འབར་མ་དམག་གཞུང་གིས་གཞུང་འཛིན་དམངས་གཙོ་ཚོགས་པའི་སྲིད་དོན་མགོ་འཁྲིད་ཁག་ཅིག་འཛིན་བཟུང་བཙན་ཁྲིད་དང་སྲིད་དབང་དམག་དཔུང་གི་མགོ་འཁྲིད་ལ་རྩིས་སྤྲོད་བྱ་རྒྱུ་ཡིན་སྐོར་བསྒྲགས་འདུག
དེ་རིང་ཕྱི་ཟླ་ ༢ ཚེས་ ༡ ཉིན། བྷེ་བྷེ་སི་གཙོའི་རྒྱལ་སྤྱིའི་གསར་ལམ་ཁག་ཏུ་སྤེལ་བའི་གནས་ཚུལ་ལྟར་ན། འབར་མ་དམག་གཞུང་གིས་སྔར་ལོའི་འོས་བསྡུ་དང་འབྲེལ་མགོ་སྐོར་བཏང་ཡོད་སྐོར་བརྗོད་ནས། ཡུལ་དེའི་དམངས་གཙོ་ཚོགས་པའི་མགོ་འཁྲིད་ཨན་སན་སའོ་ཅའེ(Aung San Suu Kyi)དང་སྲིད་བློན(Win Myint)བཅས། འབྲེལ་ཡོད་སྲིད་དོན་མགོ་འཁྲིད་ཁག་ཅིག་འཛིན་བཟུང་བཀག་ཉར་བྱས་ཡོད་པ་མ་ཟད། སྲིད་གཞུང་གི་དབང་ཆ་ལོ་གཅིག་རིང་དམག་དཔུང་གི་མགོ་འཁྲིད་(Min Aung Hlaing)ལག་ཏུ་རྩིས་སྤྲོད་བྱ་རྒྱུའི་གསལ་བསྒྲགས་བྱས་འདུག
དེ་འབྲེལ་གནད་དོན་ཐད་གཞུང་འཛིན་དམངས་གཙོ་ཚོགས་པའི་མགྲིན་ཚབ་པས།
དེ་རིང་སྔ་དྲོར་ལྕམ་ཨན་སན་སའོ་ཅའེ སྲིད་བློན་སོགས་དམག་གཞུང་གིས་འཛིན་བཟུང་བཙན་འཁྲིད་བྱས་ཡོད་སྐོར་བརྗོད་ཡོད་པ་དང་།
དམག་གཞུང་གིས་ཀྱང་ཁོ་ཚོའི་སྟངས་འཛིན་འོག་ཡོད་པའི་བརྙན་ལམ་བརྒྱུད། དམངས་གཙོ་ཚོགས་པའི་མགོ་འཁྲིད་དེ་དག་གིས་སྔར་ལོའི་འོས་བསྡུའི་ཁྲོད་མགོ་སྐོར་བཏང་ཡོད་སྟབས།
སྲིད་གཞུང་གི་དབང་ཆ་དམག་མིར་རྩིས་སྤྲོད་ཀྱི་ཛ་དྲག་གསལ་བསྒྲགས་བཏང་ཡོད་སྐོར་བརྗོད་འདུག
ད་ལྟའི་ཆར་འབར་མའི་རྒྱལ་ས་གཙོའི་ཉེ་འཁོར་གྲོང་ཁྱེར་མང་པོར་དམག་དཔུང་འགྲེམས་འཇོག་དང་།
ཡུལ་དེའི་ནང་དྲ་ལམ་དང་ཁ་པར་གྱི་སྐུད་ལམ་ཚང་མ་མེད་པ་བཏང་བ་སོགས། དམག་གཞུང་གིས་ཕྱོགས་ཡོངས་ནས་དམ་དྲག་བྱ་རྒྱུའི་བཀོད་བྱུས་འཐེན་བཞིན་ཡོད་འདུག
རྒྱལ་སྤྱིའི་སྟེང་ཐེངས་འདིར་འབར་མ་དམངས་གཙོ་ཚོགས་པའི་མགོ་འཁྲིད་ཁག་འཛིན་བཟུང་བཀག་ཉར་བྱས་པར་སྐྱོན་བརྗོད་ཡོང་གི་ཡོད་པ་དང་།
ཨ་རིའི་སྲིད་གཞུང་གི་གསར་བའི་ཕྱི་སྲིད་དྲུང་ཆེ་ཨན་ཊོ་ནའེ(antony blinken)ནས། འབར་མ་དམག་གཞུང་གིས་འཛིན་བཟུང་བྱས་པའི་མགོ་འཁྲིད་ཚང་མ་མྱུར་དུ་ཀློད་གྲོལ་དགོས་པ་དང་།
ཨ་རི་དུས་ནམ་ཡང་འབར་མ་མི་མང་དང་ཁོ་ཚོའི་དམངས་གཙོའི་རེ་འདུན་དང་། འབར་མའི་རྒྱལ་ནང་གི་རང་དབང་དང་ཞི་བདེ་མཉམ་དུ་ཡོད་སྐོར་བརྗོད་ཡོད་པ་དང་།
དེ་བཞིན་ཨོ་གླིང་གི་ཕྱི་སྲིད་བློན་ཆེན་ནས་འབར་མ་དམག་གཞུང་གིས་ཁྲིམས་ལྟར་ཐག་གཅོད་ཡོང་རྒྱུ་དང་།
འཛིན་བཟུང་བྱས་པའི་མགོ་འཁྲིད་ཚོ་མགྱོགས་མྱུར་ཀློད་གྲོལ་དགོས་སྐོར་སོགས་བརྗོད་འདུག
སྔར་ལོའི་འབར་མའི་དམངས་གཙོའི་འོས་བསྡུ་ནི་ཕྱི་ལོ་ ༢༠༡༡ ལོར་འབར་མ་དྲག་པོའི་དམག་གཞུང་ལ་དམངས་གཙོའི་བཅོས་བསྒྱུར་བྱུང་རྗེས་ཀྱི་རྒྱལ་ཡོངས་འོས་བསྡུ་ཐེངས་གཉིས་པ་དེ་ཡིན་པ་དང་། འོས་བསྡུ་ཐེངས་དང་པོ་དེ་ཕྱི་ལོ་ ༢༠༡༥ ལོར་བྱས་ཏེ་རྒྱལ་ཡོངས་དམངས་གཙོ་ཚོགས་པར་རྒྱལ་ཁ་ཆེན་པོ་ཐོབ་ཡོད་པ་མ་ཟད། འབར་མ་དྲག་པོའི་དམག་གཞུང་གིས་དམངས་གཙོའི་འོས་བསྡུའི་རྒྱལ་ཁ་དེར་ངོས་ལེན་བྱས་ཡོད་པ་དང་། ཕྱི་ལོ་ ༡༩༩༠ ལོར་འབར་མ་གཞུང་གིས་དམངས་གཙོའི་འོས་བསྡུ་ཞིག་བྱས་ཏེ། དམངས་གཙོ་ཚོགས་པར་རྒྱལ་ཁ་ཐོབ་ཡོད་ཀྱང་དམག་གཞུང་གིས་དྲག་གནོན་བྱས་པ་བརྒྱུད། དྲག་པོའི་གཞུང་འཛིན་ཚོགས་པར་རྒྱལ་ཁ་ཐོབ་ཡོད་པ་རེད།
འདས་པའི་ལོ་ངོ་ ༥༠ ལྷག་གི་རིང་འབར་མ་དྲག་པོའི་དམག་གི་སྒེར་གཅོད་དབང་བསྒྱུར་འོག་གནས་ཡོད་པ་དང་། ལོ་ཤས་ནས་འབར་མའི་ནང་དམངས་གཙོའི་འོས་བསྡུ་སོགས་བྱས་ཏེ། ཕྱོགས་ཡོངས་ནས་ཡག་པོ་བྱུང་ཡོད་པ་མ་ཟད། ཨ་རི་དང་ཉི་ཧོང་སོགས་རྒྱལ་སྤྱིའི་དམངས་གཙོའི་རྒྱལ་ཁབ་ཁག་ནས་འབར་མའི་ནང་དམངས་གཙོ་ལག་འགྲུབ་ཡོང་བའི་རེ་བ་བརྒྱབ་ཡོད་ན་ཡང་། སྔར་ལོའི་འོས་བསྡུ་དང་འབྲེལ་འོས་ཤོག་ཁྲོད་མགོ་སྐོར་བཏང་ཡོད་པའི་གནས་ཚུལ་བྱུང་སྟེ། གཞུང་འཛིན་ཚོགས་པ་དང་དམག་གཞུང་བར་མི་མཐུན་པ་བྱུང་ཡོད་པ་དང་། གནས་སྟངས་དེ་ཛ་དྲག་ཆེ་རུ་སོང་སྟེ་ད་ལྟ་དངོས་སུ་དམག་གཞུང་གིས་ཡོངས་ཁྱབ་ངང་སྲིད་དབང་ལེན་རྒྱུའི་གསལ་བསྒྲགས་སྤེལ་ཡོད་པ་རེད།
འབར་མ་རྒྱལ་ཡོངས་དམངས་གཙོ་ཚོགས་པའི་མགོ་འཁྲིད་ཨན་སན་སའོ་ཅའེ་ལ་ཕྱི་ལོ་ ༡༩༩༡ ལོར་བཟང་བཙོན་འོག་ཡོད་སྐབས་ནོ་བྷེལ་གཟེངས་རྟགས་ཐོབ་ཡོད་པ་དང་། དེའི་རྗེས་ཁོའི་ཚོགས་པར་གཞུང་འཛིན་རྒྱལ་ཁ་ཐོབ་རྗེས་འབར་མ་ཁ་ཆེའི་རའོ་ཧན་གྷ་ཡ་མི་རིགས་དང་འབྲེལ་ནས། རྒྱལ་སྤྱིའི་སྟེང་ཁོ་མོར་ཁ་བརྡུང་དང་སྐྱོན་བརྗོད་ཤུགས་ཆེར་བྱུང་ཡོད་པ་མ་ཟད། རྒྱལ་སྤྱིའི་ཚོགས་སྡེ་ཁག་ཅིག་ནས་ཁོ་མོར་སྤྲད་པའི་གཟེངས་རྟགས་ཕྱིར་བསྡུ་སོགས་བྱས་ཡོད་པ་རེད། ཕྱི་ལོ་ ༢༠༡༧ ལོར་འབར་མ་དམག་དཔུང་གིས་རའོ་ཧན་གྷ་ཡ་གྲངས་ཉུང་མི་རིགས་ལ་དྲག་གནོན་བྱས་ཏེ་ཉེས་མིང་འོག འདི་ལོ་ལྕམ་ཨན་སན་སའོ་ཅའེ་དངོས་སུ་རྒྱལ་སྤྱིའི་ཉེས་དོན་ཁྲིམས་ཁང་གི་ཁྲིམས་བཤེར་སྟེང་སོང་ཡོད་པ་རེད།