The Dalai Lama with Prime Minister Narendra Modi.
ཉེ་སྔོན་ཕྱི་ཟླ་༧ཚེས་༡ཉིན་བོད་ཀྱི་དབུ་ཁྲིད་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཁྲུངས་སྐར་དང་འབྲེལ།རྒྱ་གར་གྱི་སྲིད་བློན་མོ་དྷི་དང་ཨ་རིའི་ཕྱི་སྲིད་དྲུང་ཆེ་ཨན་ཐོ་ནེ་བྷི་ལན་ཁན(AntonyBlinken)གཙོའི་འཛམ་གླིང་གི་དབུ་ཁྲིད་དང་སྲིད་དོན་པ་མང་པོས་འཁྲུངས་སྐར་གྱི་འཚམས་འདྲི་གནང་ཡོད་པ་དེས།ཁོང་ཉིད་ཀྱི་འཁྲུངས་སྐར་དེ་བཞིན་རྒྱལ་སྤྱི་རང་བཞིན་གྱི་དོ་སྣང་བྱེད་ས་གལ་ཆེན་ཞིག་ཆགས་རྗེས།རྒྱ་ནག་གཞུང་འབྲེལ་གོ་ལའི་དུས་བབ་ཟེར་བའི་རྩོམ་སྒྲིག་པ་ཧོ་ཞི་ཇན(HuXijin)ཟེར་བ་དེས།ཕྱིའི་རྒྱལ་ཁབ་ཁག་གིས་ཏཱ་ལའི་བླ་མའི་འཁྲུངས་སྐར་ལ་འཚམས་འདྲི་བྱས་པ་ནི་ཁོ་རང་ཚོའི་རང་མདོག་ཙམ་ལས།གཡོ་ཐབས་ཆུང་ཆུང་དེ་རིགས་ཀྱིས་རྒྱ་ནག་ལ་ཤུགས་རྐྱེན་གང་ཡང་སྤྲོད་མི་ཐུབ་སྐོར་བྲིས་འདུག
དེ་འབྲེལ་རྩོམ་ཡིག་ཟེར་བའི་ནང་ཧོ་ཞི་ཇན་ཟེར་བ་དེས་ངས་ཅུང་མིན་ན་ཏཱ་ལའི་བླ་མ་བརྗེད་འགྲོ་བཞིན་འདུག་ལ།ཕྱིའི་རྒྱལ་ཁབ་ཁག་གི་གསར་ཁང་ཚོས་མོ་དྷི་དང་ཨ་རིའི་ཕྱི་སྲིད་དྲུང་ཆེས་འཚམས་འདྲི་བྱས་པ་དེས།ཨ་རི་དང་རྒྱ་ནག་གི་འབྲེལ་ལམ་དང་རྒྱ་གར་དང་རྒྱ་ནག་གི་གནས་བབ་འགལ་ཟླ་ཆེ་རུ་འགྲོ་བཞིན་པའི་རྟགས་མཚན་ཡིན་སྐོར་བརྗོད་ཡོད་པ་དང་།ཨ་རི་དང་རྒྱ་གར་རྒྱ་ནག་བར་གྱི་ད་ལྟའི་འགལ་བ་ཛ་དྲག་ཆེན་པོར་གྱུར་ཡོད་ན་ཡང་།གནད་དོན་དེ་ཙམ་ཞིག་གིས་འགལ་ཟླའི་རྟགས་མཚན་ཅི་ཞིག་སྟོན་གྱིན་ཡོད་དམ།ཁོ་ཚོས་བྱ་སྤྱོད་དེ་རིགས་ནི་དོན་དངོས་སུ་རྒྱ་ནག་ལ་འཛིན་པའི་རྣམ་འགྱུར་མངོན་ཆེད་ཡིན་ནམ།གཡོ་ཐབས་ཆུང་ཆུང་འདི་ཙམ་ཞིག་གིས་དོན་དངོས་སུ་རྒྱ་ནག་ལ་ཤུགས་རྐྱེན་ཅི་ཡང་འབྱུང་མི་ཐུབ་པ་དང་།ཨ་རི་དང་ཉི་ཧོང་།ཨོ་གླིང།རྒྱ་གར་སོགས་རྒྱལ་ཁབ་དེ་དག་དེ་སྔ་ནས་རྒྱ་ནག་དང་འགལ་བ་བྱུང་ཡོད་པ་རེད་ལ།ཁོ་ཚོ་ནམ་རྒྱུན་འདི་འདྲའི་གཡོ་ཐབས་ཆུང་ཆུང་ཙམ་རྩེད་ནས་ཁོ་ཚོའི་རིན་ཐང་སྟོན་རྒྱུར་དགའ་བ་རེད།ཅེས་བཀོད་འདུག
ཡང་གནས་ཚུལ་ནང་མུ་མཐུད་ཁོ་ཚོར་མུ་མཐུད་དེ་ལྟར་བྱེད་བཅུག་རོགས།རྒྱ་ནག་གིས་ནམ་རྒྱུན་མཛའ་བརྩེའི་ངང་ཁོ་ཚོ་དང་གྲོགས་པོའི་འབྲེལ་བ་བྱེད་བཞིན་ཡོད་པ་རེད་ལ།གནད་དོན་དེས་ཁོ་ཚོས་གྲོགས་པའི་མཛའ་བརྩེའི་རིན་ཐང་ལ་འཛིན་པའི་རྣམ་འགྱུར་ཞིག་མཚོན་གྱི་ཡོད་པ་རེད།ཕྱོགས་ཡོངས་ཀྱི་འབྲེལ་བ་ཇེ་ངན་དུ་སོང་བ་དང་བསྟུན་ནས་ང་ཚོས་ཁོ་ཚོའི་ཡོངས་ཁྱབ་ཀྱི་ཐ་ཤལ་གྱི་བྱེད་སྟངས་མང་པོ་ཞིག་མཐོང་བྱུང་།རྒྱུ་མཚན་མང་པོ་ཞིག་གི་ཐད་ནས་ང་ཚོས་གནད་དོན་དེ་རིགས་ལ་དོ་ནན་པོས་ཡ་ལན་སློག་དགོས་མེད་པ་རེད།ངས་སྔོན་ཆད་རྒྱ་ནག་གི་དཔོན་རིགས་ཚོས་ཕྱིའི་འཁྲུག་རྐྱེན་ལ་ཡ་ལན་སློག་སྐབས་ངོས་གཅིག་ཅན་ལྟ་བུ་ཞིག་མཐོང་བཞིན་ཡོད་ན་ཡང་།ད་ལྟ་ང་ལ་ཡིད་ཆེས་ཡོད་པ་ནི་ངོས་གཅིག་ཅན་གྱི་བྱེད་སྟངས་དེ་ཧ་ཅང་ཡག་པོ་འདུགཕྱི་ཕྱོགས་སྟོབས་ཤུགས་གང་གིས་ཀྱང་ཏཱ་ལའི་བླ་མའི་རྩེད་མོ་རྩེ་ན་ཡང་།གནད་དོན་མང་ཆེ་བའི་སྐབས་རྒྱ་ནག་གིས་ཁོ་ཚོས་བེད་མེད་ཀྱི་རེ་བར་བདག་པོ་བརྒྱབ་མེད་སྐོར་བརྗོད་འདུག
གནས་ཚུལ་ཟེར་བ་དེའི་མཇུག་ཏུ་ཨ་རི་དང་རྒྱ་ནག་གཉིས་ལ་མཚོན་ན།ཁོ་ཚོས་ནམ་རྒྱུན་ཆེས་སྒྲུབ་ཐུབ་པ་ནི་ཁ་ནས་སྟོང་བཤད་ཙམ་ལས་དོན་དངོས་ལག་ལེན་དང་མི་འཚམ་པ་དེ་རེད་ལ།འདས་པའི་ལོ་ཤས་ནང་རྒྱ་ནག་ལ་ཐོབ་པའི་རྒྱལ་ཁ་ནི་འཁྲུག་རྩོད་གང་གི་སྐབས་སུ་རྒོལ་ལན་སློག་པ་ཙམ་མ་ཡིན་པར།དོན་དངོས་གཞིར་བཟུང་ནས་ནན་ཏན་གྱིས་ལག་ལེན་དངོས་ཀྱི་བྱ་སྤྱོད་སྤེལ་བ་དེ་ཡིན་པ་དང་།ད་ལྟ་རྒྱ་ནག་གི་ལྷོ་ནུབ་ཕྱོགས་ཀྱི་བོད་རང་སྐྱོང་རྗོངས་ནི་སྔར་ལས་ཇེ་ལེགས་སུ་འགྲོ་བཞིན་ཡོད་པ་མ་ཟད།ས་ཁུལ་དེར་ལྕགས་ལམ་དང་གཞུང་ལམ་ཐོག་མཐའ་བར་གསུམ་དུ་ཤར་གཏོང་ཐུབ་ཡོད་པ་རེད་ལ།བོད་ལྗོངས་ནི་ཡུལ་གྱར་སྲིད་གཞུང་ཡོད་པའི་དྷ་རམ་ས་ལ་དང་བསྡུར་ན་གོ་ལ་གཞན་ཞིག་དང་འདྲ་བོ་ཡོད་པ་རེད།ཁྱད་པར་མངོན་གསལ་དོད་པོ་དེ་འདྲའི་རྐྱེན་གྱིས་ཕྱི་ཕྱོགས་ཀྱི་སྟོབས་ཤུགས་མཐའ་དག་ཕམ་ཉེས་སུ་ཕྱིན་ནས་ཏཱ་ལའི་བླ་མས་མཚོན་པའི་ངོ་ལོག་པའི་རུ་ཚོགས་ཟད་འགྲོ་བཞིན་ཡོད་སྐོར་སོགས་བཀོད་འདུག