བོད་དོན་སྐོར་གྱི་མཚན་རྟགས་བསྡུ་རུབ་ལས་འགུལ་སྤེལ།

རྒྱ་གར་མཐོ་རིམ་སློབ་མ་ཁག་ཅིག་གིས་རྒྱ་གར་གཞུང་གིས་རྒྱ་ནག་གཅིག་གི་སྲིད་བྱུས་ཟེར་བར་བསྐྱར་ཞིབ་དང་བོད་དེ་རྒྱ་ནག་གི་དབང་བསྒྱུར་འོག་ཡོད་པའི་རྒྱལ་ཁབ་ཅིག་ལ་ངོས་འཛིན་དགོས་པའི་མཚན་རྟགས་བསྡུ་རུབ་ལས་འགུལ་སྤེལ་བཞིན་འདུག

དེ་རིང་རྒྱ་གར་གྷོ་རྗི་རཱ་ཐི་གྲོང་ཁྱེར་གྱི་(Institute of Management IIM)མཐོ་སློབ་ཁང་གི་སློབ་ཕྲུག་ཁག་ཅིག་གི་སྣེ་ཁྲིད་འོག  བོད་དེ་རྒྱ་ནག་གིས་བཙན་གནོན་དབང་སྒྱུར་འོག་ཡོད་པའི་རྒྱལ་ཁབ་ཅིག་ལ་ངོས་འཛིན་དང་། རྒྱ་གར་གཞུང་གིས་རྒྱ་ནག་གཅིག་གི་སྲིད་བྱུས་ཟེར་བ་དེར་བསྐྱར་ཞིབ་དང་། རྒྱ་གར་གྱི་ས་མཚམས་ནི་བོད་མཉམ་དུ་ཡིན་པ་ལས། རྒྱ་དཀར་ནག་གཉིས་ནི་ཁྱིམ་མཚེས་རྒྱལ་ཁབ་ཙམ་ཡང་མིན་པ་སོགས་ཀྱི་བརྗོད་གཞིའི་སྟེང། དྲ་ལམ་ནས་མཚན་རྟགས་བསྡུ་རུབ་ལས་འགུལ་ཞིག་སྤེལ་བཞིན་འདུག  

 

དེ་འབྲེལ་གནས་ཚུལ་སྐོར་ལ་བོད་རང་བཙན་འཐབ་རྩོད་པ་དང་བོད་དོན་ལས་འགུལ་བ་བསྟན་འཛིན་བརྩོན་འགྲུས་ལགས་ནས། སྒེར་གྱི་ངོ་དེབ་སྟེང་མཚན་རྟགས་བསྡུ་རུབ་དེ་ནི་རྒྱ་གར་གཞུང་གིས་བོད་དེ་རྒྱ་ནག་གིས་བཙན་གྱིས་དབང་བསྒྱུར་བྱས་པའི་རྒྱལ་ཁབ་ཅིག་ལ་ངོས་འཛིན་དང་། རྒྱ་ནག་གཅིག་གི་སྲིད་བྱུས་ཟེར་བར་བསྐྱར་ཞིབ་དགོས་པ་སོགས་གནད་དོན་གཙོ་ཤོས་གཉིས་ཀྱི་སྒང་ལ་ཡིན་པ་དང་། མཚན་རྟགས་བསྡུ་རུབ་དེ་རྒྱ་གར་སྲིད་འཛིན་དང་སྲིད་བློན་གཉིས་ལ་འབུལ་རྒྱུ་ཡིན་སྐོར་བཀོད་འདུག

 

མཚན་རྟགས་བསྡུ་རུབ་འགྲེལ་བཤད་ནང་། ང་ཚོས་ངེས་པར་དུ་བོད་རྒྱ་ནག་གི་ཆ་ཤས་ཡིན་པའི་དྲིལ་བསྒྲགས་འགྲེལ་བཤད་དེར་འགྱུར་བཅོས་གཏོང་དགོས་པ་དང་། རྒྱ་གར་གྱིས་ས་མཚམས་ཆེ་ཤོས་ནི་བོད་དང་མཉམ་དུ་འབྲེལ་ཡོད་པ་ལས། རྒྱ་ནག་ནི་རྒྱ་གར་གྱི་ཁྱིམ་མཚེས་རྒྱལ་ཁབ་ཙམ་ཡང་མིན་པ་དང་། རྒྱ་ནག་ནི་ལོ་རྒྱུས་སྟེང་ཁྱིམ་མཚེས་རྒྱལ་ཁབ་ཁག་ལ་དབང་སྒྱུར་བྱེད་མཁན་ཞིག་ཡིན་པ་མ་ཟད། རྒྱ་ནག་གི་ད་ལྟའི་ས་ཁྲའི་ངོས་ཀྱི་ས་ཁུལ་བརྒྱ་ཆ་ ༦༠ ལྷག་བཙན་གྱིས་དབང་སྒྱུར་བྱས་པ་ཡིན་སྐོར་བརྗོད་འདུག

 

ཡང་མུ་མཐུད་འགྲེལ་བཤད་ནང་རྒྱ་གར་གཞུང་གིས་བོད་དེ་ལོ་རྒྱུས་སྟེང་ནས་རྒྱ་ནག་གི་ཆ་ཤས་མིན་པའི་ངོས་འཛིན་དགོས་པ་དང་། རྒྱ་གར་ནི་རིག་གཞུང་ངོས་ནས་བོད་དང་འབྲེལ་བ་ཤུགས་ཆེན་ཡོད་པ་དང་། རྒྱ་གར་གཞུང་གིས་བོད་ཀྱི་གནད་དོན་ཐད་ངོས་འཛིན་གསར་བ་ཞིག་བྱུང་བ་ཡིན་ན། གནད་དོན་དེའི་ཨེ་ཤ་ཡ་ཧྲིལ་བོར་འགྱུར་བ་ཐེབས་རྒྱུ་ཡིན་པ་དང་། རྒྱ་གར་གཞུང་གིས་དེ་རིང་ད་དུང་ཤེས་ཡོན་ལམ་ལུགས་ནང་བོད་དང་ས་མཚམས་འབྲེལ་ཡོད་པའི་གནད་དོན་ཆུང་ཆུང་དེ་ཙམ་བཤད་མེད་པས། མ་འོངས་པར་རྒྱ་གར་གྱི་ཤེས་ཡོན་ལམ་ལུགས་ནང་རྒྱ་གར་གྱི་ས་མཚམས་འབྲེལ་ཡུལ་བོད་ཡིན་སྐོར་གྱི་གནས་ཚུལ་མཁོ་སྤྲོད་དགོས་སྐོར་སོགས་བརྗོད་འདུག

 

མཚན་རྟགས་བསྡུ་རུབ་དེར་བདུན་ཕྲག་གཅིག་གི་དུས་ཡུན་ཡོད་པ་དང་། མཚན་རྟགས་གྱི་ཁ་གྲངས་ ༡༠༠༠ ལས་མི་དགོས་པ་མ་ཟད། རྒྱ་གར་གྱི་སྲིད་བློན་གཙོའི་ཕྱི་སྲིད་དང་ནང་སྲིད་བློན་ཆེན་སོགས་མགོ་རིམ་མགོ་ཁྲིད་ཁག་ཅིག་ལ་འབུལ་རྒྱུ་ཡིན་འདུག

མཆན། མཚན་རྟགས་བསྡུ་རུབ་དྲ་གནས། https://www.change.org/p/prime-minister-of-india-say-no-to-chinese-oppression-of-tibet-and-establish-their-right-to-freedom-freetibet?recruiter=1164962723&utm_source=share_petition&utm_medium=copylink&utm_campaign=share_petition