བོད་ཀྱི་ན་གཞོན་ཁུ་ཚུར་དྲག་འཐབ་པ་བསོད་ནམས་དར་རྒྱས་ཀྱིས་དུས་ཐུང་ནང་འགྲན་ཡ་ལས་རྒྱལ་ཁ་ཐོབ་པ་དེས་ཚོགས་པ་དེའི་ལོ་རྒྱུས་ཁྲོད་ཀྱི་ཟིན་ཐོ་ཨང་རིམ་གསུམ་པ་ཟིན་ཡོད་འདུག
ཕྱི་ཟླ་ ༡༡ ཚེས་ ༢༨ ཉིན། ཨ་རིའི་ལཱ་སི་ཝེ་གྷ་སི་(Las Vegas)གྲོང་ཁྱེར་ནང་ཚོགས་པའི་ རྒྱལ་སྤྱིའི་སྣ་འཛོམས་དྲག་རྩལ་(UFC)འགྲན་བསྡུར་སྟེང་། བོད་ཀྱི་ཁུ་ཚུར་དྲག་འཐབ་པ་བསོད་ནམས་དར་རྒྱས་སམ་བོད་རིགས་ན་གཞོན་གླག་རྒོད་ལགས་ནས། ཁ་ན་ཊའི་(Canada)ཁུ་ཚུར་དྲག་འཐབ་པ་མཱེ་ཁོལ་རྗོར་དྷན(Malcolm Gordon)ལགས་དང་འགྲན་བསྡུར་བྱས་ཏེ། བསོད་ནམས་དར་རྒྱས་ལགས་ནས་རང་གི་འགྲན་ཡ་འགྲན་སྐོར་དང་པོའི་སྐར་ཆ་ ༤༤ ནང་ཕམ་པར་བརྒྱབ་ཡོད་པ་རེད།
འགྲན་བསྡུར་ཚར་རྗེས་བསོད་ནམས་དར་རྒྱས་ལགས་ནས་གསར་འགོད་པར། ཐེངས་འདིར་ང་ལ་རྒྱལ་ཁ་ཐོབ་པའི་གདེང་ཚོད་ཡོད་པ་དང་། འགྲན་བསྡུར་མགོ་མ་ཚུགས་སྔོན་ངས་སྦྱོང་བརྡར་ཤུགས་ཆེན་བྱས་པ་ཡིན་ལ། འགྲན་བསྡུར་སྐབས་གར་སྟེགས་སུ་བུད་པ་དང་ང་ལ་སྤོབས་པ་ཞིག་དང་ལྷོད་ལ་བབ་པ་ཞིག་བྱུང་སོང་ཞེས་དང་། ཡང་ཁོས་ཐེངས་འདིར་ང་ལ་རྒྱལ་ཁ་ཐོབ་པར་རྒྱབ་སྐྱོར་བྱེད་མཁན་ང་རང་གི་དྲག་རྩལ་ཚོགས་པའི་མི་སྣ་གསུམ་ལ་ཐུགས་རྗེ་ཆེ་ཞུ་བཞིན་ཡོད་ལ། ཐེངས་རྗེས་མའི་དམིགས་ཡུལ་དེ་མུ་མཐུད་ཁུར་ཚུར་དྲག་རྩལ་དང་རྒྱ་ནག་གི་སྤྲེའུ་དྲག་རྩལ་སོགས་ལ་སྦྱོང་བརྡར་བྱེད་འདོད་ཡོད་སྐོར་བརྗོད་འདུག
བསོད་ནམས་དར་རྒྱས་ཀྱིས་གར་སྟེགས་སྟེང་རང་གི་འགྲན་ཡ་དང་མཉམ་དུ། ཡུད་ཙམ་རིང་ཁུ་ཚུར་གཡུག་རེས་བྱས་ཏེ་སྐར་མ་གཅིག་ཀྱང་མ་འགོར་བར་འགྲན་ཡའི་ངོ་གདོང་ལ་ཐེངས་གཅིག་་གཉིས་ཙམ་བཞུས་པ་དང་། འགྲན་ཡ་དེ་སར་འགྱེལ་སོང་བ་དང་བསྟུན་ཤན་འགྱེད་པས་བསོད་དར་ལ་རྒྱལ་ཁ་ཐོབ་པའི་བརྡ་སྟོན་ཡོད་པ་དང་། དེ་ནི་ཁུ་ཚུར་དྲག་འཐབ་ཚོགས་པ་དེའི་ལོ་རྒྱུས་ཁྲོད་འགྲན་ཡ་ལས་དུས་ཐུང་ངང་རྒྱལ་ཁ་ཐོབ་པའི་ཟིན་ཐོ་ཨང་རིམ་གསུམ་པ་དེ་ཆགས་ཡོད་པ་དང་། ཁུ་ཚུར་དྲག་རྩལ་ཚོགས་པ་དེས་ཁོང་ལ་དམིགས་བསལ་བྱ་དགའ་ཞིག་ཀྱང་སྤྲད་ཡོད་འདུག
བསོད་ནམས་དར་རྒྱས་ལགས་ནི་རྔ་བ་ཁུལ་ཁྲོ་ཆུ་རྫོང་ནས་ཡིན་ཞིང་། མགོན་པོའི་དྲག་རྩལ་ཁང་ནས་ཁུ་ཚུར་དྲག་འཐབ་ལ་སྦྱོང་བ་བྱས་ཡོད་པ་དང་། ཁོང་གིས་དེ་སྔོན་རྒྱ་ནག་རྒྱལ་ཡོངས་ཀྱི་དྲག་རྩལ་འགྲན་སྡུར་རིམ་པའི་སྟེང་རྒྱལ་ཁ་བླངས་ཡོད་པ་མ་ཟད། དམིགས་བསལ་ཕྱི་ལོ་ ༢༠༡༦ ལོར་རྒྱ་ནག་ཧེ་ནན་ནས་གཟུགས་པོའི་ལྗིད་ཚད་སྤྱི་རྒྱ་༥༧ ཅན་གྱི་འགྲན་བསྡུར་ཁྲོད་ཨང་དང་པོ་བླངས་ནས་གསེར་གྱི་སྐེ་རགས་ཐོབ་ཡོད་པ་དང་། ཕྱི་ལོ་ ༢༠༡༨ ལོ་ནས་འཛམ་གླིང་གི་ཁུ་ཚུར་དྲག་འཐབ་ཁང་ཆེ་ཤོས་ཨ་རིའི་(UFC)ཚོགས་པས། རྒྱ་ནག་རྒྱལ་ཡོངས་ནས་ཁུ་ཚུར་དྲག་འཐབ་པ་རྩེ་ཕུད་འགའ་འདེམས་སྒྲུག་བྱས་ཡོད་པའི་ཁྲོད་བདམས་ཡོད་པ་རེད།
མཆན། ཡུལ་དངོས་འགྲན་བསྡུར་བརྙན། https://www.youtube.com/watch?v=zM3N8OpzGNE