སློབ་སྦྱོང་ལ་འགྲན་སེམས་དོར་ཅིག

ཞོགས་ལྗང་།

ཞོགས་ལྗང་གཡས་ནས་རྩིས་པའི་གཉིས་པ།

སློབ་གསོ་གང་ཡིན་པ་ལ་ཕྱི་ནང་མཁས་པ་མང་པོས་བརྗོད་པ་ཕུན་སུམ་ཚོགས་པ་སྤེལ་ཡོད།བློ་གྲོས་དང་ལྡན་པ་དག་ཀྱང་ཅི་ནུས་ཀྱིས་ཞུགས་དང་འཇུག་གིན་འདུགཁོ་བོ་ཤེས་རབ་ཀྱི་མིག་དང་བྲལ་བ་ཞིག་གཏམ་སྤེལ་བའི་འོས་མེད་ཀྱང་།སྐབས་དང་སྐབས་སུ་རང་གི་བློ་ངོར་ཅི་ཤར་བ་དག་སྐལ་མཉམ་རྣམས་ལ་གྲོས་སུ་བཏབ་པ་ཡིན་ན་ནོངས་པའི་ཆ་ཅི་ཡོད་གསུངས་པར་མཛོད།

 མེས་པོ་བཀའ་དྲིན་ཅན་དག་གིས་རང་ཅག་ལའང་སློབ་སྦྱོང་གི་ལམ་གྱི་རིམ་པ་གང་མང་བསྟན་པ་ད་ལྟ་མཇལ་བའི་སྐལ་བ་ལྡན།སློབ་གསོ་རིག་པ་ཞེས་རིག་ཚན་བྱེ་བྲག་པ་ཞིག་མ་གྲུབ་ཀྱང་།བན་བོན་གྱི་རིག་པའི་གཞུང་དང་།དམངས་སྲོལ་གྱི་གཏམ་དཔེ་སོགས་སུ་སློབ་གསོའི་སྐྱ་ཐིག་རབ་དང་རིམ་པར་ཡོད།རང་ཅག་གི་གྲས་སུའང་སྒྲ་སྒྱུར་ལ་འཇུག་པ་རྐྱེན་པ་མང་ཙམ་གདའ་ཞིང་།སློབ་གསོའི་ལས་དོན་ལ་བློ་དཀར་བ་དེ་དག་གིས་ཚུར་བསྒྱུར་པའི་སློབ་གསོའི་སྐོར་གྱི་དེབ་ཀྱང་ཚོད་ཙམ་ཡོད།ལྷག་ཏུ་སྐད་གཉིས་མཁྱེན་པའི་གཞོན་སྐྱེས་དག་གཞན་གྱི་རིག་པའི་དགའ་ཚལ་ལ་མངོན་པར་འཇུག་པའི་སྐལ་བ་ལྡན་ན།གང་ལའང་མགོ་མ་ཚོས་པ་ཁོ་བོ་ལྟ་བུའི་གཏམ་ལ་ཆ་འཇོག་མི་འཕེར་ཡང་།འདི་ཙམ་ཡང་ཕྱི་རབས་དགའ་བའི་གསོས་སུ་འབུལ་ཐུབ་ན་བསོད་ནམས་ཀྱི་ཚོགས་རྒྱ་ཆེན་པོ་བསགས་པ་ཡིན་སྙམ་པའི་ལྷག་བསམ་གྱིས་ཕུལ་བ་ལགས།

ལོ་ངོ་འདི་དག་ལ།རང་གི་བུ་གཉོར་བའི་དགོས་དབང་གིས་ཕྱི་ནང་གི་སློབ་གསོའི་དེབ་ལེགས་སྐོར་ཞིག་ལ་མཇལ།ལྷག་ཏུ་བརྩེ་བའི་སློབ་གསོ་གཙིགས་སུ་བཟུང་བའི་དེབ་དག་གལ་ཆེན་དུ་བཟུང་ནས་བལྟས།བུ་ལའང་དེ་དང་དེ་ལྟ་བུའི་སློབ་གསོ་ཞིག་གཏོང་ཐུབ་ན་སྙམ་པའི་ཧམ་སེམས་ཀྱིས་ཞུགས་པ་ཡིན་མོད།གཅིག་ཏུ་རང་གིས་དེ་དོན་ལག་ཏུ་བསྟར་མ་ཤེས་པ་དང་།གཉིས་སུ་ཁོར་ཡུག་ངན་པའི་ཤུགས་རྐྱེན་གྱིས་བསམ་པ་ཆོས་བཞིན་མ་སོང་བར་སྐྱོ།ད་ལྟ་ཡིན་ནའང་།བྱམས་དང་བརྩེ་བ་གཙིགས་སུ་འཛིན་པའི་ཁུལ་ཡིན་མོད།ཕ་མ་དང་དགེ་རྒན་གྱི་བྱེད་ཐབས་གཅིག་ཏུ་མ་བབས་པ་དང་།ཁྱིམ་ཚང་དང་སྤྱི་ཚོགས་ཀྱི་ལམ་ཁ་སོ་སོར་སོང་བས་གཉན་ཕྲེང་ཤིན་ཏུ་མང་།

ཉིན་འདི་དག་ལ་ནད་ཡམས་ཀྱི་རྐྱེན་གྱིས་སློབ་གྲྭ་སོ་སོས་འཚོགས་མཚམས་བཞག་སྟེ་དྲྭ་ཐོག་སློབ་ཁྲིད་ལག་ཏུ་བསྟར་བས་བུ་དང་འབྲལ་མེད་དུ་སྡོད་དགོས་བྱུང་།བུ་དང་མཉམ་དུ་སློབ་ཁྲིད་ལ་ཉན་ཞིང་།བུ་དང་མཉམ་དུ་སློབ་སྦྱོང་བྱས།དུས་ལྟར་དྲྭ་ཐོག་ནས་ལས་བྱ་སྤྲོད་པ་དང་སྐྱོར་སྦྱོང་བྱེད་པ་སོགས་སྒྲ་གཟུགས་གང་རུང་ནས་བསྐུར་དགོས།སློབ་མ་དང་ཁྱིམ་བདག་རེ་འགའ་ནི་ཤིན་ཏུ་ཧུར་རྩོལ་གྱིས་འཇུག་ཅིང་།རེ་འགའ་ནི་སྒྱིད་ལུག་དྲྭ་ཐོག་སློབ་ཁྲིད་ལ་མི་ཞུགས་པའི་སློབ་མ་ཡང་རེ་འགའ་འདུག་སྟེ།ཁྱིམ་བདག་གིས་སྐད་བཞག་ནས་མཚེར་སར་བརྡ་རྟགས་མེད་པས་སློབ་ཁྲིད་ལ་ཞུགས་མི་ཐུབ་ཟེར།འདི་དང་འདི་ལྟ་བུ་དག་ལ་སུ་ཡང་བྱ་ཐབས་བྲལ།


དགེ་རྒན་རྣམས་ནི་དུས་ལྟར་སློབ་ཁྲིད་བྱེད་ཅིང་།གཅིག་ལས་གཅིག་གིས་ཤ་ཚ་ཚ་བྱེད།ལྷག་བསམ་གྱི་དབང་དུ་བྱས་ན་རང་ཡང་ཡིད་སྨོན་འཆོར།ཡིན་ནའང་།བྱེད་ཐབས་ཀྱི་ཐད་ལ་ད་རུང་བསམ་དགོས་པ་འདི་འདྲ་འདུག་སྟེ།སློབ་སྦྱོང་ལ་འགྲན་སེམས་བསྐྱེད་པ་འདོར་འོས།དགེ་རྒན་གྱིས་ནམ་ཞར་ཡང་སློབ་སྦྱོང་ལ་འགྲན་སེམས་དགོས་པ་བཤད་ཅིང་།ཁྱིམ་བདག་དང་སློབ་མ་རེ་འགའ་ཡང་དེ་ལ་འབད།གཅིག་ཏུ་ན།འདི་ཙམ་གྱིས་ཀྱང་སྐབས་སུ་སློབ་སྦྱོང་ལ་ཡར་བསྐྱེད་འབྱུང་བ་སྲིད་ཀྱང་།མཐར་སློབ་མ་དང་སློབ་མའི་བར་གྱི་འགྲན་སེམས་དེ་སློབ་སྦྱོང་གི་སྤྲོ་སེམས་ལ་མི་འགྱུར་བར།ཞེ་སྡང་དང་ཕྲག་དོགཁོང་ཁྲོ་སོགས་མི་དགེ་བའི་ལས་སུ་འགྱུར་སྲིད།རང་ཅག་གི་སློབ་གསོའི་ཐབས་ལམ་ནི་སློབ་སྦྱོང་ལ་སྤྲོ་ཤུགས་བསྐྱེད་པ་སྟེ།སྤྲོ་སྣང་སློབ་གསོ་ཡིན་འོས་ཀྱི།འགྲན་སེམས་དང་ཕྲག་དོག་གི་དྲི་མས་བསླད་པ་ཡིན་ན།ཇི་སྐད་དུ།རྗེ་གུང་ཐང་བསྟན་པའི་སྒྲོན་མེས།"ཀླད་ཆུང་རང་བཞིན་ངན་པ་ལ།།ཡོན་ཏན་ཡོད་ཀྱང་ཕན་མི་ཐོགས།།"གསུངས་པ་བཞིན་ནོ།།དེས་ན།བསམ་བཞིན་དང་བསམ་བཞིན་མ་ཡིན་པའི་སློབ་གསོའི་བྱེད་ཐབས་འདི་ཙམ་གྱིས་ཀྱང་མཇུག་འབྲས་བློ་ཡིད་ལས་འབྱུང་བར་བསམས་ཏེ།རྟ་ཁ་གཞན་དུ་དཀྱུ་བ་གལ་ཆེ།

རང་རེའི་ལམ་རིམ་སོགས་ན་སློབ་སྦྱོང་ལ་འགྲན་སེམས་དགོས་པའི་སྐོར་གནད་དུ་བཟུང་བ་མ་མཐོང་།དེ་ཡང་།སློབ་སྦྱོང་གི་དམིགས་ཡུལ་ནི་རང་ཉིད་ཡིན་གྱི་གཞན་ཉིད་མིན་པས་ཨེ་ཡིན་ནམ།སློབ་སྦྱོང་ནི་རང་དོན་ཡིན་གྱི་གཞན་དོན་མིན་པས།ནམ་ཡང་གཞན་ལ་བསྡུར་བའི་དགོས་པ་མེད།རང་དང་གཞན་བསྡུར་བ་དེས་སོ་སོའི་སེམས་ལ་མི་སྐྱིད་པ་འབྱུང་ཞིང་།ཕྲག་དོག་དང་འཁོན་སེམས་སོགས་ཀྱང་བསྐྱེད།རང་རེའི་གཞུང་ནས་ཕྲག་དོག་དང་ཁྲོ་བ།འཁོན་འཛིན་སོགས་ཉེ་ཉོན་ཉེར་བཞིའི་གྲས་སུ་བཞག་ཅིང་།འདོར་བའི་གནས་སུ་བཤད།ལྷག་ཏུ་ཁོང་ཁྲོ་རྩ་བའི་ཉོན་མོངས་དྲུག་ཏུ་བཞག་སྟེ་མ་རིག་པ་ཆེན་པོར་བརྩི།འགྲན་སེམས་ཀྱིས་ཉེས་ན་མཛའ་བརྩེ་ལྡན་པའི་སློབ་གྲོགས་ཕན་ཚུན་ཡང་དགྲ་རུ་འགྱུར་ཅིང་།སོ་སོ་ནམ་ཡང་ཁོང་ཁྲོ་དང་ཞེ་སྡང་གིས་འཚོ་བར་བྱེད།བདེ་ཐང་མིན་པའི་སེམས་ཁམས་ཟེར་བ་ཡང་འདི་ལས་གཞན་དུ་འཚོལ་དཀའ།

 

འགྲན་སེམས་སློབ་གསོ་འདི་རྒྱ་ནག་ལ་དར་ཆེ།ཁོ་ཚོས་དབང་ཆའི་མཐོ་དམའ་དང་།འབྱོར་བའི་བཟང་ངན།གདོང་གི་མཛེས་བཙོགཐ་ན་གྱོན་པའི་ཁ་དོག་ཚུན་ཆད་ལ་རང་རྒྱལ་གཞན་ཕམ་གྱི་སེམས་ཁམས་ཤུགས་ཆེར་འཛིན།ངན་ཤུགས་འདིས་སློབ་མའི་སློབ་སྦྱོང་ཚུན་ཆད་འགྲན་སེམས་ཀྱི་དབང་དུ་གྱུར་ཏེ།སེམས་གཅོང忧郁症སོགས་ཀྱི་ནད་རྟགས་སྣ་ཚོགས་ཐོན།རྒྱུས་ལོན་བྱས་པ་ལྟར་ན།ད་ལྟ་རང་རེའི་ཡུལ་ན་ཡང་ནད་རྟགས་འདི་རིགས་ཐོན་པའི་བྱིས་པ་ཤིན་ཏུ་མང་ཞེས་ཤེས་ནས་སྨྲ་བ་དག་གསུངས།

  

ཁོ་བོ་མཐོ་འབྲིང་སྐབས་ལ།རྩིས་རིག་དགེ་རྒན་གྱིས་རྒྱུགས་འབྲས་ལྟར་འཛིན་གྲྭ་ཡོངས་ཕྱོགས་གཉིས་སུ་བཀར།ཁོང་གི་དམིགས་ཡུལ་ཡང་སློབ་སྦྱོང་ལ་འགྲན་སེམས་བསྐྱེད་པ་ངེས་པར་ཡིན་མོད།ངེད་ཅག་ཕྱོགས་ཁག་ཏུ་ཆད་དེ་དགྲར་འཛིན་གྱི་སྣང་ཚུལ་བྱུང་ཞིང་།ད་ལ་ཐུག་གི་བར་དུ།སློབ་གྲོགས་ཕན་ཚུན་དབར་ནང་རྒྱུས་སྟོན་པའི་སྐབས་མ་བྱུང་།སེམས་བརྣད་པ་ལ་དེ་ལས་ཐུ་བ་ཞིག་མ་བྱུང་།འདི་ནི་ང་རང་དངོས་སུ་བརྒྱུད་པ་ཡིན་པས་བདེན་པའི་ཚད་དུ་བཟུང་ཆོག་གམ་སྙམ།

ཁོ་བོའི་ཤེས་ཚད་ཀྱི་དབང་གིས་ནུབ་ཕྱོགས་པར་སློབ་སྦྱོང་ལ་འགྲན་སེམས་བསྐྱེད་པའི་གཞུང་ཡོད་མེད་མ་ངེས་ཀྱང་།རང་གིས་བཀླགས་པ་དག་ལས་དོན་དག་ཅི་ཡང་བྱིས་པ་དང་བྱིས་པ་བསྡུར་བའི་སློབ་གསོ་ལ་དགག་པ་ཚ་ནན་གཏོང་གི་འདུག དེས་ན།ནུབ་ཕྱོགས་པས་འགྲན་སེམས་སློབ་གསོ་ལ་མཐོང་ཆེན་མི་བྱེད་པ་ཤ་སྟག་རེད་སྙམ་མོད།བདེན་པ་ཁུངས་སྐྱེལ་བྱེད་པར་མ་ནུས།རང་ཅག་གིས་སློབ་སྦྱོང་ནི་བརྩོན་འགྲུས་ཀྱི་རྗེས་སུ་འགྲོ་བར་གསུངས།དོན་ཅི་ཡང་བརྩོན་པ་དང་མ་བྲལ་བ་ཞིག་ལ་འབད་དགོས་པར་གསུངས།རྗེ་མི་ལ་སོགས་དཔའ་བོའི་ཚད་དུ་འཇོགའདིས་ཀྱང་རང་ཅག་རྣམས་སློབ་སྦྱོང་ལ་འགྲན་སེམས་མི་གསུངས་པ་ཤེས།

ཇི་སྐད་དུ།དབུ་མ་འཇུག་ལས།ཡོན་ཏན་མ་ལུས་བརྩོན་འགྲུས་རྗེས་འགྲོ་ཞིང་།།བསོད་ནམས་བློ་གྲོས་ཚོགས་ནི་གཉིས་ཀྱི་རྒྱུ།།བརྩོན་འགྲུས་གང་དུ་འབར་བར་གྱུར་པ་ཡི།།ས་དེ་བཞི་པ་འོད་ནི་འཕྲོ་བའོ།།ཞེས་གསུངས།ཡོན་ཏན་ཐམས་ཅད་བརྩོན་འགྲུས་ཀྱི་རྗེས་སུ་འགྲོ་ཞིང་།བརྩོན་འགྲུས་དང་མི་ལྡན་པའི་ཡོན་ཏན་འབྱུང་དཀའ།རང་ཅག་གི་དམ་པ་གོང་མ་རྣམས་དབེན་པའི་རི་ཁྲོད་ལ་བཞུགས།འདིས་ཀྱང་སློབ་སྦྱོང་ལ་བརྩོན་འགྲུས་བྱེད་པ་རང་དོན་འབའ་ཞིག་ཡིན་གྱི་གཞན་དང་འགྲན་པ་སོགས་མི་བྱེད་པ་རྟོགས།གཞན་དང་འགྲན་པའི་སེམས་བྱུང་དེར་རྒྱུན་ཐུང་།སྐབས་དང་སྐབས་སུ་རང་ཡང་གཞན་དང་དོ་བདོ་བ་ཞིག་བྱེད་སྙམ་ཡང་།རྟག་ཏུ་དེ་ལྟར་འབྱུང་དཀའ།རྟག་ཏུ་དེ་ལྟར་བྱེད་པ་དེས་བདེ་ཐང་གི་སེམས་ཁམས་མི་བསྐྱེད་པས།རང་ཅག་གི་ལམ་རིམ་ལ་སེམས་ཞི་བར་གནས་པ་ཤིན་ཏུ་གལ་ཆེ།སེམས་རང་སར་ཞི་བས་སློབ་སྦྱོང་སོགས་ལ་བརྩོན་སེམས་ཀྱིས་འཇུག་སླ་ཞིང་།ཞུགས་པ་དེ་ཡང་རྒྱུན་འཁྱོངས་ཤིང་རྣལ་དུ་གནས།

སློབ་སྦྱོང་ལ་སྤྲོ་སེམས་ཀྱིས་འཇུག་པ་དེའི་སེམས་ཞི་བར་གནས་ཐུབ།ནམ་ཡང་འགྲན་སེམས་ཀྱིས་དུས་འདའ་ཞིང་།རྒྱལ་ཕམ་གཙིགས་སུ་འཛིན་པ་དེའི་སེམས་གཅིག་ཏུ་མི་གནས།ཉོན་མོངས་པའི་སེམས་ཁམས་དེས་སློབ་སྦྱོང་གི་ངོ་བོ་ཕྱིན་ཅི་ལོག་ཏུ་འགྱུར་སྲིད།རེས་འགར་ཞེ་སྡང་ཆེན་པོས་སློབ་སྦྱོང་ལ་ཧུར་བརྩོན་གྱིས་འཇུག་སྲིད་ཀྱང་།དེ་དག་མཐའ་འཁྱོངས་པ་དཀའ།ཕ་རོལ་བོ་ལས་རྒྱལ་བའི་སྐབས་སུ་ངའོ་སྙམ་པའི་འདུ་ཤེས་འབྱུང་།ང་རྒྱལ་གྱིས་བརླགས་པའི་ལོ་རྒྱུས་ནི་རང་ཅག་གི་རྣམ་ཐར་དག་ན་ཤིན་ཏུ་མང་།དེས་ན།དམ་པ་གོང་མ་དག་གིས་བརྩོན་འགྲུས་ལ་འགྲན་སེམས་མ་གསུངས་པའི་རྒྱུ་མཚན་ཤིན་ཏུ་གསལ།

རང་ཅག་རྣམས་ཉམས་མྱོང་གི་ཁྲོད་ནས་བསླབ་བྱ་ལེན་ཞིང་།མཁས་པ་སྔ་མ་དག་གི་གསུངས་ལས་ལེགས་བཤད་ལེན་པར་བྱེད་ན།དྲི་མ་ཅན་གྱི་བྱེད་ཐབས་དག་འདོར་བའི་གནས་སུ་རྟོགས་དགོས།རང་གི་རིག་གནས་ཡ་མཚན་དུ་བཤད་པ་ལོང་བའི་འུར་གཏམ་ལྟ་བུ་སྒྲོག་པ་ལས།འདི་ཙམ་བཏུས་ཏེ་བགྲོས་ནས་སྤྱོད་པ་གལ་མི་ཆེའམ།རིགས་ཀྱི་བུ་དང་རིགས་ཀྱི་བུ་མོ་རྣམས།གུས་པ་ནི་ཤེས་རབ་དང་བྲལ་བས་ཕྱིན་ཅི་ལོག་ཏུ་བཤད་པ་སོགས་ཡོད་ན། ཐུགས་སུ་བཏེགས་ནས་ལེགས་པར་གསུངས་ཤིག