བྷར་སྒྲན་གྱིས་བསྐོ་བཞག་བྱས་པའི་བློན་ཆེན་དང་སློབ་སྟོན་པ་ཁག་གིས་རྒྱ་ནག་སྒང་ལ་ལངས་ཕྱོགས་སྐོར་གྱི་རྒྱབ་ལྗོངས་ལ་ལྟ་བ།

བྷར་སྒྲན་གྱིས་རྒྱ་ནག་གི་སྒང་ལ་ལངས་ཕྱོགས་ནི་བྷར་སྒྲན་རང་གིས་ང་ནི་གཞང་ཚོང་མ་ཡིན་ཟེར་བ་ལྟ་བུར་འགྱུར་བཞིན་འདུག                                                                                      

                                                                                         ཨ་ནུ་ཐང་བསོད་ནམས།

མི་མང་པོ་ཞིག་གིས་བྷར་སྒྲན་གྱིས་རྒྱ་ནག་གི་སྒང་ལ་ཁྲོ་རྒན་ལྟར་མུ་མཐུད་དུ་མཁྲེགས་པོ་བྱེད་ཀྱི་རེད་ཟེར་ལ། དེ་ལས་ཀྱང་མི་མང་བ་ཞིག་གིས་བྷར་སྒྲན་གྱིས་རྒྱ་ནག་གི་སྒང་ལ་འཇམ་པོ་བྱེད་ཀྱི་རེད་ཅེས་བརྗོད་ཀྱི་ཡོད། ཁོ་གཉིས་ལ་ཡང་རྒྱུ་མཚན་གཙོ་བོ་རེ་ཡོད།

 

བྷར་སྒྲན་གྱིས་སྲིད་འཛིན་དང་པོ་ལ་ལངས་སྐབས་སུ་ཁ་གཏད་ཀྱི་རྒྱ་ནག་གང་མཚམས་དགྲ་འཛིན་པ་བྷེར་ནེས་དང་། ཨ་ལ་གཟར་བྷིར་ཐི་ལྟ་བུ་ཕམ་ཉེས་སུ་བཏང་ཐབས་སུ། བགྲོ་གླེང་གི་སྐབས་གཅིག་ལ་རྒྱ་ནག་ནི་ཡུ་གུར་བ་མང་པོ་བཙོན་འཇུག་བྱེད་མཁན་གྱི་གདུག་རྩུབ་ཅན་རེད་ལབ་ནས་སྐྱོན་བརྗོད་ཤུགས་ཆེན་ཞིག་བྱས་བས་རེད་ལ། ཁོས་མཚམས་རེར་ཁོ་རྒྱ་ནག་གི་སྒང་ལ་མཁྲེགས་མདོག་བསྟན་པས་ཀྱང་རེད། ལྷག་པར་དུ་ཉེ་ཆར་ཡང་ཁོས་ཨ་རིའི་མཐུན་གྲོགས་ཚོ་དང་ལྷན་དུ་རྒྱ་ནག་གི་སྒང་ལ་མཁྲེགས་པོ་བྱེད་ཀྱི་ཡིན་བརྗོད་ཡོད།

 

ཁོ་ལ་ཡིད་ཆེས་མི་བྱེད་མཁན་ཚོས་བྷར་སྒྲན་གྱིས་ཨ་རིའི་རྩ་དོན་རླུང་ལ་སྐུར་ནས་རྒྱ་ནག་ལ་སྔར་གྱི་ཨོ་བྷ་མ་དང་བྷི་ཤི་ཡི་སྐབས་ལྟར་སྟུན་མཁས་བྱེད་ཀྱི་རེད་འདོད་ཀྱི་ཡོད། རྒྱུ་མཚན་ནི། བྷར་སྒྲན་གྱིས་ལོ་མང་གི་རིང་ལ་རྒྱ་ནག་ལ་གྲོགས་པོ་བསྒྲིགས་པ་དང་། ལྷག་པར་དུ་ཁོ་དང་ཁོའི་ནང་མི་ལ་རྒྱ་ནག་དང་དཔལ་འབྱོར་གྱི་འབྲེལ་བ་དམ་ཟབ་ཡོད་པ་མ་ཟད། ཁོས་སྲིད་འཛིན་དུ་ལངས་རྗེས་སུ་ཡང་རྒྱ་ནག་ཡར་རྒྱས་ཕྱིན་པ་ནི་ཨ་རིའི་ཁེ་ཕན་ཡིན་ཚུལ་ཐེངས་མང་པོར་བརྗོོད་པ་མ་ཟད། ཨ་རིའི་རྒྱ་ནག་གི་ཚོགས་པ་ཚོས་ཁྱེད་ཀྱིས་རྒྱ་གཞུང་ལ་སྐྱོན་བརྗོད་མ་བྱས་ན་ང་ཚོས་ཁྱེད་ལ་རྒྱབ་སྐྱོར་བྱེད་ལབ་པ་སོགས་ཀྱིས་རེད། ལྷག་པར་དུ་ནད་ཡམས་ཀྱི་སྐབས་སུ་ཁོས་རྒྱ་ནག་ལ་སྐྱོན་བརྗོད་ཟུར་ཙམ་ཡང་མ་བྱས་པ་མ་ཟད། ཁྲོ་རྒན་དང་ཁོ་གཉིས་འགྲན་བསྡུར་བྱེད་སྐབས་སུ་ཁོ་དང་། ཁོའི་སྲིད་འཛིན་གཞོན་པ་གཉིས་ཀྱིས་རྒྱ་ནག་ལ་སྐྱོན་བརྗོད་བྱས་མེད། ལྷག་པར་དུ་ཁོའི་སྲིད་འཛིན་གཞོན་མ་ཀ་མ་ལ་ཧཱ་རས་སིས་ཀྱིས་སྲིད་འཛིན་གྱི་འགྲན་བསྡུར་གྱི་རྩོད་པ་བྱེད་སྐབས་སུ། དངོས་སུ་རྒྱ་ནག་ལ་ཚོང་དམག་བརྒྱབས་པ་ནི་ནོར་འཁྲུལ་རེད་ལབ་ནས་ཁྲོ་རྒན་ལ་སྐྱོན་བརྗོད་བྱས་བ་བཅས་ཀྱིས་རེད།

མ་གཞི་བྷར་སྒྲན་གྱིས་བསམ་བློའི་ནང་གི་ཕྱི་སྲིད་ཀྱི་ལྟ་བ་ནི་ཁིས་སན་རྗར་གྱི་ཕྱི་སྲིད་ཀྱི་ལྟ་སྟངས་ཡིན་ཞིང་། བྷར་སྒྲན་གྱིས་ཉེ་ཆར་ཡང་ཨུ་རུ་སུ་ནི་”ཨ་རི་ལ་ཉེན་ཁ་བཟོ་མཁན་ཡིན། རྒྱ་ནག་ནི་འགྲན་ཡ་ཡིན་”ཞེས་བརྗོད་ཡོད། དེར་བརྟེན། བྷར་སྒྲན་གྱིས་བསམ་བློའི་ནང་གི་དགྲ་བོ་ནི་ཨུ་རུ་སུ་ཡིན་པ་ལས། རྒྱ་ནག་མིན་པ་གསལ་བོ་ཡིན་པས་སྔར་གྱི་ཁོའི་བསམ་བློ་གཏོང་སྟངས་ལ་ད་ལྟ་ཡང་རྩ་བའི་ཆ་ནས་འགྱུར་བ་ཕྱིན་མེད་པ་གསལ་བོ་མཚོན་ཡོད། བདེན་ཏེ། ཁོས་རྒྱ་ནག་ནི་རྐང་རྩེད་སྤོ་ལོ་རྩེད་སྐབས་ཀྱི་འགྲན་ཡ་ལྟ་བུ་ངོས་འཛིན་དང་། ཨུ་རུ་སུ་ནི་ཁ་གཏད་ཀྱི་ཇག་པ་ལྟ་བུར་ངོས་འཛིན་བྱས་པས་ཡིན། རྩེད་མོའི་སྐབས་ཀྱི་འགྲན་ཡ་ནི་རང་ཉིད་ཡར་རྒྱས་སུ་བཏང་བྱེད་ཡིན་ཡང་། ཇག་པ་ནི་རང་ཉིད་ཡར་རྒྱས་བཏང་བྱེད་མིན་པ་རྩ་མེད་བཟོ་མཁན་ཡིན་པས་དེ་གཉིས་ལ་ཁྱད་པར་ཆེན་པོ་ཡོད།

 

ཁྲོ་རྒན་སྲིད་འཛིན་མ་ཐོན་པའི་སྔོན་དུ་རྒྱ་ནག་གིས་ཧོང་གོང་དང་ནད་ཡམས་གནད་དོན་སྒང་ནས་ནོར་འཁྲུལ་བཟོས་བས། དེ་ལ་ཉེས་ཆད་གཅོད་ཆེད་དུ་རྒྱ་ནག་གི་བཟོ་གྲྭ་སུམ་ཅུ་ཙམ་ལ་བཀག་འགོག་དང་། གུང་ཁྲན་ཏང་མི་ཀུན་ལ་ཨ་རིའི་ནང་གནས་སྡོད་ཆོག་པའི་དུས་ཡུན་ལོ ༡༠ ནས་ཟླ་གཅིག་ལ་བཏང་བ་སོགས་ཀྱི་ཆད་པ་བཀལ་ཏེ། ཁྲོ་རྒན་གྱིས་རང་ཉིད་རྒྱ་ནག་གི་སྒང་ལ་ལྟ་སྟངས་མཁྲེགས་པའི་བྱས་རྗེས་གནས་ཐབས་བྱེད་ཀྱི་ཡོད། འོན་ཀྱང་། རྒྱ་ནག་གི་ཚོང་དོན་ལས་བྱེད་ཟུར་བ་(He Weiwen)གྱིས་ཁྲོ་རྒན་གྱིས་རྒྱ་ནག་ལ་བཀག་འགོག་ཅི་ལྟར་བྱས་ཀྱང་། བྷར་སྒྲན་གྱིས་བཀག་རྒྱ་ཚང་མ་གཏོར་ངེས་རེད་ཅེས་བརྗོད་འདུག

སློབ་སྟོན་པ།(Jake Sullivan)

ང་ཚོས་བྷར་སྒྲན་གྱི་བདམ་པའི་བློན་ཆེན་དང་ནང་བློན་ལ་ཅུང་ཙམ་ཞིབ་འཇུག་བྱས་ན། ཉེ་ཆར་དཔྱད་ཞིབ་པ་སྐུ་ཞབས་ཁི་སི་ཆའ་ཕོར་གྱིས་ཉམས་ཞིབ་ལ་གཞི་བཅོལ་ནས་ཅུང་ཙམ་ངོ་སྤྲོད་བྱེད་དགོས། (Jake Sullivan)ནི་བྷར་སྒྲན་གྱི་སློབ་སྟོན་པར་བསྐོས་ཡོད་ལ། ཁོས་ཕྱི་ལོ་ ༢༠༡༦ ལོར་ཧེ་ལི་རེས་ཀྱི་སྲིད་འཛིན་གྱི་ལས་འགུལ་ཁང་གི་སློབ་སྟོན་པ་བྱས་ཡོད། ༢༠༡༨ ཁོ་ལ་(CBS)ཡིས་གཅར་འདྲི་བྱེད་སྐབས་སུ། ཁོས་ང་ཚོས་རོགས་པ་བྱས་ཏེ་རྒྱ་ནག་ཡར་རྒྱས་སུ་ཕྱིན་པ་རེད། རྒྱ་ནག་ཡར་རྒྱས་སུ་ཕྱིན་པ་ནི་ང་ཚོའི་ནོར་འཁྲུལ་མ་རེད། ང་ཚོར་ལམ་ལྷོང་བྱུང་བ་རེད། ཁོས་(Lowy institution)ཕྱི་ལོ་ ༢༠༡༧ ལོ་རུ་དེ་ལྟར་རྒྱ་ནག་ཡར་རྒྱས་སུ་ཕྱིན་པ་ནི་ཡོ་རོབ་དང་ཨ་རི། ཨེ་ཤ་ཡ་ལ་ཕན་གྱི་རེད་ཅེས་བརྗོད་ཡོད།

སློབ་སྟོན་པ།(Kurt Campbell)

དེ་བཞིན་(Kurt Campbell)ནི་བྷར་སྒྲན་གྱི་སློབ་སྟོན་པར་བསྐོས་ཡོད། ཁོ་ནི་ཨོ་བྷ་མའི་སྐབས་སུ་ཕྱི་སྲིད་དྲུང་ཆེ་ཡི་ལས་རོགས་ཡིན། ཁོ་དང་(Jake Sullivan)གཉིས་ཀྱིས་ཁྲོ་རྒན་གྱིས་ཨ་རྒྱ་གཉིས་ཐབས་ཇུས་ཀྱི་སྒོ་ནས་འགྲན་རྒྱུ་ཅི་ཡང་མེད་ཅིང་། གལ་སྲིད་འགྲན་པ་དེ་ལམ་ལྷོང་མ་བྱུང་ན། མཐའ་མར་ཤི་གསོན་གྱི་འགྲན་རྩོད་རེད། དེ་ནི་ཕྱོགས་གཉིས་ཀ་ལ་ཡག་པོ་མེད་ཚུལ་དང་། རྒྱ་ནག་གི་ཡར་རྒྱས་ནི་ཨ་རིའི་ཡར་རྒྱས་དང་འབྲེལ་བ་དམ་ཟབ་ཡོད་སྐོར་བརྗོད་ཡོད། འོན་ཀྱང་། ཁོ་གཉིས་ཀས་རྒྱ་ནག་གི་འགྲོ་བ་མིའི་ཐོབ་ཐང་ངན་ཚུལ་དང་། རྒྱ་ནག་གིས་དྲ་རྒྱ་ཡི་གཅིག་སྡུད་རིང་ལུགས་བྱེད་ཀྱི་ཡོད་ཚུལ་སྐྱོན་བརྗོད་བྱས་ཡོད། ཡིན་ཡང་། དེ་ནི་རང་ཉེས་འགེབ་བྱེད་ཙམ་ཡིན་པ་ལས་རྩ་ཆེན་དུ་མི་བརྩི་བ་གསལ་བོ་རེད། ལྷག་པར་དུ་བྷར་སྒྲན་སྲིད་གཞུང་གིས་ད་ལྟའི་ཨ་རིའི་ཕྱི་སྲིད་དྲུང་ཆེ་ཕམ་ཕེ་ཡོ་ཡིས། ཝེ་ཝན་ནི་རྒྱ་ནག་གི་ཆ་ཤས་མ་རེད་ལབ་པ་བཞིན་མི་ལབ་པ་གསལ་བོ་རེད། མདོར་ན། རྒྱ་ནག་གི་གནད་དོན་ལ་ཐུག་དུས་ཁོ་གཉིས་དབུ་ལམ་དུ་འགྲོ་བ་གསལ་བོ་རེད། (Kurt Campbell) ཡིས ༢༠༡༢ ལོར་ཨ་རིའི་ཕྱི་སྲིད་བློན་ཆེན་ལ་རོགས་པ་བྱས་ཏེ་རྒྱ་ནག་དང་ཧྥུ་ལི་ཕིན་གཉིས་ཀྱིས་རྩོད་རྙོག་གི་གླིང་ཕྲན(Scarborough Shoal)འདུམ་བསྒྲིགས་བྱས་ཤིང་། ཕྱོགས་གཉིས་ཀའི་དམག་མི་གནས་དེ་རུ་ཕྱིར་འཐེན་བྱེད་རྒྱུའི་གན་རྒྱ་བཞག་ཡོད། དེར་བརྟེན། ཧྥུ་ལི་ཕིན་གྱི་དམག་མིས་ཁས་ལེན་ལྟར་ས་ཆ་དེ་ནས་ཕྱིར་འཐེན་བྱས་ཡོད་ཀྱང་། རྒྱ་དམག་ཁས་ལེན་ལ་མ་གནས་བར་ས་ཆ་དེ་ནས་ཕྱིར་འཐེན་བྱས་མེད། མུ་མཐུད་དུ་ས་ཆ་དེ་བཟུང་ནས་བསྡད་ཡོད། འོན་ཀྱང་། ཁོས་དེ་ལས་བསླབ་བྱ་གཅིག་ཀྱང་བླངས་མེད་པ་གསལ་བོ་རེད།

དཔལ་འབྱོར་དྲུང་ཆེ།(Janet Yellen)

ལྕམ་(Janet Yellen)ནི་བྷར་སྒྲན་གྱིས་དཔལ་འབྱོར་དྲུང་ཆེའམ་བཀའ་བློན་དུ་བསྐོས་ཡོད། མོ་ནི་ཨ་རིའི་གཞུང་གི་ཐེབས་རྩའི་(Federal reserve)འགན་འཛིན་ཟུར་བ་ཡིན། མོས་ཨ་རྒྱའི་ཚོང་དམག་ལ་ངོ་རྒོལ་ཤུགས་ཆེན་བྱས་ཤིང་། མོས་ཨ་རྒྱའི་ཚོང་དམག་ནི་ཨ་རིའི་མིན་ཞིང་། ཁྲོ་རྒན་གྱི་ཚོང་དམག་རེད་ཅེས་བརྗོད་ཡོད། མོས་ད་ལོར་ཧོང་གོང་གི་ཨེ་ཤ་ཡའི་དཔལ་འབྱོར་གྱི་ཚོགས་ཆེན་ཐོག་ཏུ་”ཧོས་ཝལ་བཀག་པ་ནི་ཡག་པོ་མིན་ཞིང་། འཕྲུལ་ཆས་ནི་འཛམ་གླིང་གི་ས་ཕྱོགས་གང་ཞིག་ཏུ་གསར་བཏོད་བྱས་ཀྱང་། དེ་མུ་མཐུད་དུ་ཡར་རྒྱས་དང་གསར་བཏོད་ཡོང་ཆེད་དུ་འཛམ་གླིང་ཡོངས་ཀྱིས་བེད་སྤྱོད་བཏང་ཐུབ་པ་བྱེད་དགོས་ལབ་ཡོད།”

ཕྱི་སྲིད་དྲུང་ཆེ།(Susan Rice)

ཡང་ལྕམ(Susan Rice)ནི་བྷར་སྒྲན་གྱིས་ཨ་རིའི་ཕྱི་སྲིད་དྲུང་ཆེའམ། རྒྱལ་སྲུང་དྲུང་ཆེ་རུ་བསྐོ་རྒྱུ་རེད་འདུག མོ་ནི་ཨོ་བྷ་མའི་སྐབས་སུ་རྒྱལ་སྲུང་སློབ་སྟོན་མ་ཡིན། མོ་ཡང་བྷར་སྒྲན་ལྟར་ཁིས་སན་རྗར་གྱི་རྒྱ་ནག་གི་ལངས་ཕྱོགས་ཀྱི་སྒང་དུ་འགྲོ་བཞིན་ཡོད། མོས་ད་ལོར་ཨེ་ཤ་ཡའི་མཐུན་ཚོགས་ལ་རོགས་པ་བྱས་ཤིང་། ཨ་རི་དང་རྒྱ་ནག་གཉིས་ནད་ཡམས་ཀྱི་ཆེད་དུ་མཉམ་འབྲེལ་བྱེད་དགོས། ནད་ཡམས་ཆབ་སྲིད་དུ་བསྒྱུར་མི་ཉན་ཞིང་། ཨ་རྒྱ་གཉིས་ནད་འགོག་གི་སྨན་དང་། ནད་ཡམས་ལ་མཉམ་ལས་བྱེད་དགོས་བརྗོད་ནས་ཁོ་ཚོའི་སྙན་ཞུ་ལ་རྒྱབ་སྐྱོར་གྱི་མཚན་རྟགས་བཀོད་དེ། ཕོ་བྲང་དཀར་བོར་སྙན་ཞུ་ཕུལ་ཡོད།

ཕྱི་སྲིད་དྲུང་ཆེ།(Antony Blinken)

ད་དུང་།(Antony Blinken)ནི་བྷར་སྒྲན་གྱིས་ཨ་རིའི་ཕྱི་སྲིད་དྲུང་ཆེ་ཡི་འོས་མིར་བདམས་ཡོད། ཁོ་ནི་ཨོ་བྷ་མའི་སྐབས་སུ་ཕྱི་སྲིད་དྲུང་ཆེ་ཡི་སྐུ་ཚབ་ཡིན། ནད་ཡམས་ཀྱི་སྐབས་སུ་ཁོས་ཨ་རྒྱ་མཉམ་ལས་བྱེད་དགོས་ལབ་ནས་ནུས་བ་བཏོན་ཡོད་ཅིང་། དེ་ལ་མཚན་རྟགས་བཀོད་མཁན་གྱི་གྲས་ཡིན། འོན་ཀྱང་། ཁྲོ་རྒན་གྱིས་ཁོ་ཚོའི་མོས་འདོད་ངོས་ལེན་བྱས་མེད།

ཕྱི་སྲིད་སློབ་སྟོན་པ།(Ely Ratner)

དེ་བཞིན་(Ely Ratner)ནི་ཕྱི་སྲིད་སློབ་སྟོན་པ་ཡིན། ཁོས་ཨ་རི་གཅིག་པུ་ཡིས་རྒྱ་ནག་ལ་གདོང་ལེན་བྱེད་ཐབས་ཡག་པོ་མིན་པས་ཨ་རིའི་མཐུན་གྲོགས་རྒྱལ་ཁབ་ཚོ་དང་ལྷན་དུ་རྒྱ་ནག་ལ་གདོང་ལེན་བྱེད་དགོས་བརྗོད་ཀྱི་ཡོད་པ་མ་ཟད། ང་ཚོས་ཨ་རི་དང་པོ་བྱེད་རྒྱུ་ངེས་བར་དུ་མཚམས་འཇོག་དགོས་ལབ་ཀྱི་ཡོད། ཁོས”རྒྱ་ནག་ལ་དཀའ་ངལ་བཟོས་བ་ནི་རྒྱ་ནག་ལ་དཀའ་ངལ་བཟོས་མ་ཡིན་པར། ང་ཚོས་རང་ཉིད་ལ་དཀའ་ངལ་བཟོས་བ་ཡིན། དེ་ནི་ཚོའི་ཕྲག་དོག་གིས་རེད་བརྗོད་ཡོད།” གཞན་ཡང་ཁོས་ད་ལོར་ཨེ་ཤ་ཡའི་མཐུན་ཚོགས་ལ་རོགས་པ་བྱས་ཤིང་། ཨ་རི་དང་རྒྱ་ནག་གཉིས་ནད་ཡམས་ཀྱི་ཆེད་དུ་མཉམ་འབྲེལ་བྱེད་དགོས། ནད་ཡམས་ཆབ་སྲིད་དུ་བསྒྱུར་མི་ཉན་ཞིང་། ཨ་རྒྱ་གཉིས་ཀྱིས་ནད་འགོག་གི་སྨན་དང་། ནད་ཡམས་ལ་མཉམ་ལས་བྱེད་དགོས་བརྗོད་ནས་ཁོ་ཚོའི་སྙན་ཞུ་ལ་རྒྱབ་སྐྱོར་གྱི་མཚན་རྟགས་བཀོད་དེ། ཕོ་བྲང་དཀར་བོར་སྙན་ཞུ་ཕུལ་ཡོད། ཁོས་ང་ཚོའི་གྲོགས་པོ་ཚོ་དང་མཉམ་འབྲེལ་བྱས་ཏེ་རྒྱ་ནག་ལ་གདོང་ལེན་བྱེད་ཟེར་བའི་ཐབས་ཇུས་ནི་ཡོང་ཐབས་དཀའ་ཞིང་། ཡོ་རོབ་པ་ཀུན་ཕྱི་སྲིད་ཀྱི་སྒང་ལ་གཅིག་མཐུན་ཞིག་མེད་ཅིང་། ཡོ་རྒྱལ་མང་པོས་རྒྱ་ནག་ལ་དགའ་མོས་བྱེད་པ་མ་ཟད། དཔེར་ན། རྒྱ་ནག་གི་གྲོགས་པོ་གྷི་རིས་སི་ལྟ་བུས་ཀྱང་རྒྱ་ནག་ལ་རྒྱབ་སྐྱོར་བྱས་ཏེ་ཡོ་མནའ་ཡིས་རྒྱ་ནག་གི་སྒང་ལ་འགྲོ་བ་མིའི་ཐོབ་ཐང་གི་གྲོས་ཆོད་གཅིག་ཀྱང་འཇོག་བཅུག་གི་མེད། དེ་ལས་སྒུག་ནས་མ་བསྡད་པ་ཁྲོ་རྒན་ལྟར་རྒྱ་ནག་གི་ཉེན་ཁ་ཡོད་པའི་ཁེ་ཕན་གཅིག་བུའི་རྒྱལ་ཁབ་རྒྱ་གར་དང་། ཉི་ཧོང་། ཨོ་གླིང་བཅས་ལ་མཉམ་འབྲེལ་བྱས་ན། ནུས་བ་དེ་ཡིས་ཐོན་ངེས་རེད།

ནང་སྲིད་དྲུང་ཆེ།(Max Baucus)

(Max Baucus)ནི་བྷར་སྒྲན་གྱི་ནང་བློན་དུ་བསྐོས་ཡོད། ཁོ་ནི་ཨོ་བྷ་མའི་རྒྱ་ནག་གི་མགྲིན་ཚབ་པ་ཡིན་ཞིང་། ཁོས་ད་ལོ་ཟླ ༨ ནང་དུ་གལ་སྲིད་བྷར་སྒྲན་ལ་རྒྱལ་ཁ་ཐོབ་པ་ཡིན་ན། ཨ་རྒྱའི་འབྲེལ་བ་སྔ་ལྟར་བསྐྱར་གསོ་བྱེད་ངེས་ཡིན་ཞེས་(CNBC)གསར་ཁང་ལ་བརྗོད་ཡོད།  གཞན་ཡང་སི་ཊིས་ཝེན་ཤ་སྒྲིས་ནི་བྷར་སྒྲན་གྱིས་རང་གི་ཆབ་སྲིད་ཀྱི་སློབ་སྟོན་པར་བསྐོས་འདུག་ཅིང་། ཁོས་ལོ ༢༠ སྔོན་དུ་ཨ་རིའི་ཚོང་བ་ཆེན་པོ་དང་། ཁེ་གཉེར་ཁང་ཆེན་པོ་ཚོའི་སྐུ་ཚབ་བྱས་ཏེ། ཁི་ལིས་ཊོན་སྲིད་གཞུང་ལ། རྒྱ་ནག་འཛམ་གླིང་གི་དོན་ཚོང་དོན་སྒྲིག་འཛུགས་ཀྱི་ཁོངས་སུ་བཅུག་རྒྱུའི་རེ་སྐུལ་ཞུས་བས། ༢༠༠༠ ལོར་རྒྱ་ནག་ཚོང་དོན་སྒྲིག་འཛུགས་ལ་ཞུགས་ཐུབ་ཡོད།

 

མ་གཞི་རྒྱ་ནག་འཛམ་གླིང་གི་ཚོང་དོན་སྒྲིག་འཛུགས་ལ་བཅུག་པ་ནི་ཁོ་གཅིག་པུ་ཡི་ནུས་བ་མིན་ཡང་། ཁོས་རྒྱ་ནག་ཚོང་དོན་སྒྲིག་ལ་བཅུག་པར་ནུས་བ་རྒྱ་ཆེན་བཏོན་ཡོད་ལ། འདོན་མཁན་གྱི་གཙོ་བོ་ཞུགས་ཀྱང་ཡིན། ད་ལྟ་ཁོ་བྷར་སྒྲན་གྱི་སློབ་པ་བྱས་ཏེ། ཁེ་གཉེར་ཁང་ཆེན་པོ་རྒོས་རྒོ་དང་། ཨ་མ་ཟོན་ལྟ་བུ་རོགས་པ་བྱས་ཤིང་། ཁོ་ཚོས་འདོད་པ་ལྟར། མང་གཙོ་དང་གཅིག་བསྡུ། གུང་ཁྲན་གྱི་འབྲེལ་བ་མེད་པ། སུ་ཡིས་ཁེ་ཕན་སྤྲད་ན། དེ་ལ་ཚོང་འབྲེལ་བྱེད་རྒྱུའི་ལྟ་གྲུབ་བཟུང་ཡོད། ཁོས་ཀྱང་ཁེ་གཉེར་ཁང་ཆེན་པོ་ཚོའི་མགྲིན་ཚབ་པ་བྱས་ཏེ། བྷར་སྒྲན་ལ་སྐུལ་མ་བཏང་ནས་ཨ་རྒྱའི་འབྲེལ་སྐྱར་མཐུད་བྱེད་རྒྱུ་དང་། ཁེ་གཉེར་ཁང་ཆེན་པོ་དེ་དག་གིས་ཨ་རི་ལ་དབང་སྒྱུར་བྱེད་རྒྱུར་ནུས་ཤུགས་འདོན་གྱི་ཡོད།

 

བྷར་སྒྲན་གྱིས་ཁོ་འདེམ་དགོས་དོན་ནི་བྷར་སྒྲན་ལ་ཁེ་གཉེར་ཁང་ཆེན་པོ་ཚོ་དང་། ཨ་རིའི་ཕྱུག་བདག་དང་པོ་རྗ་ཧྥུ་བྷེལ་གཟའ་དང་། གཉིས་པ་བྷེལ་གྷེ་ཊི། རྒོས་རྒོ་དང་། ངོ་དེབ། ཁྲོས་ཊ་སོགས་ཀྱིས་རྒྱབ་སྐྱོར་བྱས་བས་རེད། བྷར་སྒྲན་གྱིས་དེ་སྔོན་ངས་གཞང་ཚོང་མ་ལྟར་བྱས་ཏེ་མི་ཆེན་ཚོའི་ངོ་སྲུང་ཆེད་དུ་རྒྱུག་གི་ཡོད་ལ། སུ་ཞིག་གིས་ང་ལ་ཁེ་ཕན་སྤྲད་ན། ངས་དེ་ཡི་ཆེད་དུ་ལས་དོན་བསྒྲུབས་ཀྱི་ཡོད་ལབ་ཡོད་པས། ད་ལྟ་ཁོ་ལ་ཁེ་ཕན་སྤྲད་མཁན་གྱི་རྒྱབ་སྐྱོར་བྱེད་མཁན་ཚོའི་ཆེད་དུ་ཁོས་བློན་ཆེན་འདེམ་གྱི་ཡོད་པ་གསལ་བོ་རེད། དེར་བརྟེན། ཁོའི་རྒྱབ་སྐྱོར་བ་འདི་འདྲ་མང་པོ་ཞིག་གིས་རྒྱ་ནག་གི་སྒང་ལ་འཇམ་པོ་བྱེད་དགོས་ཡོད་བརྗོད་ཀྱི་ཡོད་པས་ཁོ་གཅིག་བུ་ཡིས་མཁྲེགས་པོ་བྱེད་མི་ཐུབ་པ་གསལ་བོ་རེད། འོན་ཀྱང་། ཨ་རིའི་མི་མང་གིས་ད་ལྟ་ནད་ཡམས་ཀྱི་རྐྱེན་དང་། ཁྲོ་སྲིད་གཞུང་གི་རྐྱེན་པས་རྒྱ་ནག་གིས་ཁོང་ཚོར་ཉེན་ཁ་སྤྲད་ཀྱི་ཡོད་པའི་གནས་སྟངས་སྔ་ལས་ཤེས་མཁན་མང་དུ་འགྲོ་བཞིན་ཡོད་པ་མ་ཟད། ལྷག་པར་དུ་སྤྱི་མཐུན་ཚོགས་པས་རྒྱ་ནག་ལ་གདོང་ལེན་བྱེད་ཀྱི་ཡོད་པས། རྒྱ་ནག་གི་གནས་སྟངས་ཨ་རིའི་སྤྱི་ཚོགས་ཀྱི་ནང་དུ་དབུ་མ་དང་། རང་བཙན་ལྟ་བུར་ངོ་བོར་འགྱུར་ངེས་རེེད། དེ་ནི་མང་གཙོ་ཚོགས་པ་དང་། སྤྱི་མཐུན་ཚོགས་པ་གཉིས་ཀྱི་བར་ལ་ཐེ་ཝན་གྱི་རང་བཙན་འདོད་མཁན་དང་། མི་འདོད་མཁན་ལྟ་བུ་འགྱུར་ངེས་བས་སུ་ལ་རྒྱལ་ཁ་ཐོབ་མིན་ནི་སྒུག་སྡོད་ཀྱི་གནས་སུ་མཆིས།