ངའི་སྙིང་དང་འདྲ་བའི་བུ་མོ་དབྱངས་འཛོམས་ལགས།
འུ་ཕ་བུ་གཉིས་ལ་ཟློག་མེད་ལས་ཀྱི་བར་ཆད་ཅིག་གིས་ཁྱིམ་ཚང་གཅིག་ནས་མཉམ་དུ་སྡོད་དབང་མ་བྱུང་ཞིང་། ངས་གཏན་ནས་ཁྱོད་རང་གཏོང་མི་ཐུབ་ཀྱང་། ཞེ་ལའང་འཆར་མ་མྱོང་བའི་ཧ་ཅང་གདུག་རྩུབ་ཀྱི་འོག་ནས་ང་ལ་དབང་ཕྲ་མོ་ཙམ་ཡང་མེད་པར་རང་གི་གཅེས་པའི་སྲོག་དང་ཁོག་གི་སྙིང་བཞིན་ཁྱོད་རང་བྲལ་སོང་བས། དུས་ཚོད་སྐར་ཆ་རེ་རེ་ཡང་ཁྱོད་རང་སེམས་དང་འབྲལ་མ་མྱོང་བའི་ཁྱོད་ཀྱི་ཕ་རྒན་གྱིས་སྙིང་གི་བུ་མོ་ཁྱོད་དང་བྲལ་བའི་གདུང་བ་མ་བཟོད་པར། ཁྱོད་ལ་འཕྲིན་ཡིག་ཅིག་བྲིས་ཡོད། ཁྱོས་འཕྲིན་ཡིག་འདི་ཀློག་ཐུབ་དུས། ཁྱོད་ཀྱིས་རང་ཉིད་ཀྱི་འདས་དོན་ལ་བསམ་བློ་ཞིབ་མོ་གཏོང་བར་ང་ལ་ཡིད་ཆེས་ཡོད། མ་ཟད་རང་ཉིད་ཀྱི་མེ་ཚེ་ལའང་འགྱུར་ལྡོག་གཏོང་ཐུབ་པར་ཡང་ང་ལ་ཡིད་ཆེས་ཧ་ཅང་ཟབ་མོ་ཡོད།
གཅེས་ཕྲུག ཁྱོད་ནི་མ་གཞི་ནས་བོད་ཀྱི་བུ་མོ་རིག་རྒོད་ཅིག་ཡིན། ངོ་གདོང་དང་བྱད་བཞིན།ཐ་ན་ཉམས་འགྱུར་ཚུན་ཆད་ཀྱང་བོད་ཀྱི་གཤིས་དང་དམ་དུ་སྦྲེལ་ཡོད་པ་ཞིག་ཡིན་པ་ང་རང་གིས་གསལ་བོར་ཤེས་ཡོད། ཁྱོད་ཀྱི་ཁྲག་རྒྱུན་ནང་དུ་ཕ་ཡི་རེ་བ་དང་ན་ཟུག་སིམ་ཡོད་པའང་ལོ་ཟླ་དང་འགྲོགས་ནས་རིམ་བཞིན་ཁྱོད་ཀྱིས་ཚོར་བར་ང་ལ་ཡིད་ཆེས་གཏིང་ཟབ་ཡོད། ངས་འཕྲིན་ཡིག་འདི་འབྲི་དུས་ཏག་ཏག་ཁྱོད་རང་ལོ་བདུན་ཡིན། ཁྱོད་ཀྱི་ཨ་མ་ལ་ངས་གཉེན་འཐོར་བྱེད་པར་ཁས་ཡོངས་སུ་བླངས་ནས་གྲོས་ཐག་བཅད་རྗེས་བྲིས་པ་ཞིག་ཡིན། ཁྱོད་ཀྱི་མི་ཚེ་འདིའི་སློབ་གསོའི་འོས་འགན་མ་ཐེག་པའི་ཕ་རྒན་ཞིག་གིས། ཁྱོད་ཀྱི་མ་འོངས་པའི་ལོ་ཟླར་བྲིས་པའི་སེམས་ནང་གི་ཁ་ཆེམས་ལྟ་བུ་ཞིག་ཀྱང་ཡིན། དེ་བས་ནམ་ཞིག་ཁྱོད་ཀྱིས་འཕྲིན་ཡིག་འདི་ཀློག་ཐུབ་དུས། ངེས་པར་དུ་གཟབ་ནན་ངང་ཐེངས་གཅིག་ཀློག་རོགས་ཞུས་དང་། དེ་དུས་འཇིག་རྟེན་འདིར་ཁྱོད་ཀྱི་ཕ་རྒན་དངོས་སུ་འཚོ་བཞུགས་ཡོད་མེད་གང་ལྟར་ཡང་། ཕ་རྒན་གྱིས་ཁྱོད་ལ་བཟུང་བའི་རེ་བ་ཡོད་ཚད་འཕྲིན་ཡིག་འདིའི་ནང་དུ་གཏམས་ནས་མ་འོངས་པའི་སྙིང་ཉེ་བའི་བུ་མོ་ཁྱོད་ལ་རེ་བ་ཆེན་པོས་བཞག་ཡོད།
གཅེས་པའི་བུ་མོ་ལགས། ངས་འཕྲིན་ཡིག་འབྲི་བའི་དེ་རིང་གི་ཉིན་མོ་འདི་ནས་བཟུང་ལོ་བཅུ་ཙམ་འདས་ན། དེ་དུས་ཁྱོད་རང་གཞི་ནས་ལོ་ན་བཅུ་བདུན་ལ་སོན་ཡོད། སྐབས་དེར་ཁྱོད་རང་འཚར་ལོངས་བྱུང་ནས་དོན་དག་མང་བོ་ཞིག་ལ་རང་རྟོགས་ཀྱིས་བསམ་བློ་བཏང་ནས་གདམ་ག་བྱེད་ཐུབ་པའི་དུས་ལ་ཐོན་ཡོད་པར་མ་ཟད། ཁྱོད་ཀྱིས་ཕ་རྒན་གྱིས་རེ་བ་ཆེན་མོའི་ངང་བྲིས་པའི་འཕྲིན་ཡིག་འདིའི་ནང་དོན་ལའང་གོ་བ་ཡོངས་སུ་ལེན་ཐུབ་པར་ཡིད་ཆེས་ཡོད་ལ། བོད་ཀྱི་བུ་མོ་རིག་རྒོད་ཁྱོད་ཀྱིས་ཕ་རྒན་གྱི་རེ་བ་དང་ན་ཟུག་ཟབ་མོའང་དེ་དུས་རྟོགས་ངེས་པར་རེ་བ་བྱས་ཡོད། དེ་དང་བསྟུན་ཁྱོད་ཀྱིས་རང་ཉིད་ཀྱི་ཡབ་ཆེན་ནི་བོད་མི་དག་མ་ཞིག་ཡིན་པ་དང་། རང་གི་སྐད་ཡིག་དང་འདུ་ཤེས་ལ་སྲོག་ལས་ཀྱང་རྩིས་འདང་ཆེ་བའི་བོད་མི་འབྲོག་པ་ཞིག་གི་བུ་མོ་ཡིན་པ་ཤེས་ངེས་པས། དེ་དུས་ཁྱོད་ཀྱི་རུས་པའི་གཏིང་ལ་བགོས་པའི་ཕ་རྒན་གྱི་བག་ཆགས་ཟད་དེ། གང་ཞིག་ཤེས་དགོས་པ་དང་བསླབ་དགོས་པ་སོགས་ཀྱི་ཕྱོགས་ལའང་བསམ་བློ་ཉུང་ཙམ་གཏོང་ཐུབ་པར་རེ་བ་ཡོད།
ངའི་གཅེས་པའི་བུ་མོ་ལགས། ཁྱོད་ཀྱིས་ཤེས་གསལ་བཞིན།ཁྱོད་ཀྱི་ཕ་རྒན་ནི་བོད་མི་འབྲོག་པ་ཞིག་ཡིན། རྩྭ་ཐང་ནས་ཕྱུགས་ཟོག་འཚོས་ནས་འཚོ་བ་རོལ་བའི་ཁྱིམ་ཚང་ཞིག་ནས་སྐྱེས་པའི་འབྲོག་པ་དཀྱུས་མ་ཞིག་ཡིན་ལ།རིམ་བཞིན་ན་ཚོད་དང་བསྟུན་ནས་གྲོང་ཁྱེར་སོགས་སུ་སློབ་སྦྱོང་ལ་འགྲོ་མྱོང་བ་ཞིག་ཀྱང་ཡིན། ཡིན་ནའང་ཁྱོད་ཀྱི་ཕ་རྒན་ནི་རང་གི་མི་རིགས་དང་སྐྱེ་ཁོངས་ལ་སྙིང་ནས་དགའ་ཞིང་།རང་གི་སྐད་ཡིག་དང་རིག་གནས་གོམས་སྲོལ་ལ་ཧ་ཅང་རྩིས་མཐོང་ཆེ་བ་ཞིག་ཡིན་པས།སྐྱེ་བ་འདིར་ང་རང་བོད་མི་ཞིག་ཏུ་དུ་སྐྱེས་པ་དང་། བོད་མི་རིགས་ཀྱི་རིག་གནས་ཀྱི་ཕང་ནས་འཚར་ལོངས་བྱུང་བ་ནི་ཕ་རྒན་ངའི་མི་ཚེ་འདིའི་གཟི་བརྗིད་ཉག་གཅིག་ཏུ་བསམ་བཞིན་ཡོད། དེ་བས་རང་ཉིད་ཀྱི་མི་ཚེ་འདིར་རང་ཉིད་དང་རང་གི་རིགས་རྒྱུད་བོད་མི་དག་མ་ཞིག་ཡོང་བར་རེ་བ་ཆེན་པོ་བརྒྱབ་མྱོང་བ་ཡིན་ལ། འདི་ནི་མི་ཚེ་འདིར་རང་ལ་ལས་ཀྱིས་བགོས་པའི་འོས་འགན་དེ་ཡང་ཡིན་པར་བསམ་ཡོད།
གཅེས་པའི་བུ་མོ་གཡང་འཛོམས་ལགས། འུ་ཕ་བུ་གཉིས་ཀྱི་ལས་དབང་ནི་ཧ་ཅང་དམིགས་བསལ་བ་ཞིག་སྟེ། རིགས་རྒྱུད་གཞན་འགྱུར་བྱུང་བ་གྲངས་མེད་པའི་ཁྲོད་ནས་ཀྱང་ཧ་ཅང་དམིགས་བསལ་བ་ཞིག་ཡིན། དེ་ནི་མང་བོ་ཞིག་སྡུག་བསྔལ་དང་ན་ཟུག་ཅི་ཡང་མེད་པར་ཤེས་མེད་ཚོར་མེད་ངང་གཞན་འགྱུར་འབྱུང་བཞིན་ཡོད་ཅིང་། ཕ་རྒན་ང་ལ་མཚོན་ན་རང་གི་ཤ་ཁྲག་གི་རིགས་རྒྱུད་ཅིག་གཞན་འགྱུར་བྱུང་བའི་སྡུག་བསྔལ་ནི་བུ་མོ་ཁྱོད་ཤི་ལ་བ་ལས་ཀྱང་ལྕི་བ་ཡིན་ལ། དུས་རབས་འདིར་བོད་མི་མང་བོ་ཞིག་ལ་ང་ལྟ་བུའི་ན་ཟུག་ཡོད་པའང་གདོན་མི་ཟ། འདི་ལྟར་འུ་ཕ་བུ་གཉིས་ཀྱི་འཇིག་རྟེན་ནི་ལས་དབང་བཙན་པོས་དངོས་སུ་ཆ་གཉིས་སུ་བགོས་ནའང་། སྙིང་ཉེ་བའི་བུ་མོ་ཁྱོད་ནི་ཕ་རྒན་ངའི་སེམས་ནས་ནམ་ཡང་བོད་ཀྱི་བུ་མོ་རིག་རྒོད་ཅིག་ཡིན་ལ། ཁྱོད་ཀྱི་ཤ་རུས་ཁྲག་རྒྱུན་གྱི་གཏིང་ལ་ཕ་ཡི་འདུ་ཤེས་ཀྱི་སྲ་མཁྲེགས་སིམ་ཡོད་པས། ནམ་ཞིག་རང་ཉིད་ཀྱི་ལས་དབང་ཁ་ལོ་བསྒྱུར་ཐུབ་པའི་བོད་པའི་བུ་མོ་མཛངས་མ་ཞིག་ཡིན་པར་ཕ་རྒན་ང་ལ་ཡིད་ཆེས་ཡོད། ངའི་སྙིང་དང་འདྲ་བའི་བུ་མོ་ལགས།
གཅེས་པའི་བུ་མོ་ལགས། སྤྱིར་རང་གི་རིགས་རྒྱུད་གཉུག་མར་གནས་རྒྱུ་དེ་ནི་དོན་འཁྱོངས་དཀའ་ལ་རླབས་ཆེ་བ་ཞིག་མིན་ནའང་། དུས་རབས་ཀྱི་འགྱུར་ལྡོག་དང་ད་ལྟའི་གནས་བབ་ཀྱི་ངོས་ནས་རིགས་རྒྱུད་ཁེ་གཙང་དུ་གནས་རྒྱུ་དེ་ནི་ང་ཚོ་ལ་རླབས་ཆེ་བའི་དོན་ཆེན་ཞིག་ཏུ་གྱུར་ཡོད་ཅིང་།འཇིག་རྟེན་འདིར་འཁྲུངས་མྱོང་བའི་སྐྱེས་པུ་རླབས་ཆེན་དག་ལའང་གཅིག་གྱུར་གྱི་བཞེད་དགོངས་ཤིག་ཡོད་པར་མངོན་ཏེ། དེ་ནི་རང་གི་སྐྱེ་ཁོངས་དང་རིགས་རྒྱུད་གཙང་མར་བསྐལ་བའི་བར་དུ་གནས་རྒྱུ་དེ་ཡིན་པར་སྣང་བས། སུ་ཞིག་གིས་རང་གི་རིགས་རུས་ཀྱི་མཆེད་ཁུངས་སྟོར་ནས་རིགས་ཚོགས་གཞན་དང་འདྲེས་པས། རྩ་བའི་ཆ་ནས་རང་ལ་འོས་སུ་བབས་པའི་མི་ཚེ་ལེགས་འགྲུབ་མ་བྱུང་བ་ཡིན་ལ། ཁྱོད་ཀྱི་ཟུངས་ཁྲག་གི་བཞུར་རྒྱུན་ལས་མེས་པོའི་རིག་གནས་མང་བོ་ཞིག་གི་དྲན་པའི་རྒྱུན་ཆད་ཅིང་། རིག་གནས་གཞན་གྱི་རྗེས་མ་ཆོད་པས་ཁྱོད་ཀྱི་བསམ་སྤྱོད་ལ་ཆེས་ཉེན་ཁ་ཆེ་བའི་དུས་ཀྱང་བྱུང་ཡོད་པར་མ་ཟད། དེ་ནས་བཟུང་ཁྱོད་དང་ཁྱོད་ཀྱི་རིགས་རྒྱུད་གཏད་སོ་མེད་པའི་ཕུང་གསུམ་པའི་མི་ཚོགས་ཤིག་ཏུ་གྱུར་ཚར་བའང་ཡིན། དོན་ངོ་མ་བཤད་ན་ཕ་རྒན་ངས་ཁྱོད་རང་མི་ཡུལ་འདིར་རང་གི་བུ་མོ་རུ་བསུ་བའི་དམིགས་ཡུལ་ཡང་ཁྱོད་རང་བོད་མོ་དག་མ་ཞིག་ཡོང་ནས་རང་གི་རིགས་རྒྱུད་དང་ཡུལ་ཆོས་གཉུག་མར་སྲུང་བ་དེ་ཙམ་ལས་མ་འདས་པ་སྨྲོས་ཅི་དགོས་ཨང་།
གཅེས་ཕྲུག་ལགས། གནམ་འོག་འདིར་རང་གི་སྐྱེ་ཁོངས་དང་རུས་རྒྱུད་ལྟོ་རྒྱབ་ཙམ་གྱི་དོན་དུ་གང་འདོད་དུ་གཞན་འགྱུར་རྒྱག་པ་ནི་ཧ་ཅང་འཇིགས་སུ་རུང་བའི་གནས་ཡིན་ལ། དེ་ལས་ཀྱང་རང་གི་སྐྱེ་ཁོངས་དང་འབྲེལ་བའི་ཡོད་ཚད་རྗེས་ལུས་དང་བཙོག་ཏུ་ལྟ་བ་ནི་རང་ཉིད་ཁྱུ་རུ་གྱུར་ཏེ་བདག་པོ་གཞན་ལ་བཅོལ་བའི་མཚན་མ་ཉག་གཅིག་ཡིན་ཏེ། རང་གི་མེས་པོ་དང་རང་གི་བླ་སྲོག་ལ་ངོ་ལོག་བྱས་ཟེར་བའང་འདི་ལས་གཞན་དུ་མེད། རིགས་རྒྱུད་མི་འདྲ་བ་མཉམ་དུ་སྡེབ་པས་ད་གཟོད་སྐྱི་གཡའ་བའི་དོན་དག་ཅིག་གི་འགོ་བརྩམས་པ་ཡིན།ཁོ་ཚོས་རིམ་བཞིན་རང་རང་གི་ཡུལ་སྲོལ་བོར།སྐད་ཡིག་བོར།རིག་གནས་བོར།དད་མོས་བོར། ཕ་ཡུལ་བོར།
མཐར་རང་ཉིད་བོར་ནས་སེམས་ཁོང་སྟོང་བ་ཆགས་པའི་ཚོགས་སྡེ་ཞིག་ངང་གིས་གྲུབ་འགོ་བརྩམས་པ་ཡིན། དེ་ནི་མཐར་དེད་ན་རིགས་རྒྱུད་དང་མཉམ་དུ་བརྒྱུད་པའི་མིའི་རིགས་ཀྱི་གནའ་བོའི་དཔལ་ཡོན་གྱི་ཉིང་བཅུད་མང་བོ་ཞིག་དང་ཁ་གྱེས་པའི་ཆེས་འཇིགས་རུང་གི་གོལ་ལམ་དུ་འཁྱམ་པ་ཡིན་པས། རིགས་རྒྱུད་གང་དེའི་གནམ་འོག་འདི་ནས་རང་ཉིད་ཀྱི་བླ་སྲོག་བོར་བའི་ཡ་ང་བའི་ཆག་སྒོ་ཡིན་པར་མ་ཟད།ཕྱོགས་གཅིག་ནས་མི་རིགས་ཤིག་གི་སྐྱེ་རྒྱུད་བདེ་ཐང་མ་ཡོང་བའི་ཆག་སྒོ་རུའང་བགྲང་ཆོག་པ་ཡིན། གོ་སོང་ངམ་།
ངའི་སྙིང་ལས་སྐྱེས་པའི་བུ་མོ་ལགས།
རང་གི་རིགས་རྒྱུད་གང་ལ་འབྲེལ་བའི་མི་རིགས་དེའི་སྐད་རིགས་དང་རིག་གནས་མ་བརྗེད་པ་དང་། དེ་ལ་ཧ་ཅང་དགའ་ཞེན་གནང་ནས་བརྩི་སྲུང་བླ་མེད་གནང་བ་ནི། རང་ཉིད་མི་རིགས་དང་རྒྱལ་ཁབ་གང་གི་ནང་དུ་བསྡད་ཀྱང་གཟི་བརྗིད་དང་ལྡན་པ་ཡིན་ཏེ། རང་གི་སྐྱེ་ཁོངས་དང་མི་རིགས།རང་གི་སྐད་རིགས་དང་རིག་གནས་ལ་བློ་ལོག་བྱས་མེད་པ་དང་།རང་གི་མེས་པོ་དག་ལ་མཚན་སྨོད་ཀྱང་བཞག་མེད་པ་ཡིན་པས། དེས་ད་གཟོད་ང་ཚོ་བོད་མི་རེ་རེ་ལ་ང་རང་བོད་པ་ཞིག་ཡིན་ཞེས་བརྗོད་པའི་ཐོབ་ཐང་ལ་གཟི་བརྗིད་ཀྱི་དོན་སྙིང་དང་ལྡན་པ་བྱས་ཡོད་ཅིང་།མ་ཟད་ཁྱེད་ནི་ས་སྒང་གི་ཡང་རྩེའི་རི་མཐོ་ལུང་ཟབ་ཅིག་ཏུ་ཁུ་སིམ་མེར་འཚོ་སྡོད་གནང་ཡང་།འཛམ་གླིང་གི་སྐྱེ་བོ་ཡོངས་ཀྱིས་བོད་ཅེས་ཧ་ཅང་གི་ཆེ་མཐོང་སྤྲོད་སའི་མི་རིགས་ཤིག་གི་རྒྱུད་དུ་སྐྱེས་ཡོད་པས། འཛམ་གླིང་གི་མི་རིགས་འདྲ་མིན་མང་བོའི་ཁྲོད་དུ། རང་ཉིད་ཀྱི་མགོ་བོ་མཐོན་པོར་འགྲེང་ནས་ང་ནི་བོད་པའི་རིགས་རྒྱུད་དུ་སྐྱེས་སོ་ཞེས་རང་གི་སྐྱེ་ཁོངས་ཀྱི་ང་རྒྱལ་སྙིང་ལ་བཅགས་ནས་སྟོབས་དང་ལྡན་པར་གསོན་ཆོག་པ་ཡིན། སྙིང་ཉེ་བའི་བུ་མོ་དབྱངས་འཛོམས་ལགས།
ཁྱོད་ནི་ནམ་ཡང་ཨ་ཕའི་སེམས་ནས་བོད་ཀྱི་བུ་མོ་རིག་རྒོད་ཅིག་ཡིན་ལ།
རང་གི་ལས་དབང་ལ་ཁ་ལོ་བསྒྱུར་ཐུབ་པའི་བུ་མོ་མཛངས་མ་ཞིག་ཀྱང་ཡིན་ཤག་བྱས་ཡོད། སྙིང་ཉེ་བའི་བུ་མོ་ཁྱོད་ཀྱི་ཤ་ཁྲག་རུས་གསུམ་ནི་བོད་དང་འབྲེལ་ནས་ཡོད་པས། རང་གི་ཤ་ཁྲག་རུས་གསུམ་ལ་ནམ་ཡང་བསླུ་བྲིད་གཏོང་ཐུབ་པ་ཞིག་མིན། རང་གི་ཤ་ཁྲག་རུས་གསུམ་གྱི་མཆེད་ཁུངས་རིགས་གནས་དང་བཅས་པ་སྣང་མེད་དུ་བཏང་བའི་ཉིན་དེ་ནས་བཟུང་།
ཁྱོད་ནི་རིགས་རྒྱུད་ཀྱི་ང་རྒྱལ་དང་གཟི་བརྗིད་ཁྲོད་གསོན་པའི་འཛམ་གླིང་གི་མི་རིགས་མང་བོའི་ཁྲོད་དུ་ཆེས་ངོ་གནོང་དགོས་པའི་མི་ཡུལ་གྱི་འཁྱམ་ལྡོམ་ངོ་མ་ཞིག་ཏུ་གྱུར་ཚར་བ་ཡིན་ལ།མི་ཚེ་འདིའི་ཁྱོད་ཀྱི་གཟི་བརྗིད་དང་།
ཆེ་མཐོང་།ལ་རྒྱ་སོགས་ཡོངས་སུ་ཤོར་ཚར་ཏེ། མི་རིགས་མང་བོའི་ཁྲོད་ནས་རང་གི་སྐྱེ་ཁོངས་ཀྱི་ང་རྒྱལ་དང་ཁ་བྲལ་བའི་བོད་མི་ཕྱེད་ཀ་ཞིག་ཏུ་གྱུར་ཡོད་པ་ཡིན།
དེ་བས་འུ་ཕ་བུ་གཉིས་ལ་མཚོན་ན་མི་ཡུལ་འདིར་བོད་ཟེར་བ་འདི་ལས་གལ་ཆེ་བའི་གཉེན་ཚན་ཞིག་གང་དུའང་འཚོལ་རྒྱུ་མེད་དེ།
གནམ་འོག་འདིར་ཆེས་བདེ་སྐྱིད་དང་དོན་སྙིང་ལྡན་པ་ནི་རིགས་ཀྱི་བརྩེ་དུང་ཁྲོད་སྐྱེས་ནས་འཆི་བ་དེ་ཡིན་ཞེས་ཕ་རྒན་ངས་ཁ་ཚོན་བཅད་ནས་སྨྲ་སྤོབས། སྙིང་ཉེ་བའི་བུ་མོ་ལགས།
ནམ་ཡང་ཕ་རྒན་ངས་བོད་མི་དག་མ་ཟེར་བ་ཞིག་ཁྱོད་ལ་ཡང་ཡང་གླེངམྱོང་། ཁྱོད་ཀྱི་སེམས་ནས་བོད་མི་དག་མ་ཟེར་བ་འདི་ལ་གོ་བ་གསལ་བོ་ཞིག་མི་ལོན་ནའང་ཐང་སྟེ། དེ་ནི་ཅི་ཁག
ཁྱོད་ལ་སྙིང་ཉེ་བའི་ཁྲོད་དུ། ཁྱོད་ཀྱི་ཕ་རྒན་མ་གཏོགས་པའི་ཁྱོད་ལ་བོད་ཅེས་པ་འདི་ལ་འགྲེལ་བཤད་ཡང་དག་རྒྱག་ཤེས་མཁན་ཞིག་དང་།ཡང་ན་འགྲེལ་བཤད་ཡག་པོ་ཞིག་རྒྱག་པར་རེ་བ་བྱེད་མཁན་ཞིག་ཀྱང་གཏན་ནས་མེད།
ཐ་ན་ཁྱོད་ཀྱི་ཨ་མར་ཡང་གནད་དོན་འདི་ཁྱོད་ལ་གསལ་བཤད་རྒྱག་པའི་བློ་ཁོག་དང་མིག་རྒྱང་གཏན་ནས་མེད་པ་ངས་ཤེས་ཡོད། ཁོ་ཚོ་ནི་ཁྱོད་ལ་སྙིང་རབ་ཏུ་ཉེ་ན་ཡང་།གནད་དོན་འདིའི་ཕྱོགས་ལ་ཁོ་ཚོས་གཏན་ནས་ཁ་ཡ་བྱེད་མི་ཐུབ་སྟེ།ཁོ་ཚོ་ནི་ན་ཟུག་དང་ཞེན་ཆགས་ཅི་ཡང་མེད་པར་སྔ་མོ་ནས་བོད་དང་བར་ཐག་རིང་དུ་བཀྱེད་ཡོད་པ་ཡིན། དོན་ངོ་མ་བཤད་ན་ཁྱོད་ལ་སྙིང་རབ་ཏུ་ཉེ་བའི་ཁོ་ཚོས་ཁྱོད་ལ་ངོས་འཛིན་དུ་བཅུག་པའི་བོད་མི་ཡང་། བོད་ཀྱི་སྐད་དང་རིག་གནས་འདུ་ཤེས་སོགས་དང་རྩ་བ་ནས་འབྲེལ་བ་མེད་པའི་བོད་ཀྱི་མིང་ཙམ་ཁུར་བའི་ཚོགས་སྡེ་ཞིག་ལ་ངོས་འཛིན་དུ་བཅུག་ཡོད་པ་ཡིན་ལ།ངས་ཁྱོད་ལ་སེམས་ཁུར་ཧ་ཅང་ཆེ་བ་ཡང་རྒྱུ་མཚན་འདི་ལ་ཐུག་ཡོད། ཁོ་ཚོའི་སེམས་ཁོང་ན་ད་དུང་ཁོ་ཚོ་བོད་ཡིན་སྙམ་པའི་འདུ་ཤེས་ཙམ་གནས་ཡོད་ཀྱང་། ཅུང་ཚབ་ཆེན་གྱི་སྐད་ཆ་ཞིག་བཤད་ན། དོན་ངོ་མ་ཁོ་ཚོ་དང་ཁོ་ཚོ་ནི་མི་རིགས་གང་ལའང་མི་གཏོགས་པའི་རིགས་རྒྱུད་ཕུང་གསུམ་པ་ཞིག་ཏུ་སྔ་མོ་ནས་གྱུར་ཚར་ཡོད། ངོ་མ་བཤད་ན་གནད་དོན་འདིས་འུ་བཟའ་མི་གསུམ་གྱི་ཁྱིམ་གཞིས་དྲོད་མོ་དེ་སིལ་བར་གཏོར་སོང་བ་ཡིན།དེ་ནི་རིག་གནས་ཀྱི་ལྟ་བའི་རིན་ཐང་ལ་ཤར་ནུབ་ལྟ་བུའི་ཁྱད་པར་ཤོར་སོང་བའང་ཡིན་ལ། གཞན་གྱི་རིག་གནས་དང་འདུ་ཤེས་ཀྱིས་སླད་པའི་སྒེར་སེམས་ཀྱི་གདུག་རྩུབ་ཅིག་ཀྱང་འུ་ཕ་བུ་གཉིས་ཀྱི་མགོ་ཐོག་ལ་ལྷུང་སོང་བ་ཡིན། དེ་བས་ཁྱོད་ཀྱི་ཕ་རྒན་གྱིས་ཁྱོད་ལ་ཁ་ཆེམས་ལྟ་བུའི་འཕྲིན་ཡིག་འདི་འབྲི་དགོས་པའི་གནད་འགག་ཀྱང་འདི་ལ་ཐུག་ཡོད། འཕྲིན་ཡིག་འདིས་ནམ་ཞིག་ཁྱོད་ཀྱི་མི་ཚེའི་ལམ་ག་བསྒྱུར་བར་རོགས་འདེགས་ཀྱི་ནུས་པ་བླ་མེད་ཐོན་པའང་ང་ལ་ཡིད་ཆེས་ཡོད། གོ་སོང་ངམ་།
ངའི་གཅེས་པའི་བུ་མོ་དབྱངས་འཛོམས་ལགས།
སྙིང་ཉེ་བའི་ཁྱོད་རང་བོད་ཀྱི་ཕ་རྒན་ཞིག་གི་བུ་མོ་ཡིན་པས། ཁྱོད་ཀྱིས་ནམ་ཞིག་བོད་ཅེས་པ་ངོས་འཛིན་ཡང་དག་པ་ཞིག་ཡོང་ནས་རང་ཉིད་ཀྱི་ལས་དབང་ལ་ཁ་ལོ་བསྒྱུར་བའི་ཆེད་དུ་འཕྲིན་ཡིག་འདི་བྲིས་ནས་ཁྱོད་ལ་བརྡ་སྟོན་འདོད་པའང་ཡིན། ཁྱོད་ཀྱིས་འཕྲིན་ཡིག་འདི་བརྒྱུད་ནས་ཕ་རྒན་གྱི་རེ་བ་དང་རང་གི་ལས་དབང་གི་གནས་བབ་ཚོར་རྒྱུ་དེ་ཧ་ཅང་གལ་ཆེ་བ་ཡིན། ཁྱོད་རང་ནར་སོན་ནས་བསམ་ཤེས་དུས། བོད་དང་འབྲེལ་བའི་ལོ་རྒྱུས་མང་ཙམ་བཀླག་རོགས་གནོང་དང་། ཁྱོད་ཀྱིས་གཟབ་ནན་ངང་མཚན་སྙན་འཛམ་གླིང་དུ་ཁྱབ་མྱོང་བའི་མི་རིགས་ཤིག་གི་གསང་གསུམ་ག་ལེར་ཡང་ཡང་བཀླགས་ནས་རང་གི་སྐྱེ་ཁོངས་ཀྱི་གཟི་བརྗིད་ག་ལེར་ངོས་ཟིན་པར་བྱ་དགོས་པར་མ་ཟད།རང་ཉིད་བོད་མི་རྣམ་དག་ཅིག་ཡིན་མིན་ལ་བསམ་བློ་ཡང་ཡང་གཏོང་དགོས་ཤིང་། རང་གི་ཉེ་འཁོར་ཙམ་ལས་བརྒལ་ཏེ་བོད་མི་བྱིངས་ཡོངས་ལ་འབྲེལ་འདྲིས་དང་རྒྱུས་ལོན་གནང་རོགས་ཞུས་དང་། དེས་ཀྱང་འུ་ཕ་བུ་གཉིས་ཀྱི་མི་ཚེ་འདིའི་རེ་བ་འགྲུབ་པར་ཁྱོད་ལ་ངོས་ཟིན་དང་བློ་རྒྱ། སྙིང་སྟོབས་སྩོལ་ངེས་ཡིན།
སྙིང་གི་བུ་མོ་གཅིག་པུ། ཁྱོད་ཀྱིས་ནམ་ཞིག་རང་གི་མི་རིགས་ཀྱི་ཕྱོགས་ནས། རྡོ་རྗེ་ཕ་ལམ་ལྟ་བུའི་གཞོམ་གཞིག་བྲལ་བའི་རྒྱུ་མཚན་མང་བོ་ཞིག་རྙེད་དེ།གང་ཞིག་ནས་སླེབས་ཤིང་། གང་ཞིག་ལ་འགྲོ་དགོས་པའི་རང་ཉིད།དོན་ངོ་མ་སུ་ཡིན་པ་ངོས་ཟིན་པར་ཞུ་རོགས་གྱིས་དང་། འུ་ཕ་བུ་གཉིས་ཀྱི་ལས་དབང་གི་ཀུ་རེ་ལྟ་བུའི་མི་ཚེའི་འདིའི་གོད་ཆག་འདི་ཟློག་ནས།ནམ་ཞིག་ཁྱོད་རང་བོད་ཡིག་བོད་སྐད་ཤེས་པའི་བོད་མོ་རྣམ་ཅིག་ཡོང་བར་ང་ལ་ཡིད་ཆེས་ཟབ་མོ་ཡོད་དེ། ཁྱོད་རང་ཁྱོད་ཀྱི་ཨ་མའི་མངལ་དུ་འཁོར་མ་ཐག ང་རང་མཆོད་ཁང་དུ་སོང་ནས། ངའི་ཆུང་མའི་མངལ་གྱི་བུ་འདིས་བོད་མི་རིགས་ལ་ཕན་ཐོགས་པར་གྱུར་ཅིག་ཅེས་སྨོན་ལམ་གཙང་མ་བརྒྱབ་པར་མ་ཟད། ཁྱོད་རང་ཐོག་མར་མི་ཡུལ་འདིར་སླེབས་པའི་ཉིན་དེར།ངས་ཁྱོད་རང་པང་ལ་བཟུང་ནས། ཁྱོད་ཀྱི་རྣ་བར་ཤུབ་ཤུབ་ངང་དབྱངས་གསལ་སོ་བཞི་ཐེངས་གཅིག་བཏོན་ཅིང་། ངའི་བུ་མོའི་མི་ཚེ་འདིར་བོད་ཀྱི་རིག་གནས་ལ་དགའ་བའི་བོད་མོ་དག་མ་ཞིག་ཡོང་བར་ཤོག་ཅེས་རྟེན་འབྲེལ་གྱི་བདེན་པ་དཔང་བོ་བཞག་ནས་ངས་སྨོན་ལམ་བཏབ་ཡོད། རྟེན་འབྲེལ་ཆོས་ཉིད་ཀྱི་བདེན་པ་དཀར་པོས་ངེད་ཕ་བུ་གཉིས་མི་བསླུ་བ་ང་ལ་ཡིད་ཆེས་ཡོད། ང་ཤི་ཡང་སེམས་ལ་དེ་ལྟར་བཟུང་ནས་འགྲོ་ངེས་ལ། ཁྱོས་ཀྱང་ནམ་ཞིག་དེ་ལྟར་ཕ་ཡི་སྨོན་ལམ་དང་རེ་བ་ཡིད་ལ་བཅངས་ནས་བོད་མོ་དག་མ་ཞིག་ཡོང་བར་འབད་བརྩོན་གནང་བར་ཞུ།
གཅེས་པའི་བུ་མོ་ལགས། ང་ལས་ལྷག་པའི་ཁྱོད་ལ་སྙིང་ཉེ་བ་ཞིག་འཇིག་རྟེན་འདིར་ཁྱོད་ཀྱིས་རྙེད་དུ་དཀའ་ལ། ཁྱོད་ཀྱི་འཚར་ལོངས་ཁྲོད་ཕ་རྒན་ང་རང་ཁྱོད་ལ་ཧ་ཅང་མཁོ་བའང་ངས་གསལ་བོར་ཤེས། ཡིན་ནའང་འུ་ཕ་བུ་གཉིས་ཁྱིམ་ཚང་གཅིག་ནས་མི་ཚེ་གཏོང་བར་ངས་ནུས་པ་ཡོད་ཚད་བཏང་ཡང་། ད་ནི་ལས་དབང་ལ་མགོ་བོ་མི་སྒུར་ཀ་མེད་ཀྱི་སྐབས་སུ་ཐོན་ཡོད། དོན་ངོ་མ་ཁྱོད་ནི་ཧ་ཅང་བུ་མོ་རིག་རྒོད་ཅིག་ཡིན། ཁྱོད་ཀྱི་རྣམ་རིག་དང་འཆར་སྒོ། གཤིས་སྤྱོད།
རང་རྟོགས་སོགས་ལས་ཕ་རྒན་ང་རང་ལ་རེ་བ་ཆེན་པོ་འཛིན་དུ་བཅུག་ཡོད། ངས་ནམ་ཡང་མ་འོངས་པར་བོད་མི་རིགས་ལ་མཁོ་ངེས་པའི་བུ་མོ་རེ་བ་ཅན་ཞིག་ཡོང་བར་སེམས་ནས་ཚོད་དཔག་བྱ་མྱོང་། སྙིང་ཉེ་བའི་བུ་མོ་ཁྱོད་རང་ནམ་ཡང་རང་རྩིས་དང་རང་རྟོན་གྱི་སེམས་ཁམས་ཧ་ཅང་ཤུགས་ཆེ་བ་ཞིག་ཡིན། ཁྱོད་རང་བྱིས་པ་མང་བོ་དང་མཉམ་དུ་རྩེད་མོར་གཡེང་དུས། ག་དུས་ཡིན་ཡང་ཁྱོད་རང་སྣེ་ཁྲིད་པ་དང་བཀོད་འདོམས་པ་བྱེད་རྒྱུར་དགའ་ཞིང་། བྱིས་པའི་འཇོན་ནུས་བསྡུར་པ་སོགས་ལས་ཀྱང་ནམ་ཡང་ཁྱོད་རང་ཨང་དང་བོར་སྙེག་མཁན་ཞིག་ཡིན། མ་ཟད་ཁྱོད་རང་སྐད་རིགས་དང་སྒྱུ་རྩལ་གྱི་བག་ནུས་ཧ་ཅང་མངོན་གསལ་དུ་ཡོད་པ་ཞིག་ཡིན་ལ། ཁྱོད་རང་ལོ་ལྔ་ལ་སོན་དུས་ད་གཟོད་ཕ་རྒན་ངས་ཨུ་ཚུགས་མཐའ་བསྐྱལ་གྱིས་ཁྱོད་རང་ཁྲིད་ཡོང་ནས་འབྲོག་པ་མང་བོ་རྫོང་མཐར་འདུས་སྡོད་བྱས་པའི་བྱིས་གཉོར་ཁང་ཞིག་ཏུ་བཞག་པ་ཡིན་ལ།བྱིས་གཉོར་ཁང་དེའི་དགེ་རྒན་རེ་རེར་ཁྱོད་ཀྱི་ཕ་སྐད་སློབ་སྦྱོང་གི་ཕྱོགས་ལ་གཟབ་ནན་ངང་ལྟ་རྟོགས་བྱེད་པར་རེ་བཅོལ་དྲག་ཏུ་བྱས་པ་ཡིན། ཁྱོད་ཀྱིས་ཕ་རྒན་གྱི་སེམས་ན་ལྷག་ལྷོག་ཏུ་གདུ་བའི་རེ་བ་དྲོན་མོ་ཡོངས་སུ་ཤེས་པ་འདྲ་སྟེ། ལོ་གཉིས་ཀྱི་རིང་ལ་ཁྱོད་ཀྱི་ཕ་སྐད་ནི་འབྲོག་པའི་བྱིས་པ་ཚོ་དང་མཉམ་པོར་གྱུར་བར་མ་ཟད།ད་དུང་ཨ་ལ་དང་ཨ་ཙི་སོགས་འབྲོག་པའི་ཁ་ཚིག་དག་ཀྱང་ཇི་བཞིན་ལོབས་ཤིང་།རྒྱ་སྐད་བཤད་པ་ནི་ངོ་ཚ་ཞིག་ཡིན་པའི་འདུ་ཤེས་ཤིག་ཀྱང་ཁྱོད་ལ་ངང་གིས་ཆགས་ཏེ། བར་གླགས་ཤིག་ནས་བཟུང་འུ་ཕ་བུ་གཉིས་ཀྱི་ལབ་གླེང་ཁྲོད་ཁྱོད་ཀྱིས་གཏན་ནས་རྒྱ་སྐད་བཤད་མ་མྱོང་ལ།ཕ་རྒན་ངས་སྦྲགས་སྐད་རེ་ཟུང་ཤོར་ནའང་ཁྱོད་ཀྱི་དེ་མ་ཐག་ཨ་ཕ་ཁྱོད་ཀྱིས་རྒྱ་སྐད་བཤད་ཀྱིན་འདུག་ཅེས་ང་ལ་གསལ་འདེབས་ཡང་ཡང་ཞུ། མ་ཟད་གཞན་གྱི་སྔོན་ནས་ཀྱང་ནམ་རྒྱུན་ཁྱོད་ཀྱིས་རྒྱ་སྐད་ནི་གཏན་ནས་མི་ཤེས་པའི་ཚུགས་ཀ་འཛིན་པར་དགའ་བས། ཁྱོད་ནི་མ་གཞི་ནས་རང་གི་ཕ་སྐད་ཀྱི་བག་ནུས་འཐུག་པོ་མངའ་བའི་རྣམ་རིག་རྒོད་པའི་བོད་ཀྱི་བྱིས་པ་ཞིག་ཡིན་པ་ཕ་རྒན་ངས་གསལ་བོར་རྟོགས་ཡོད། དེ་བས་ཁྱོད་རང་ཆུང་དུས་ཀྱི་གཏམ་རྒྱུད་འདི་དག་གིས་ཀྱང་ནམ་ཞིག་ཁྱོད་ལ་རང་གི་ཕ་སྐད་སྦྱོང་འདོད་ཀྱི་དྲན་པ་གསོ་བར་སྐུལ་མ་འདེབས་ངེས་པ་ཡིན། གཞན་ཡང་ཁྱོད་ལ་སུས་ཀྱང་མ་བསླབ་པའི་ལྷན་སྐྱེས་ཀྱི་བྲོ་ཡི་སྟངས་སྟབས་རེ་རེས་ཁུ་སིམ་མེར་ཕ་རྒན་ངའི་ཡིད་དབང་རབ་ཏུ་འཕྲོག་མྱོང་ལ། ཁྱོད་ལ་ད་དུང་གཞན་དང་མི་མཚུངས་པའི་གཤིས་ཀ་ཞིག་ཡོད། ཕ་རྒན་ངས་དེ་ལ་སེམས་ཁུར་བྱས་མྱོང་། དེ་ནི་ཁྱོད་ཀྱིས་ནམ་ཡང་རང་གི་འགྲན་ཡ་ལས་རྣམ་པར་རྒྱལ་དགོས་པའི་སེམས་ཁམས་ཤུགས་དྲག་ཅིག་བཟུང་ཡོད་པ་དེ་ཡིན། ངས་སྐབས་མང་བོར་ཁྱོད་རང་དེས་མ་སྐྱིད་པ་བཟོ་བཞིན་ཡོད་པ་དངོས་སུ་ཚོར་ཡོད། ངའི་སྙིང་ཉེ་བའི་བུ་མོ། ཨ་ཕ་དངོས་སུ་ཁྱོད་ཀྱི་གམ་ན་མེད་པའི་མ་འོངས་པའི་འཚར་ལོངས་ཀྱི་གོ་རིམ་ཁྲོད། རང་ཉིད་ལ་བདག་སྐྱོང་ཡག་པོ་བྱས་ནས་བོད་ཀྱི་བུ་མོ་མཛངས་མ་ཞིག་བཅའ་རོགས་གནོང་དང་།
སྙིང་ཉེ་བའི་བུ་མོ་ཁྱོད་ནམ་ཡང་ཨ་ཕའི་སེམས་ན་ཡོད།
ཉིན་མཚན་དུས་དྲུག་ཏུ་ཨ་ཕའི་སེམས་ཀྱིས་ཁྱོད་ཀྱི་གམ་ན་བལྟས་ཡོད། གཅེས་པའི་བུ་མོ་དབྱངས་འཛོམས་ལགས།
ངས་ཁྱོད་ལ་མི་ཚེ་གཏོང་སྟངས་ཕྱོགས་ནས་ཀྱང་སྙིང་གཏམ་ཁ་ཤས་བཤད་བསམ་ཡོད། བོད་མི་རིགས་ནི་མ་གཞི་ནས་ནང་ཆོས་ལ་རབ་ཏུ་དད་པའི་མི་རིགས་ཤིག་ཡིན་པས།དེས་བོད་མི་རིགས་ཀྱི་མི་རེ་རེའི་སེམས་ཁམས་དྭངས་གཙང་དང་།ལྷད་མེད།བསམ་ཤེས། བདེ་སྐྱིད་དང་ལྡན་པ་བྱས་ཡོད། དེ་བས་དད་པ་ཡོད་པས། ཁྱོད་ཀྱི་འབྱུང་འགྱུར་གྱི་མི་ཚེའི་དཀའ་ཁག་ནང་སེམས་ཁམས་སྟོང་བ་མ་ཡིན་པར་གཟུགས་མེད་ཀྱི་སྟོབས་ཤུགས་ཤིག་གིས་ནམ་ཡང་ཁྱོད་ལ་མགོན་སྐྱབས་བྱ་ཐུབ་ངེས་ཡིན།
དེ་ནི་ཕ་རྒན་ངའི་མི་ཚེའི་ཉམས་མྱོང་ཡང་ཡིན།
མི་ཚེ་འདིར་སོ་སོའི་བསམ་བློ་དང་སྤྱོད་པའི་ངོས་ནས་མི་རབ་འབྲིང་ཐ་གསུམ་དུ་གྱུར་ཡོད་པས། སྐྱེ་བོ་རབ་ནི་གཞན་གྱི་དོན་འབའ་ཞིག་ལ་བསམ་བློ་གཏོང་ཞིང་སྤྱོད་པ་ཡིན།ངས་ཁྱོད་མི་འདི་འདྲ་ཞིག་ཡོང་བར་རེ་བ་འདོན་གྱིན་མེད་ལ། དེ་ནི་ས་སྟེང་འདིའི་སྐྱེ་བོ་ཕལ་མོ་ཆེས་ཧ་ཅང་དཀའ་བ་ཡིན་ལ།འཇིག་རྟེན་འདིའི་ཆེས་དོན་སྙིང་ལྡན་པའང་འདི་ཁོ་ན་ཡིན། སྐྱེ་བོ་ཐ་མ་ནི་རང་དོན་འབའ་ཞིག་ལ་སྤྱོད་ཅིང་།གཞན་གྱི་བདེ་སྡུག་ཡོད་ཚད་སྣང་མེད་དུ་འཇོག་པ་ཡིན། ངས་ཁྱོད་ཀྱི་མི་ཚེ་འདིར་མི་འདི་འདྲ་ཞིག་མི་ཡོང་བར་ང་ལ་ཡིད་ཆེས་ཟབ་མོ་ཡོད་ཅིང་། དེས་མི་ཞེས་པའི་རིན་ཐང་ཡོངས་སུ་བརླགས་ནས་སྒེར་སེམས་ཁོ་ནས་འཚོ་བ་ཡིན་པས།དེ་འདྲ་ལོ་བརྒྱར་བསྡད་ཀྱང་མི་རུ་སྐྱེས་པའི་དོན་སྙིང་སྤུ་ཙམ་ཡང་ལོན་པ་མིན་ཏེ།འཇིག་རྟེན་འདིར་ཧ་ཅང་སྨད་པའི་གནས་ཡིན།དེས་ན་ཕ་རྒན་ངས་ཁྱོད་ལ་རེ་བ་འཆའ་བ་ནི་སྐྱེ་བོ་འབྲིང་ཙམ་གྱི་སྤྱོད་པ་ལ་གནས་ནས་མི་ཚེ་ཡག་པོ་ཞིག་གཏོང་རྒྱུ་དེ་ཡིན་ཞིང་།སྐྱེ་བོ་འདིས་རང་གཞན་གཉིས་ལ་བསམ་བློ་བཏང་ནས་མི་ཆོས་ཀྱི་སྤྱོད་པ་སྐྱོང་བ་ཡིན་ལ། ལས་འབྲས་དཔང་བོར་བཞག་ནས་འཇིག་རྟེན་གྱི་ལས་སྒོ་ཀུན་ལ་འཇུག་པའང་ཡིན་པས། འདི་ཙམ་གྱི་སྤྱོད་པ་ནི་མཆོག་དང་ཕུལ་གྱི་སྤྱོད་པ་ནི་མ་ཡིན་ཡང་། མི་ཚད་ལྡན་ཞིག་ཡོང་མིན་གྱི་ཆེས་མ་མཐའི་ཀུན་སྤྱོད་ནི་འདི་ག་རང་ཡིན། ཁྱོད་ཀྱི་མི་ཚེའི་བརྒྱུད་རིམ་ཁྲོད་སྤྱོད་པ་འདི་ནི་ངེས་པར་དུ་སྲུང་རོགས་གྱིས་དང་།འཇིག་རྟེན་འདིར་དོན་སྙིང་ངོམ་རེ་བ་གཞན་ནི་མ་ལོན་ཡང་། ཁྱོད་རང་མི་ཡུལ་འདིར་སྐྱེས་པ་ལ་ནོངས་འགྱོད་ནམ་ཡང་སྐྱེ་མི་དགོས་པ་ཡིན།
ངའི་སྙིང་ལས་སྐྱེས་པའི་བུ་མོ་ལགས། ང་ཚོ་འདི་ལྟར་ལས་ཀྱི་དབང་གིས་འཛོམས་ཤིང་།ལས་ཀྱི་དབང་གིས་བྲལ་དགོས་བྱུང་བའི་སྐབས་འདིར། ང་ནི་ཁྱོད་ཀྱི་ཕ་དང་། ཁྱོད་ནི་ང་ཡི་བུ་རུ་གྱུར་བའི་བདེན་པ་ནི་ནམ་ཡང་བསུབ་ཏུ་མེད་པས། ངས་ཁྱོད་སྙིང་ལ་རབ་ཏུ་ན་ཞིང་།བཟོད་དཀའ་བའི་གདུང་སེམས་ཀྱིས་བྲང་ཁོག་གི་སྒོ་མོ་བར་མེད་དུ་རྡུང་བཞིན་ཁྱོད་ལ་བཤད་འདོད་པའི་སེམས་ཀྱི་ན་ཟུག་མང་བོ་ཞིག་ཡང་དང་བསྐྱར་དུ་བཟླས་ཡོད། མགོ་མཇུག་དང་གོ་རིམ་མེད་པར་བོད་ཀྱི་ཕ་རྒན་ཞིག་གི་ངོས་ནས་སྙིང་ཉེ་བའི་བུ་མོ་ཁྱོད་ལ་བཤད་འདོད་པ་ཐམས་ཅད་བཤད་ཡོད། ཁྱོད་རང་བདེ་ཐང་ངང་ནར་སོན་རྗེས། འུ་ཕ་བུ་གཉིས་སླར་ཡང་ཁྱིམ་ཚང་གཅིག་ལ་འཛོམས་ཐུབ་པར་ང་ལ་ཡིད་ཆེས་ཟབ་མོ་ཡོད་དེ། ལོ་ཟླ་ནི་ག་ཚོད་འདས་ཀྱང་བུ་མོ་ཁྱོད་གཅིག་པུ་ཞེ་ལ་འཇོག་ངེས་ཤིང་།འུ་གཉིས་ཕ་བུར་གྱུར་བའི་ལས་དབང་གི་ཁ་དན་སྙིང་ལ་བསྲུངས་ནས་ངང་སྒུག་གིས་མི་ཚེ་བསྐྱལ་ངེས་ཡིན།
ངའི་རུས་པའི་དུམ་བུ། སྙིང་ཉེ་བའི་བུ་མོ་དབྱངས་འཛོམས་ལགས།
མཆན། རྩོམ་པ་པོའི་མཚམས་སྤྱོར། ང་རང་ནི་ལོ་རབས་བརྒྱད་ཅུ་བའི་སྟོད་དུ་འབའ་རྫོང་དུ་སྐྱེས། རྭ་རྒྱ་དང་བླ་བྲང་། ནུབ་བྱང་། ལྷ་ས་སོགས་སུ་སོང་ནས་སློབ་སྦྱོང་གི་ཁུལ་ཙམ་བྱས་མྱོང་། སློབ་སྦྱོང་གི་ཞོར་དུ་རང་གི་དགའ་ཕྱོགས་ལྟར་སྙན་ངག་དང་རྩོམ་ཡིག་ཡིན་ནོ་ལོ་མང་བོ་ཞིག་བྲིས་པ་ཡིན། གྲུབ་འབྲས་འདི་ཡིན་ཟེར་བ་ཞིག་ཅི་ཡང་མེད། ཡིན་ཡང་མི་ཚེ་འདིར་ང་རང་དབྱངས་གསལ་སོ་བཞིའི་ལས་ཀ་བྱེད་མཁན་ཞིག་ཏུ་སྐྱེས་པ་ནི་རང་གི་གཟི་བརྗིད་ཉག་གཅིག་ཏུ་བརྩིས་ཡོད། ད་ལྟའི་བར་༼ལས་དབང་གསར་བརྗེ༽་དང་། ༼དཔྱད་གླེང་ཤོག་དྲིལ་མ༽ ༼གནའ་བོའི་མི་ཆོས་ཀྱི་རིག་གཞུང་སློབ་གསོ༽སོགས་དེབ་འགའ་རེ་ཡང་པར་དུ་བསྐྲུན་མྱོང་། ནམ་ཡང་ལས་དབང་གི་གདུག་རྩུབ་མི་ཐེག་པ་རེ་མ་བྱུང་ན། རྩོམ་འབྲི་དང་དཔེ་ཀློག་ཁོ་ན་ཕུགས་ཀྱི་དོན་པོ་རུ་བཟུང་ནས་ང་ཚོ་ཡང་ཡང་མཇལ་འཆར་ཡོད། གཤམ་གྱི་རྩོམ་ཡིག་འདི་ནི་རང་གི་སྙིང་ཉེ་བའི་བུ་མོར་གསོན་བྲལ་བྱུང་རྗེས་རེ་བ་དང་གདུང་སེམས་དྲག་པོའི་ངང་བྲིས་པ་ཞིག་ཡིན། མི་ཚེ་འདིའི་འགན་ཁུར་མ་འགྲུབ་པའི་བོད་ཀྱི་ཕ་རྒན་ཞིག་གི་ངོས་ནས་རང་གི་བུ་རྒྱུད་ལ་བྲིས་པའི་ནང་སེམས་ཀྱི་ཁ་ཆེམས་ལྟ་བུ་ཞིག་ཀྱང་ཡིན། ད་རེབ་ང་རང་འདི་ལྟར་ལས་དབང་གིས་རབ་ཏུ་འཐག་པའི་གདུག་རྩུབ་འོག་ཁྱེད་ཅག་གི་མདུན་དུ་སླེབས་དགོས་བྱུང་སོང་། བདག་གི་ནང་སེམས་ཀྱི་རེ་བ་དང་ན་ཟུག་ཡོད་ཚད་སྙིང་ཉེ་བའི་བུ་མོ་དང་ཁྱེད་ཅག་ལ་རྗེན་པར་བཤམས་ཡོད། ལས་དབང་གིས་མཇལ་བའི་ཁྱེད་ཅག་ལ་བཀའ་དྲིན་སྙིང་ནས་ཞུ། མི་ཚེ་འདིར་བཟོད་དཀའ་བའི་གདུང་བ་ཟབ་མོའི་ཁྲོད་ང་ཚོ་ཡང་ཡང་མཇལ་བར་སྨོན།