གཉན།
ཨ་རབ་ཀྱི་གཟིག་ནག་དེ་ཐེངས་མ་དྲུག་ལ་བདའ་དགོས་བྱུང་།
ངས་ལྷ་སའི་ནང་མ་ཁང་ཞིག་ལ་སྒྲ་སྙན་གསར་བ་བཟོས།
ངས་སྙན་ངག་སྨྲ་བ་མདའ་བཙན་པོ་མཐོ་སྒང་གི་གཞི་བདག་ཞིག་ལ་ཆགས་བཞག
ངས་དོ་ཚིགས་དགུན་ཁར་སྡོང་བོ་ཆེན་པོ་གསུམ་གསོས།
ངས་ལོ་བརྒྱའི་སྔོན་གྱི་ནུ་བོ་རྙེད།
རྙེད་ནས་ཀྱང་འུ་གཉིས་ལག་ལྡང་སྦྲེལ་ནས་གཙང་བོར་ལྕགས་ཟམ་འཕངས།
ངས་ཨ་ཧྥན་ཏཱ་ཞེས་པའི་གློག་བརྙན་ནང་གི་བུད་མེད་དེ་རྒྱལ་མོ་ཚ་བ་རོང་ལ་ཁྲིད།
ངས་མ་བསམ་ས་ནས་གཞོན་ནུ་བློ་གྲོས་དང་ལྡན་པ་ཞིག་ལ་གྲོས་ཡང་ཡང་བྱས།
ངས་སྨན་བླ་སྐྱབས་ཀྱི་སྒེའུ་ཁུང་ཁ་ནས་ཁྱེད་ཀྱི་སྒེའུ་ཁུང་ལ་བལྟས།
ངས་གློ་རྡེག་ལ་མི་ཆ་མེད་ཁ་ཤས་ལ་སྙིང་གཏམ་བཤད་དགོས་བྱུང་།
ངས་དགེ་འདུན་ཆོས་འཕེལ་གྱི་སྐུ་པར་སྙིང་ལ་ཉར་དགོས་བྱུང་།
ངས་གྲོང་ཁྱེར་གྱི་ས་འོག་གི་སྟོར་ཁུང་ལ་སེམས་ཁུར་བྱས།
ངས་བོད་ཀྱི་ཡི་གེའི་མཆིན་པ་ལ་སེམས་ཁུར་བྱས།
ངས་ལོ་བཞི་འགོར་བའི་མཚན་མོ་ཞིག་ལ་ཞོགས་ལྗང་རྙེད།
ངས་པེ་ཏོ་ཧྥུན་གྱི་དབྱངས་ཡིག་ལས་སྒྲ་གདངས་ཤིག་ཁྱོད་ལ་ངོ་སྤྲོད་དགོས་བྱུང་།
ངས་ལམ་ཁ་ནས་ཡང་མི་ཆ་མེད་ཅིག་མཐོང་བྱུང་།
ངས་ཁྱུང་མཆུའི་སྨུག་པ་ཚང་མ་མི་ཆ་མེད་དེའི་ལག་ལ་བཞག
ངས་འཇིག་རྟེན་གྱི་སྤྲོ་སྐྱིད་ཚང་མ་ཤོ་ལོ་ཀ་གཅིག་གི་ནང་དུ་བཅུག