ཐའེ་ཝན་དུས་བབ་གསར་ཁང་སོགས་ཀྱིས་སྤེལ་བཞིན་པའི་གནས་ཚུལ་ལྟར་ན།
ཁ་སང་ཕྱི་ཚེས་ ༡ ཉིན་ནས་ཐའེ་ཝན་གྲོས་ཚོགས་ཀྱི་ཚོགས་འདུ་མགོ་ཚུགས་པ་དང་བསྟུན། ཐའེ་ཝན་རང་བཙན་རྒྱལ་ཁབ་ཅིག་ལ་ངོས་འཛིན་བྱེད་མཁན་ཆབ་སྲིད་ཚོགས་པ་ཁག་གི་འཐུས་མི་
༥༧ ལྷག་གིས། ཐའེ་ཝན་གྱི་རྒྱལ་རྟགས་དང་རྒྱལ་དར་དེ་དག་གོ་མིན་ཏང་གི་སྐབས་སུ་བྱུང་བས་ད་ལྟའི་ཐའེ་ཝན་གྱི་ཚབ་མཚོན་མི་ཐུབ་པ་དང་། དེ་བཞིན་ཐའེ་ཝན་རྒྱལ་གླུའི་ཁྲོད་དུ་རྒྱ་ནག་སྐམ་ས་ཆེན་མོ་དང་མཉམ་གནས་དགོས་སྐོར་བརྗོད་པ་སོགས་རྩ་ཁྲིམས་ནས་འགྱུར་བཅོས་གཏོང་དགོས་པའི་བསམ་ཚུལ་ཤུགས་ཆེར་བཏོན་ཡོད་འདུག
གནད་དོན་དེའི་སྐོར་ལ་བསམ་འཆར་འདོན་མཁན་གྲོས་ཚོགས་འཐུས་མི་ཚོས།
སྲིད་གཞུང་གིས་ཤུགས་སྣོན་བརྒྱབ་ནས་གནད་དོན་དེ་དག་ལ་འགྱུར་བཅོས་གཏོང་དགོས་པའི་དུས་ལ་བབ་ཡོད་པ་དང་།
གལ་ཏེ་ཐའེ་ཝན་དེ་བཞིན་ཚད་ལྡན་གྱི་རྒྱལ་ཁབ་ཅིག་ཆགས་དགོས་ན། ཐའེ་ཝན་གོ་མིན་ཏང་སྐབས་ཀྱི་མཚོན་རྟགས་དེ་དག་འགྱུར་བ་མི་གཏོང་ག་མེད་ཆགས་ཡོད་སྐོར་བརྗོད་ཡོད་པ་དང་།
བསམ་ཚུལ་འདོན་མཁན་དམངས་གཙོ་ཡར་སྐུལ་ཚོགས་པའི་འཐུས་མི་(Chen Ting-fei)ལགས་ནས། ད་ལྟ་ཐའེ་ཝན་གྱི་རྩ་ཁྲིམས་དེ་བཞིན་དུས་ཚོད་ཡོལ་ཟིན་པ་ཞིག་ཆགས་ཡོད་པ་དང།
ཐའེ་ཝན་རྩ་ཁྲིམས་ནང་རང་བཞིན་གྱིས་ཐའེ་ཝན་དེ་རྒྱ་ནག་གི་ཆ་ཤས་ཡིན་པར་ཁས་བླངས་ཡོད་སྐོར་སོགས་བརྗོད་འདུག
བསམ་འཆར་དེ་དག་འདོན་མཁན་ཁྲོད་ཐའེ་ཝན་དམངས་གཙོ་ཡར་སྐུལ་ཚོགས་པ་དང་།
ཐའེ་ཝན་སྟོབས་ཤུགས་གསར་བའི་ཚོགས་པ། ས་གནས་འཛུགས་སྐྲུན་ཚོགས་པ་སོགས་ཀྱི་འཐུས་མི་ཡོད་པ་དང་།
གོ་མིན་ཏང་ཚོགས་པས་གནད་དོན་དེ་ནི་ཐའེ་ཝན་ནང་ཁུལ་མཐུན་སྒྲིལ་མེད་པ་གཏོང་བྱེད་ཡིན་སྐོར་བརྗོད་ནས་ངོས་ལེན་བྱས་བཞིན་མེད་པ་དང་།
ཐའེ་ཝན་ཀྱི་སྲིད་དོན་དབྱེ་ཞིབ་པ་མང་པོས་རྩ་ཁྲིམས་ལ་འགྱུར་བཅོས་གཏོང་རྒྱུའི་བསམ་འཆར་དེ་ནི་ལེགས་འགྲུབ་བྱུང་མི་ཐུབ་པ་ལྟ་བུ་ཞིག་ཡིན་ཡང་།
སྤྱི་ཡོངས་ནས་བསམ་འཆར་དེ་རིགས་རྒྱ་ནག་དང་ཁ་གཏད་གཅོག་འདོད་ཀྱི་འགུལ་སྐྱོད་ཆེན་པོ་ཞིག་དང་།
ཐའེ་ཝན་རྒྱ་ནག་དང་ཐ་དད་ཀྱི་ཕྱོགས་སུ་འགྲོ་ཐབས་ཀྱི་ལམ་ཁ་གལ་ཆེན་ཞིག་ཡིན་པར་ངོས་འཛིན་བྱེད་བཞིན་ཡོད་འདུག
འདས་པའི་ལོ་ཤས་ནས་བཟུང་ཐའེ་རྒྱ་གཉིས་ཀྱི་འབྲེལ་ལམ་སྡུག་ཏུ་ཕྱིན་པ་དང་བསྟུན།
ཐའེ་ཝན་གྲོས་ཚོགས་དང་མི་མང་ཁྲོད་ཐའེ་ཝན་མཚོ་འགག་དེ་བཞིན་རྒྱ་ནག་སྐམ་ས་དང་ཁྱོན་ཡོངས་ནས་འབྲེལ་མེད་བཟོས་ཏེ།
ཐའེ་ཝན་དེ་རང་དབང་རང་བཙན་གྱི་རྒྱལ་ཁབ་ཅིག་ལ་འགྱུར་རྒྱུའི་བསམ་ཚུལ་ཤུགས་ཆེར་འབྱུང་བཞིན་ཡོད་པ་མ་ཟད།
འདི་ལོ་ནས་རྒྱ་ནག་གཞུང་གིས་ཐའེ་ཝན་མཚོ་འགག་ལ་དྲག་དམག་གིས་ཉེན་བརྡ་རིམ་པར་གཏོང་བཞིན་ཡོད་པ་དང་།
ཕྱི་ལོ་ ༢༠༢༡ ལོའི་ཟླ ༡ ནས་བཟུང་རྒྱ་ནག་གཞུང་གིས་ཐའེ་ཝན་རང་བཙན་གྱི་དོན་ནི་དམག་འཁྲུག་ཡིན་སྐོར་བརྗོད་ནས།
ཉིན་ལྟར་ཐའེ་ཝན་མཚོ་འགག་ལ་དམག་གི་སྦྱོང་བརྡར་བྱེད་བཞིན་ཡོད་འདུག
རྒྱ་ནག་གི་ཉེན་བརྡ་དང་གང་བྱུང་འཇིགས་སྐུལ་ཐབས་དེས་ཐའེ་ཝན་མཚོ་འགག་དང་རྒྱ་ནག་གི་འབྲེལ་ལམ་ཡག་པོ་ཆགས་ཀྱི་མེད་པར།
ཐའེ་ཝན་ནང་རྒྱ་ནག་དང་ཐ་དད་ཀྱི་བསམ་ཚུལ་འདོན་མཁན་བརྒྱ་ཆ་མང་རུ་འགྲོ་བཞིན་ཡོད་པ་མ་ཟད།་འདི་ལོའི་སྔར་ལོ་ནས་བཟུང་ཐའེ་ཝན་གཞུང་གིས་ཐའེ་ཝན་མི་སེར་གྱི་ཕྱི་སྐྱོད་མཐོང་མཆན་སོགས་ཀྱི་ཡི་གེ་རིགས་བརྗེ་བོ་བརྒྱབ་ནས།
རྒྱ་ནག་དང་འབྲེལ་བ་མེད་པའི་ཕྱོགས་སུ་སྐྱོད་ཐབས་བྱེད་བཞིན་ཡོད་པ་རེད།