མང་རྒྱན།
དུས་རབས་བཅོ་བརྒྱད་པ་དང་བཅུ་དགུ་བའི་དབྱིན་ཇི་དང་ཧྥ་རན་སི་སོགས་སུ་སྒྲུང་གཏམ་རིང་གྲས་ཀྱིས་མཚོན་པའི་རྩོམ་རིག་གི་རླུང་རྟ་རབ་ཏུ་རྒྱས་མྱོང་བ་རེད། དུས་རབས་ཉི་ཤུའི་ལོ་རབས་བརྒྱད་ཅུ་བའི་ནང་དུ་ཀྲུང་གོའི་རྒྱ་ནང་སློབ་ཆེན་ཁག་ཏུ་སྙན་ཚིག་ཐན་ཐུན་རེ་འབྲི་ཤེས་ན། ན་ཆུང་མ་ཚོའི་སེམས་ནང་གི་གྲགས་སྐར་ལྟ་བུར་གྱུར་ཏེ་ཚུར་མཛའ་འཕྲིན་བསྐུར་བའི་སྣང་ཚུལ་ཡང་ཡོད་མྱོང་ལ། བོད་ཡུལ་དུ་ཡང་དུས་རབས་སྔོན་མའི་མཇུག་དང་དུས་རབས་འདི་ཡི་མགོ་ཚུགས་པའི་བར་གླགས་དེར། ན་གཞོན་ཡི་གེ་ཤེས་མཁན་ཚང་མས་ཇ་ཁ་ཆང་ཁ་གང་སར་རྩོམ་རིག་གླེང་བའི་ཚ་རླབས་ཤིག་ཀྱང་འཕྱུར་མྱོང་། ཡིན་ནའང་། ཕྱིས་སུ་གློག་བརྙན་དང་བརྙན་འཕྲིན་དང་། དྲ་རྒྱ་དང་ཁ་པར་སོགས་རིམ་གྱིས་དར་ཞིང་། དངོས་པའི་མཐུན་རྐྱེན་ཇེ་བཟང་དང་སྤྱི་ཚོགས་ཀྱི་གོམ་སྟབས་ཇེ་མགྱོགས། ཆ་འཕྲིན་གྱི་ལམ་བུ་ཇེ་ཡངས། རོལ་རྩེད་ཀྱི་རྣམ་གྲངས་ཇེ་མང་། ཆེད་ལས་ཀྱི་དབྱེ་བ་ཇེ་ཞིབ་ཏུ་སོང་བ་དང་བསྟུན་ནས། རྩོམ་རིག་ཞེས་པ་སྤྱིར་བཏང་གི་ལས་རིགས་ཤིག་དང་།རྩོམ་པ་པོ་ཟེར་བ་ཡང་སྤྱིར་བཏང་གི་མི་ཚོགས་ཤིག་ལས། དམིགས་བསལ་ཁྱད་དུ་འཕགས་པ་ཞིག་ཏུ་མཐོང་མཁན་ཉུང་ལ། འགྲན་རྩོད་ཆེ་བའི་སྤྱི་ཚོགས་འདིའི་ནང་དུ་དབང་ཤུགས་དང་ཐོབ་ཐང་། རྒྱུ་ནོར་དང་སྙན་གྲགས་སོགས་གང་ཐད་ནས་མི་ཚོགས་དེ་ག་ལེར་བས་མཐར་ཤུད་ཀྱིན་པའི་སྒང་ཞིག་རེད། མདོར་ན་ཡོད་ཚད་ཕྱིའི་སྤྱི་ཚོགས་ཁོར་ཡུག་འགྱུར་བའི་བསྐྱེད་འབྲས་སོ།།
དེ་བས། བོད་ཀྱི་སྙུ་གུ་ཐོགས་མཁན་དང་མཐེབ་གཞུང་འཛིན་མཁན་མང་པོ་ཞིག་གིས་ད་དུང་ལན་རེར་མཚར་སྡུག་འོད་སྟོང་འབར་བའི་སྔོན་ཆད་དྲན་ཞོར།
ད་ལྟ་བར་འཁང་ར་དང་མ་འོངས་པར་རེ་བ་འཆང་འདུག་མོད། དོན་དམ་པར་འཇིག་རྟེན་འདིའི་ཡོད་ཚད་མི་རྟག་པ་རེད།
དུས་རབས་འགྱུར་ཚར་བ་རེད། མིའི་རིགས་ཀྱི་སྤྱི་ཚོགས་ནི་མདུན་ནས་མདུན་བ་ལས་སྔོན་གྱི་དུས་སྐབས་དེ་འདྲར་ཕྱིར་ལྡོག་གི་མ་རེད།
ཁ་སང་དེ་རིང་གི་དུས་རབས་འདི་ཚན་རྩལ་དང་དཔལ་འབྱོར་གྱིས་མཚོན་པའི་རྩིས་ཚན་གྱི་ཆེད་ལས་སྦྱོང་མཁན་དེ་ཚོས་ཁ་ལོ་བསྒྱུར་གྱིན་པ་གསལ་བོ་རེད།
རྗེས་ཕྱོགས་ཇི་འདྲར་འགྱུར་མིན་སུས་ཤེས། གང་ལྟར་མིག་སྔའི་སྤྱི་ཚོགས་ནང་རྩོམ་རིག་ཟེར་བ་ཡང་སྤྱིར་བཏང་ཞབས་ཞུའི་ལས་རིགས་ཤིག་ལས་མ་འདས་ལ།
རྩོམ་པ་པོ་ཞེས་པ་ཡང་ལས་རིགས་དེར་གཅིག་མཐུན་གྱི་སྤྲོ་བ་ལྡན་པའི་མི་ཚོགས་ཤིག་ལས་མ་འདས།
དེང་རབས་ཀྱི་སྤྱི་ཚོགས་ལ་ཆེད་ལས་དང་ལས་རིགས་མཐའ་ཡས་པ་ཞིག་ཡོད། དེ་དག་ཚང་མར་སོ་སོའི་ཁྱབ་ཁོངས་སུ་རང་རང་གི་གྲུབ་འབྲས་དང་རིན་ཐང་རེ་བགྲང་རྒྱུ་ཡོད།
དགོས་མཁོ་དང་འདོན་སྤྲོད་ཀྱི་ཆོས་ཉིད་ལྟར། ལས་རིགས་མི་འདྲ་བ་སྣ་ཚོགས་བར་ལས་བགོ་དང་མཉམ་འབྲེལ་གྱི་ངང་ནས་ཕན་ཚུན་ལ་ཞབས་འདེགས་ཞུ་རེས་བྱེད་པ་ཙམ།
མཐར་གཏུགས་ན་དེང་སང་སུས་ཀྱང་སུ་ལ་ཡང་དག་ལམ་སྟོན་དང་། བླ་སྲོག་བྱབས་ཁྲུས་སོགས་བྱེད་ཐུབ་ནི་མ་རེད།
ད་དུང་དེ་ལྟར་རློམ་མཁན་ཡོད་ན་དགོད་བྲོ་བའི་ཡུལ་རེད།
དེ་བས། ལུས་པོ་སྦྲེལ་དྲའི་དུས་རབས་སུ་འཚོ་ཡང་སེམས་པ་དུས་དེབ་ཀྱི་དུས་རབས་སུ་ལུས་ཡོད་པའི་མི་དེ་རིགས་ཀྱིས་ཀྱང་།
ག་ལེར་སོ་སོ་རང་གི་བསམ་བློའི་འཛིན་སྟངས་ལ་དུས་ཀྱི་འགྲོས་དང་བསྟུན་ནས་འགྱུར་བ་རེ་གཏོང་དགོས་པ་མིན་འགྲོ་སྙམ།
གང་ལྟར། འཐད་ཀྱང་མ་འཐད་རུང་། དེ་ནི་དུས་ཚོད་སྔ་ཕྱིའི་ཁྱད་པར་ཙམ་མོ།
འདི་ནི་རང་ཉིད་དང་དགའ་ཕྱོགས་མཐུན་པ་རྣམས་ལ་གསལ་འདེབས་ཙམ་དུ་བྲིས།