ཕྱི་ཟླ་ ༡ ཚེས་ ༤ ཉིན། རྒྱ་ནག་གཞུང་གིས་བཅད་བགོས་བྱས་པའི་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ།
གུང་ཧོ་རྫོང་ཆོས་རྗེ་ཞིང་བ་ཝོ་སྡེ་བའི་བོད་མི་གཉིས་ནས་གྲོང་སྡེའི་མགོ་ཁྲིད་འོས་འདེམས་ལ་ངོས་ལེན་མ་བྱས་སྟབས།
ས་གནས་ཉེན་རྟོག་པས་མི་དེ་གཉིས་ནས་འོས་འདེམས་སྒྲིག་ལམ་ལ་གཏོར་བཤིག་བཏང་ཡོད་སྐོར་བརྗོད་ནས།
ཁྲིམས་འགལ་ཉེས་གསོག་གི་སྤྱ་སྤྱོད་ལ་རྡུང་རྡེག་ཞེས་པར་ཁ་གཡར་ནས་འཛིན་བཟུང་གིས་ཉིན་ ༦
རིང་བཀག་ཉར་བྱས་ཡོད་འདུག
དེ་འབྲེལ་གནས་ཚུལ་ནང་བོད་མི་དེ་གཉིས་ནི་བ་ཝོ་སྡེ་བའི་བོད་མི་པད་ཅིག་དང་ཝེ་གཉིས་ཡིན་པ་དང་།
ཁོ་གཉིས་ནས་བདམས་ཐོན་བྱུང་བའི་མགོ་ཁྲིད་ལ་ངོས་ལེན་མི་བྱེད་པ་དང་། འོས་མི་དེ་དག་ལ་གནད་དོན་ཡོད་སྐོར་བརྗོད་ནས་འོས་བསྡུའི་སྒྲིག་ལམ་ལ་གཏོར་བཤིག་བཏང་བས།
ཉེན་རྟོག་ཕྱོགས་ནས་མི་དེ་གཉིས་འཛིན་བཟུང་གིས་རྒྱ་ནག་གཞུང་གིས་བདེ་འཇགས་དོ་དམ་ཆད་ཁྲིམས་ལྟར་བཀག་ཉར་བྱས་ཡོད་སྐོར་བརྗོད་འདུག
ཡང་གནས་ཚུལ་ནང་། རྒྱ་ནག་གི་ཉེན་རྟོག་ཕྱོགས་ནས་སྡེ་བ་དེས་མགོ་ཁྲིད་འོས་འདེམས་ཡག་པོ་ཡོང་ཆེད།
ཆོས་རྗེ་ཉེན་རྟོག་ཕྱོགས་ནས་རྫོང་ཡོངས་ཀྱི་སྤྱི་བདེ་ལས་ཁུངས་དང་སྲིད་གཞུང་གི་བཀོད་སྒྲིག་ལག་བསྟར་བྱས་ཏེ།
འགལ་ཟླ་དང་རྩོད་གཞི་ལ་ཞིབ་བཤེར་ནན་མོ་དང་ཁྲིམས་འགལ་ཉེས་གསོག་གི་བྱ་སྤྱོད་སྣ་ཚོགས་ལ་རྡུང་རྡེག་དྲག་པོ་བཏང་བ་བརྒྱུད།
མི་དེ་གཉིས་ནས་འོས་བསྡུའི་སྒྲིག་ལམ་ལ་གཏོང་བཤིག་བཏང་བས་འཛིན་བཟུང་བྱས་ཡོད་སྐོར་བརྗོད་འདུག
ཐེངས་འདིར་མི་དེ་གཉིས་ནས་འོས་མི་ལ་གནད་དོན་ཡོད་སྐོར་བརྗོད་པ་ལས།
གཞན་འོས་བསྡུའི་སྒྲིག་ལམ་ལ་གཏོར་བཤིག་ག་རེ་བཏང་བ་སོགས་གང་ཡང་མེད་པ་དང་། སྤྱིར་རྒྱ་ནག་གཞུང་གིས་དེ་སྔ་ནས་བོད་དང་གྲངས་ཉུང་མི་རིགས་ཁག་གི་ས་ཁུལ་ནང་།
རྒྱ་ནག་གཞུང་གིས་ཆེད་དམིགས་འདོད་མོས་ཡོད་པའི་མི་སྣ་ལ་འོས་འདེམས་བྱ་དགོས་པ་དང་། མི་སྣ་དེ་དག་ནི་ཆེད་དུ་རྒྱ་ནག་གཞུང་ལ་དགའ་མཁན་སོགས་གོ་སྒྲིག་བྱེད་བཞིན་ཡོད་པའི་གནས་ཚུལ་ཡོད་པ་མ་ཟད།
མགོ་ཁྲིད་དེ་དག་ལ་ཡིད་ཆེས་དང་ངོས་ལེན་མེད་མཁན་རིགས་འཛིན་བཟུང་དང་བཀག་ཉར་གྱི་གནས་ཚུལ་མང་པོ་བྱུང་བཞིན་ཡོད་པ་རེད།