རྒྱ་གར་གཞུང་གིས་རྒྱ་ནག་གི་གསང་ཉུལ་བ་ལའོ་སང་དང་འབྲེལ་ནས་རྒྱ་གར་མི་སེར་ཐོབ་ཐང་ཁྲིམས་འཆར་ངོ་རྒོལ་ནང་ངན་འབྲེལ་བྱས་ཡོད་པའི་དོགས་གཞིའི་འོག་བོད་མི་ ༣༠ ལ་འདྲི་རྩད་བྱ་རྒྱུ་ཡིན་འདུག
རྒྱ་གར་(republicworld)གསར་ཁང་གིས་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༢ ནང་བྱུང་བའི་རྒྱལ་ས་ལྡི་ལིའི་མི་སེར་ཁྲིམས་འཆར་ངོ་རྒོལ་ལམ། ཡོངས་གྲགས་སུ་ལྡི་ལིའི་ཟིང་འཁྲུག་(Delhi riots)དང་འབྲེལ་ནས་རྒྱ་ནག་གི་གསང་ཉུལ་བ་ལའོ་སང་གིས་བོད་པ་ཁག་ཅིག་ལ་དངུལ་སྤྲད་ནས། ངོ་རྒོལ་ཟིང་འཁྲུག་རྒྱབ་ནས་ངན་འབྲེལ་བྱེད་བཅུག་ཡོད་པའི་དོགས་གཞིའི་འོག རྒྱ་གར་གཞུང་གིས་བོད་མི་ ༣༠ ལ་འདྲི་རྩད་ཆེད་འབོད་འགུག་བྱ་རྒྱུ་ཡིན་འདུག
དེ་འབྲེལ་གནས་ཚུལ་ནང་རྒྱ་གར་གཞུང་འབྲེལ་ཆེས་མཐོའི་གནས་ཚུལ་ཡོངས་ཁུངས་ཤིག་ནས་བརྗོད་པ་ལྟར་ན།
གསང་ཉུལ་བ་ལའོ་སང་ལ་རྒྱ་ནག་གཞུང་གིས་བཀོད་མངགས་ལྟར་ལྡི་ལིའི་ཟིང་འཁྲུག་ནང་དངུལ་གྱིས་ངན་ལས་བྱས་པའི་དཔང་རྟགས་ཡོད་པ་དང་།
དེ་བཞིན་གསང་ཉུལ་བ་ལའོ་སང་དང་འབྲེལ་ནས་རྒྱ་གར་ཆེད་གཉེར་གསང་བའི་ལས་ཁུངས་ནས་བོད་མི་
༣༠ ཡི་མིང་ཐོ་བསྡུ་རུབ་བྱས་ཡོད་པ་དང་། མི་རིང་བར་ཁོ་ཚོར་འབོད་འགུག་གིས་འདྲི་རྩད་བྱ་རྒྱུ་ཡིན་སྐོར་བརྗོད་འདུག
ཡང་གནས་ཚུལ་ནང་གསང་ཉུལ་བ་ལའོ་སང་གིས་བོད་མི་དེ་དག་ལ་ཁོ་རང་གི་དངུལ་སྒོར་བརྗེ་ལེན་ཁང་བརྒྱུད་དངུལ་ཕོན་ཆེན་བཏང་ཡོད་པ་དང་། མི་སྣ་དེ་དག་གིས་དངུལ་རྣམས་དེ་མ་ཐག་དངུལ་བྱང་ནས་བཏོན་ཡོད་པས། གནད་དོན་དེས་དངུལ་དེ་དག་ལྡི་ལིའི་ངོ་རྒོལ་ཟིང་འཁྲུག་ལ་བེད་སྤྱོད་བྱས་ཡོད་པའི་དོགས་གཞི་སྐྱེས་དགོས་བྱུང་གི་ཡོད་པ་དང་། ལྡི་ལིའི་ཉེན་རྟོག་དཔོན་མཐོ་ཤོས་ནས་གནད་དོན་དེ་བཞིན་རྒྱལ་ཁབ་ཀྱི་བདེ་འཇགས་དང་འབྲེལ་བའི་ངོས་ནས། རྒྱ་གར་གསང་བའི་ལས་ཁུངས་སོགས་ལ་འབྲེལ་བ་བྱས་ཡོད་སྐོར་བརྗོད་འདུག
རྒྱ་གར་གཞུང་གིས་འདི་ལོའི་ཕྱི་ཟླ་ ༨ ནང་གསང་ཉུལ་བ་ལའོ་སང་འཛིན་བྱུང་བྱས་ཏེ། འདས་པའི་ཟླ་ངོ་ ༥ ཙམ་རིང་འདྲི་རྩད་བྱས་པ་བརྒྱུད། ལའོ་སང་གིས་རྒྱ་གར་ནང་གསང་ཉུལ་གྱི་ལས་དོན་གཅིག་པུ་ཙམ་མ་ཡིན་པར། པ་ཀི་སི་ཐན་ནང་ཡོད་པའི་རྒྱ་ནག་གི་གསང་ཉུལ་བ་དང་པ་ཀི་སི་ཐན་གྱི་གསང་ཉུལ་བ་ཚོར་འབྲེལ་བ་བྱས་ཏེ། པ་ཀི་སི་ཐན་གྱི་གསང་མྱུལ་བ་ཚོར་རྒྱ་གར་ནང་གསང་མྱུལ་གྱི་ལས་དོན་བྱེད་རོགས་དང་། གསང་མྱུལ་གྱི་འབྲེལ་ལམ་འཛུགས་རོགས་བྱེད་བཞིན་ཡོད་པའི་གནས་ཚུལ་ཐོན་ཡོད་པ་རེད།
གཞན་ཡང་རྒྱ་གར་དབུས་ནང་སྲིད་ལས་ཁུངས་ནས་ལའོ་སང་གི་དངུལ་སྒོར་ཀར་རོ་
༡༠༠༠ གི་ཡོང་ཁོངས་རྒྱ་ནག་དམག་གཞུང་ཡིན་པ་ཤེས་རྟོག་བྱུང་ཡོད་པ་དང་། ཁོས་གསང་ཉུལ་ཙམ་མ་ཟད་རྒྱ་གར་གྱི་སྤྱི་ཚོགས་ཁྲོད་སིམ་འཛུལ་ཐབས་བྱས་ཏེ།
ངོ་རྒོལ་ལས་འགུལ་སོགས་ཀྱི་ནང་དངུལ་སྒོར་གྱིས་ངན་འབྲེལ་བྱས་ཏེ་སྤྱི་ཚོགས་བདེ་འཇགས་མི་ཡོང་ཐབས་སོགས།
ལས་དོན་མང་པོའི་ནང་ངན་འབྲེལ་དང་གསང་ཉུལ་བྱས་ཡོད་པའི་གནས་ཚུལ་ཐོན་བཞིན་ཡོད་པ་རེད།
ཡང་རྒྱ་གར་གྱི་དབྱིན་ཡིག་ཚགས་པར་རྙིང་གྲས་(dailypioneer)གསར་ཁོང་གིས་བོད་མིའི་སྒྲིག་འཛུགས་ཀྱི་འོས་བསྡུ་དང་།
ཨ་རི་དང་རྒྱ་ནག་གི་གསང་ཉུལ་རོལ་རྩེད་རྩེ་བཞིན་ཡོད་སྐོར་བརྗོད་པའི་གནས་ཚུལ་ཞིག་ནང་།
གནས་ཚུལ་ཡོངས་ཁུངས་ནས་མཁོ་སྤྲོད་བྱས་པ་ལྟར་ན། རྒྱ་ནག་གི་གསང་ཉུལ་བ་ལའོ་སང་གིས་བཙན་བྱོལ་བོད་མིའི་འོས་བསྡུའི་ཁྲོད་དངུལ་བཏང་ཡོད་པ་མ་ཟད།
ལའོ་སང་གིས་ཁོ་རང་གི་དངུལ་སྒོར་བརྗེ་ལེན་ཁང་བརྒྱུད་ནས་དྷ་རམ་ས་ལའི་བོད་མིའི་མགོ་ཁྲིད་མི་སྣར་དངུལ་བཏང་ཡོད་སྐོར་སོགས་བཀོད་འདུག
གསང་མྱུལ་བ་ལའོ་སང་ནི་འདི་ལོ་ ༤༢ ཡིན་པ་དང་། འདི་ལོའི་ཕྱི་ཟླ་ ༨ ནས་རྒྱ་གར་དཔྱ་ཁྲལ་དོ་དམ་ལས་ཁུངས་ནས་ཁྲིམས་འགལ་དངུལ་སྒོར་བརྗེ་ལེན་གྱི་གནད་དོན་འོག་འཛིན་བཟུང་བྱས་པ་ནས། ཕྱི་ལོ་ ༢༠༡༨་ལོར་ཁོ་འཛིན་བཟུང་བྱས་པ་བཞིན་གནད་དོན་དེ་དག་དང་འབྲེལ་ནས་ལའོ་སང་གིས་རྒྱ་གར་ནང་གསང་མྱུལ་གྱི་ལས་ཀ་བྱེད་བཞིན་པ་དང་། གསར་གར་གསར་ལམ་ཁག་གིས་ལའོ་སང་གིས་འདས་པའི་ངོ་ལོ་གསུམ་རིང་རྒྱ་གར་གཞུང་དང་༧གོང་ས་རྒྱལ་བ་རིན་པོ་ཆེར་མཆོག་གི་སྐོར་ལ་གསང་མྱུལ་དང་། གསང་བའི་གནས་ཚུལ་བསྡུ་རུབ་ཆེད་བོད་ཀྱི་དགོན་སྡེ་ཁག་གི་གྲྭ་བ་མང་པོ་ཞིག་ལ་དངུལ་སྤྲད་ཡོད་པའི་གནས་ཚུལ་སོགས་ཐོན་ཡོད་པ་རེད།