞོན་ནུ་ཚོགས་པ་གཉིས་མེད།བུད་མེད་ཚོགས་པ་གཉིས་མེད།ཆབ་སྲིད་པ་གཅིག་གི་དམིགས་བསལ་ས་ཁུལ་མིན།
ངས་སྤྱི་ཚོགས་འདི་འདི་ལྟར་འགྲོ་ཐུབ་པར་རེ་བ་བྱེད་ཀྱི་ཡོད།འདི་ན་རྩོམ་པ་པོའི་དཔུང་ཁག་ཅིག་ཡོད།
རང་རང་ས་ནས་རྣམ་དཔྱོད་ཀྱི་རྣོ་ཁ་སྨྱུག་རྩེ་ནས་བརྡར་གྱིན་པ་ལས་སྲང་ལམ་དབར་གྱི་གད་སྙིགས་འཐུས་ནས།
ཆབ་སྲིད་པ་གཅིག་གི་ཨོང་ཤ་ལྡག་ནས་ཕུ་ནུ་ནང་ཁུལ་ལ་དམག་རྒྱག་རེས་བྱེད་ཀྱི་མེད།ཡིན་ནའང་།དགྲ་ལ་ཐུག་དུས་མཉམ་དུ་ལངས་པ་ཁ་སང་རིག་ནོ་དེ་རེད།ཁ་སང་ཧྥ་རན་སིའི་གསར་ལམ་ཡོད་ཚད་ནས་བོད་གླེང་འདུག།དེའང་ད་རེའི་དོན་རྐྱེན་དང་བོད་དོན་གཉིས་ཁ་སྤྲད་ནས་གླེང་འདུགལོ་ངོ་དྲུག་ཅུའི་རིང་གི་ཤ་འཁོན་དང་འབྲེལ་ནས་གླེང་འདུག
ང་ཚོས་ཀྱང་ལོ་ངོ་དྲུག་ཅུའི་རིང་གི་ཤ་འཁོན་དང་འབྲེལ་ནས་གནས་ལུགས་བགྲངས།
སྐད་འབོད་བྱས་པ་རེད།འདས་པོ་དེས་རྒྱ་དར་ཕྱར་ནས་སྐད་འབོད་བྱས་ཏེ་མ་བསད་ནའང་།དགྲ་ཡིས་བསད་པ་དེ་ག་རང་གིས་ང་ཚོས་བོད་དོན་ལ་ངོས་འཛིན་བྱས་ཤིང་།ད་ལྟ་བོད་དོན་དུའང་གྱུར་བ་རེད།དགྲ་བོས་མྱི་བསད་ན་བོད་དོན་མིན་ན་བོད་དོན་ཞིག་གཞར་ཡང་མེད་པས།ཁ་སྟོང་ནང་གི་ཚིག་སྟོང་དག་ལ་རྣ་བ་ཀླན་པར་མི་འདོད།ལ་ལས་ཅི་ཞིག་མཁྱེན་ཁུལ་གྱིས་དགྲ་བོའི་ཟ་ཁང་གཏོར་བ་ལས་ཁྲིམས་ཐོག་ནས་རྒྱལ་ཁ་ལེན་དགོས་པ་རེད་ཟེར།ཁྲིམས་ཐོག་ནས་རྒྱལ་ཁ་ཅི་ཞིག་ལེན་དགོས་པ་རེད།ཧྥ་རན་སིའི་ཁྲིམས་དྲང་མོ་ཡོང་དགོས་པ་རེད་ཟེར་བ་ཡིན་ནམ།རི་བོང་གནམ་རྡིབ་ཀྱི་སེམས་ཁྲལ་མ་བྱེད།ཧྥ་རན་སིའི་རྒྱལ་ཁྲིམས་གསེར་གྱི་རྣ་རུ་རྒྱ་རྒན་ཟ་ཁང་ཕྱེ་ནི་ཞིག་གིས་ཉོ་ཐུབ་ནི་མ་རེད།ཧྥ་རན་སིའི་རྒྱལ་ཁྲིམས་དྲང་ནས་དྲང་ལ་ཞུགས་པ་ལས་བོད་པས་ཁྲིམས་རྩོད་པ་ཁྲི་ཞིག་གླས་ནའང་ཚུར་ལ་འཁྱོག་མི་སྲིད་ཅིང་།ཁྲིམས་རྩོད་པ་གཅིག་ལས་མེད་ཀྱང་ཕར་ལ་འཁྱོག་གི་མ་རེད།
ཁྲིམས་ཐོག་གི་ལས་དོན་ཁྲིམས་ཁང་ནས་བྱེད་པས་བོད་པ་ཚོས་སྐད་རྒྱག་དགོས་པ་ཞིག་མ་རེད།ད་རེ་གོ་སྐབས་འདི་དང་བསྟུན་ནས་འཛམ་བུ་གླིང་ལ་གསལ་འདོན་བྱེད་རྒྱུ་ཞིག་ཡོད་པ་ནི།རང་དབང་ལུང་བ་ནས་དགྲ་བོས་ང་ཚོ་བསད་ན་མི་ཆོག་པའི་བདེན་པ་ར་སྤྲོད་བྱེད་རྒྱུ་དེ་རེད།
ད་རེ་ཏག་ཏག་གསལ་འདོན་ཡང་བྱེད་ཐུབ་ཡོད།
རང་དབང་ལུང་བ་ནས་བོད་པ་ཁ་ཤས་བོར་སོང་བ་འུ་ཚོ་ཚང་མར་གསལ་བ་དེ་རེད།དེ་དག་ཀྱང་གཅིག་བྱས་ན།དགྲ་བོ་རྒྱ་དམར་ཞིག་གིས་འདི་ལྟར་བསད་ནས་ཁུ་སིམ་སིམ་ཅིག་ལ་སྦས་ཡོད་སྲིད་པས།དོན་དག་འདི་ཁུ་སིམ་སིམ་བཞག་ན་འདི་འདྲ་བསྟུན་མར་འབྱུང་བའི་སྒོ་ཕྱེས་པ་རེད།དེར་བརྟེན།ཐེངས་འདིའི་ཡར་ལངས་ལ་ནུས་པ་ཆེན་པོ་ཐོན་ཡོད།སྤྱིར་ནུབ་ཕྱོགས་ཁུལ་གྱི་ཟ་ཁང་ཚོང་ཁང་གི་བདག་པོ་རྒྱ་རྒན་ཚོ་ཧ་ཅང་གཉོམ་པོ་ཡོད་མོད།རྒྱ་གཞུང་ལ་གསང་གནས་ཕར་སྤྲོད་དང་ནུབ་ཕྱོགས་ཀྱི་ལམ་ལུགས་དང་སྤྱི་ཚོགས་ལ་རྒྱུས་ལོན་ཆེད་རྒྱ་དམར་གཞུང་གིས་ཆེད་མངགས་མི་སྒེར་གྱི་མིང་ཐོག་ནས་བཙུགས་པའི་ཚོགས་པ་དང་ཟ་ཁང་།ཚོང་ཁང་དེ་འདྲ་ཡོད་སྲིད་པ་ཡིན།དེར་བརྟེན།ཁྲིམས་དང་ལུགས་ལ་རྨོངས་ཤིང་ང་རྒྱལ་ཧ་ཅང་ཚ་བོ་ཅན་གྱི་ལག་དམར་དེ་རྒྱ་དམར་གཞུང་གིས་ཆེད་དུ་བཙུགས་པའི་མི་སྣ་ཞིག་ཡིན་པར་ཡང་དོགས་པ་སྐྱེ་ཡི་འདུག།ནུབ་ཕྱོགས་ཀྱི་ཁྲིམས་རྒྱུས་ལུགས་རྒྱུས་ཅི་ཡང་མེད་པའི་དེ་འདྲའི་གླེན་པ་གླེན་ནག་ཅིག་ལ།ནུབ་ཕྱོགས་ནས་ཟ་ཁང་ལུང་བ་ལྟ་བུ་ཞིག་འཛིན་པའི་ཆ་རྐྱེན་ཅི་ཡང་ཚང་ཡོད་པ་རེད།ཡིན་ནའང་།རྒྱ་གཞུང་གིས་ཆེད་དུ་བཙུགས་པའི་མི་སྣ་ཞིག་ཡིན་ན།ཟ་ཁང་ལས་ལྷག་པའི་ཚོང་དོན་ལྟེ་གནས་གཞན་ཡང་ཡོད་ཆོག་ལ།དེ་ལས་ལྷག་པའི་ནག་ཉེས་ཀྱང་མང་པོ་བསགས་ཡོད་ངེས་པས།གཅིག་བྱས་ན་རྒྱ་རྒན་དེས་དེ་ལྟར་མི་མང་པོ་བསད་ཡོད་པའི་དོགས་པའང་སྐྱེས་ཆོག་པ་ཞིག་རེད།མི་མང་པོ་བསད་མེད་ཀྱང་རྒྱ་གཞུང་ལ་གསང་གནས་སྤྲོད་པ་སོགས་ཁྲིམས་འགལ་ཀྱི་བྱས་ཉེས་མང་པོ་བསགས་ཡོད་ངེས།འདས་པོ་ཁོང་ཡང་ཧ་ཅང་སྟོབས་ཆེན་པོ་དང་མི་གཅིག་གཉིས་ཀྱིས་ལས་སླ་བོར་ལག་འཁེལ་བ་ཞིག་མིན་པ་མ་ཟད།རྣམ་ཀུན་ཆང་འཐུང་མཁན་ཞིག་ཀྱང་མིན་པ་དང་།ལྷག་པར་ལས་ཀ་གསར་བ་དེར་ཞུགས་ནས་ཉིན་བཞི་ལས་འགོར་མེད་པས།
དེ་འདྲའི་ཆང་མང་པོ་འཐུང་མི་སྲིད།
དེར་བརྟེན།ཆང་གི་ནང་ལ་སྨན་གཏོར་བའི་དོགས་པ་ཟ་ཆོག་པ་མ་ཟད།ཆང་འཐུང་མེད་པར་དུག་སྤྲད་དེ་བསད་རྗེས་ཁ་ནང་ལ་ཆང་བླུགས་པའི་དོགས་པའང་ཟ་ཆོག་པ་ཞིག་རེད།
རྒྱ་མི་གསུམ་གྱིས་རུབ་རྡུང་གིས་བསད་དེ།
གསུམ་ག་ད་དུང་ལྷོད་ལྷོད་ཀྱིས་འགྲོན་པོ་སྣེ་ལེན་བྱས་ནས་བསྡད་པ་རེད་ཅེ་ན།དེ་ནི་བློ་ཡིད་དུ་ཤོང་བ་ཞིག་མ་རེད།གསུམ་ག་དེ་འདྲའི་ལྐུགས་པ་རྐྱང་ཡིན་ནམ།གསུམ་གར་དེ་འདྲའི་ང་རྒྱལ་ཞིག་གང་ནས་ཡོང་བ་ཡིན་ཨང་།ང་རྒྱལ་དེའི་རྒྱབ་ལོགས་ན་ཅི་ཞིག་ཡོད་དམ།བསམ་བློ་ཅི་ལྟར་བཏང་ན་དོན་རྐྱེན་འདི་དེ་ལྟར་གཏིང་ཇེ་ཟབ་དང་དོགས་པ་ཇེ་མང་དུ་འགྲོ་བས།གཏིང་སྔོག་ཚད་ལྡན་ཐུབ་པའི་ཁྲིམས་རྩོད་པ་ཞིག་འཚོལ་རྒྱུ་གང་ལས་གལ་ཆེ་བ་རེད།ཧྥ་རན་སིའི་ཁྲིམས་དྲང་མོ་མི་ཡོང་བའི་དོགས་པ་མེད་ཀྱང་།རྒྱབ་ལོག་སྔོག་མི་ཐུབ་པའི་གནས་ཚུལ་འབྱུང་སྲིད་པས་ཁྲིམས་རྩོད་པར་རྒྱུ་ཆ་དང་དོགས་པ་མཁོ་སྤྲོད་བྱེད་རྒྱུའང་གང་ལས་གལ་ཆེ་བ་རེད།
གནས་ཚུལ་གྱི་བྱུང་རིམ།
ཁྱོད་ཚོས་གཟིགས་དང་རྒྱ་མི་ཚོས་ང་ཚོ་བོད་པ་གཅིག་ལ་གྲི་ཤན་བྱས་ནས་བསད་དེ་གད་སྙིགས་བླུགས་སའི་སྒོར་གཡུག་ནས་ཁོ་ཚོ་ནང་ལ་སོང་ནས་ཟ་ཁང་བསྐོལ་ནས་ལྷོད་ལྷོད་བསྡད་པ་རེད།སྤྱིར་ན་མི་སྒེར་དབར་ལ་རྡུང་རེས་རྒྱག་པ་ཡོད་ལ་གསོད་པའང་ཡོད་མོད།ཕར་ཕྱོགས་རྨས་པ་དང་བསད་པ་སོགས་ཀྱི་སྐབས་འཕྲལ་མར་སྨན་ཁང་དང་ཉེན་རྟོག་པར་ཁ་པར་གཏོང་དགོས་ཤིང་མྱུར་སྐྱོབ་ལ་གཞོལ་རྒྱུ་མ་མཐའི་ཆ་རྐྱེན་རེད།ཡིན་ནའང་།ལག་དམར་ཚོས་ཕུང་བོ་གད་སྙིགས་ཁང་བའི་སྒོར་གཡུག་ཏེ་ཟ་མ་བཟོས་ནས་ལྷོད་ལྷོད་ཀྱིས་བསྡད་པ་རེད།ཟ་ཁང་སྒོ་རྒྱབ་རྗེས་ཕལ་ཆེར་ཕུང་བོ་མཚོ་ནང་ལ་གཡུག་རྩིས་ཡིན་སྲིད་པ་རེད།སྟབས་ལེགས་པ་ལ་ཡུལ་མི་གཉིས་ཀྱིས་མཐོང་ཏེ་ཉེན་རྟོག་པར་ཁ་པར་བཏང་བ་རེད།རང་དབང་ལུང་བ་ནས་ཀྱང་ང་ཚོ་བོད་པ་མང་པོ་བོར་སོང་།དེ་དག་ཀྱང་འདི་ལྟར་བསད་ནས་འདི་ལྟར་སྦས་ཡོད་དམ་སྙམ་པའི་དོགས་པ་ང་ཚོར་ཡོད།ད་དུང་ས་གནས་གསར་འགྱུར་གྱི་ནང་དུ་རྒྱ་མི་ཞིག་གིས་རྒྱ་མི་ཞིག་བསད་པར་བྲིས་འདུག
རྒྱ་མི་ཞིག་གིས་རྒྱ་མི་ཞིག་བསད་པ་མ་རེད།རྒྱ་མི་ཞིག་གིས་བོད་མི་ཞིག་བསད་པ་རེད་ཅེས་ངུ་ཞོར་འགྲེལ་བརྗོད་བྱས་པར།ཉེན་རྟོག་པའི་མིག་ལའང་མཆི་མ་འཁོར་བ་དང་།ས་གནས་འདིར་ངོ་རྒོལ་བྱེད་པའི་ཐོབ་ཐང་ཁྱོད་ཚོར་ཡོད་པ་རེད།ས་གནས་གཞན་ལ་གནོད་པ་མ་གཏོང་བར་ཡུལ་ལ་ལོག་རོགས་ཞེས་བཤད་འདུག།ལག་དམར་ཚོའི་ཧམ་པ་ཚད་ལས་བརྒལ་ཞིང་།
ཚད་བརྒལ་གྱི་ཧམ་པ་དེར་བོད་པ་ཚོ་ཁོང་ཁྲོ་ལངས་པ་མ་ཟད།
ཡུལ་མི་ཚང་མ་ཁོང་ཁྲོ་ལངས་ཡོད་ཚོད་དེ།བོད་པ་ཚོས་ངོ་རྒོལ་བྱེད་པའི་ས་གནས་ཀྱི་མི་མང་གིས་ཀྱང་བོད་པ་ཚོར་དགའ་བསུ་བྱེད་ཀྱིན་པ་དང་འགྲེལ་བརྗོད་ལ་ཉན་ནས་ངུ་མཁན་ཡོད་འདུག།འདས་པོ་ཚུལ་ཁྲིམས་ལགས་ནི།༢༠༡༤ལོར་ཧྥ་རན་སིར་འབྱོར་བ་དང་།ཁོང་ནི་མི་དྲང་མོ་དྲང་རྐྱང་ཞིག་དང་བོད་མིའི་ལས་འགུལ་ཁག་ལ་ཧུར་ཐག་གིས་མཉམ་ཞུགས་བྱེད་མཁན་ཞིག་དང་།གྲོགས་པོ་ལྷན་འཛོམས་སོགས་ཀྱི་སྐབས་སུ།ལས་ཀ་ཚང་མ་ཁོང་གིས་ལས་མཁན་ཞིག་ཡིན་རབས་གླེང་སོང་།གྲོགས་པོ་མཉམ་འཛོམས་སོགས་ཀྱི་སྐབས་སུ་སྦི་རག་ཉུང་ཙམ་རེ་འཐུང་མཁན་ཞིག་ལས་དུས་རྒྱུན་ཆང་འཐུང་མཁན་ཞིག་ཀྱང་མིན།
ར་ཅུང་བཟི་ཡོད་ནའང་ཧ་ཅང་སྟོབས་ཆེན་ཞིག་ཡིན་པས་རྒྱ་མི་གཉིས་གསུམ་ཞིག་གིས་ལག་འཁེལ་ས་ཞིག་མིན་ཞེས་ཁོ་ལ་ཧ་ཅང་རྒྱུས་ཡོད་པའི་གྲོགས་པོ་ཞིག་གིས་ང་ལ་བཤད་སོང་།ཚེས་བཅུ་བཞི་ཉིན་གྱི་མི་མང་གི་ལས་འགུལ་དེ་གཞོན་སྐྱེས་དར་མ་ཚོ་རང་རང་ས་ནས་ལམ་ལ་ཆས་པ་ལས་དམིགས་བསལ་གྱི་སྒྲིག་འཛུགས་དང་ཇུས་བཀོད་ཡོད་པ་དེ་འདྲ་ཞིག་མ་རེད།ཁོང་ཚོས་ཀྱང་ས་གནས་སུ་སོང་ནས་སྨོན་ལམ་ཞིག་སྐྱོར་ཏེ་གནས་ཚུལ་དངོས་གང་ཡིན་ལ་རྒྱུས་ལོན་བྱེད་འདོད་པ་དེ་ཡིན་ཡང་།འདས་པོ་བསད་པའི་གནས་སུ་ད་དུང་ཁྲག་ཡོད་པ་དང་དེའང་གད་སྙིགས་བླུགས་སྒམ་གྱི་འཁྲིས་དང་གད་སྙིགས་ཁང་བའི་སྒོ་འགྲམ་ཡིན་པ་དེར་ཁོང་ཚོས་བཟོད་བསྲན་མ་ཐུབ་པར།ཟ་ཁང་གི་ཤེལ་སྒོ་དང་དཀར་ཡོལ་སོགས་ནང་ཆས་བཅགས་པ་དང་ལག་དམར་གྱི་རླངས་འཁོར་དང་ཟ་ཁང་གི་སྐྱེལ་འདྲེན་རླངས་འཁོར་གཉིས་ཁ་ལོ་བརྗེས་ནས་སྐད་འབོད་བྱས་འདུག།ཚེས་བཅུ་བདུན་ཉིན།ཧྥ་རན་སིའི་བོད་ཀྱི་ཚོགས་པ་ཁང་གིས་སྣེ་ཁྲིད་དེ་གོམ་བགྲོད་དཀར་པོའི་ལས་འགུལ་གཞི་རྒྱ་ཆེན་པོས་སྤེལ་བར་མི་ཁྲི་ལ་ཉེ་བ་འཛོམས་པས།ཧྥ་རན་སིའི་བརྒྱུད་ལམ་ཆེ་ཁག་མང་པོ་ནས་བོད་དོན་ཚ་གླེང་བྱས་འདུག
ཚེས་བཅོ་བརྒྱད་ཉིན་བསད་སའི་ས་གནས་སུ་དེ་མཚུངས་ལས་འགུལ་སྤེལ་བ་རེད།