རྒྱ་ནག་གི་གཞུང་འབྲེལ་ཚན་རིག་པ་ཟེར་བ་ཚོས་ཏོག་ནད་ཀྱི་ཐོག་མའི་འབྱུང་ཁུངས་རྒྱ་གར་ནས་ཡིན་སྐོར་བརྗོད་འདུག
པར་རིས་ཡོང་ཁུངས། དྲ་ལམ།
ཕྱི་ཟླ་ ༡༡ ཚེས་ ༢༩ ཉིན་རྒྱ་གར་དང་རྒྱལ་སྤྱིའི་གསར་ལམ་ཁག་ཏུ་སྤེལ་བའི་གནས་ཚུལ་ལྟར་ན། རྒྱ་ནག་གཞུང་འབྲེལ་ཚན་རིག་པ་ཟེར་བ་ཁག་གིས་ཏོག་ནད་ཀྱི་འབྱུང་ཁུངས་རྩད་གཅོད་སྐོར་གྱི་ཞིབ་འཇུག་གྲུབ་དོན་ཟེར་བ་ཞིག་བཏོན་པའི་ནང་། རྒྱ་ནག་ཝུ་ཧན་གྱི་ཏོག་ནད་དེ་ཕྱི་ལོ་ ༢༠༡༩ ལོའི་དབྱར་ཁ་ནས་བཟུང་རྒྱ་གར་ནང་བྱུང་སྟེ། རིམ་པས་འགོས་ཁྱབ་བྱུང་བ་ཞིག་ཡིན་པའི་ཉེས་འཛུགས་བྱས་ཡོད་པ་དང་། ཐེངས་འདིར་རྒྱ་ནག་གཞུང་གིས་ཏོག་དབྱིབས་རིམས་ནད་རྒྱལ་ཁབ་གཞན་བྱུང་བའི་ཉེས་འཛུགས་ཐེངས་ ༡༠ དེ་ཆགས་ཡོད་འདུག
དེ་འབྲེལ་གནས་ཚུལ་ནང་ཚན་རིག་པ་ཟེར་བ་དེ་དག་གིས། རྒྱ་གར་ནང་གཙང་སྦྲ་འཕྲོད་བསྟེན་མེད་པ་དང་མི་འབོར་མང་བ།
ལྷག་པར་དུ་དབྱར་ཁ་ཚ་གདུང་གིས་ཆུ་དཀོན་པོ་ཡིན་སྟབས།
སེམས་ཅན་ཚོས་ཆུའི་དོན་དུ་འཐབ་རྩོད་བྱས་ཏེ་ཕན་ཚུན་ན་ཚ་འགོས་ཁྱབ་བརྒྱུད། སེམས་ཅན་གྱི་ན་ཚ་དེ་དག་ཡུན་གྱིས་མི་ལ་འགོས་པ་ཞིག་ཡིན་པ་དང་།
ས་བབ་ཆགས་ཚུལ་ནས་རྒྱ་གར་དང་བྷང་ལ་དྷེ་ཤི་གཉིས་རྒྱ་ནག་གི་ཁྱིམ་མཚེས་ཡིན་སྟབས། ཏོག་ནད་ཐོག་དང་པོར་བྱུང་ས་དེ་རྒྱ་གར་ནས་ཡིན་པ་ཚོད་དཔག་ཐུབ་པ་ཞིག་ཡིན་སྐོར་བརྗོད་འདུག
ཐེངས་འདིར་རྒྱ་ནག་གིས་ཏོག་ནད་འབྱུང་ཁུངས་རྒྱ་གར་ཡིན་པའི་ཉེས་འཛུགས་དེ། རྒྱ་དཀར་ནག་གཉིས་ཧིན་བོད་ས་མཚམས་ནས་ཤུགས་ཆེར་འཁྲུག་བཞིན་པའི་སྐབས་དང་། ལྷག་པར་དུ་ད་ལྟའི་ཆར་མཉམ་འབྲེལ་རྒྱལ་ཚོགས་འཕྲོད་བསྟེན་ལྷན་ཚོགས་ཀྱིས་སྣེ་ཁྲིད་པའི་འཕྲོད་བསྟེན་ཆེད་མཁས་པ་ཚོས། རྒྱ་ནག་ནང་ཏོག་ནད་ཀྱི་འབྱུང་ཁུངས་རྩད་གཅོད་བྱེད་བཞིན་པ་དང་བསྟུན་བརྗོད་ཡོད་པ་དང་། རྒྱལ་སྤྱིའི་སྲིད་དོན་དབྱེ་ཞིབ་པ་ཚོས་ད་ལྟ་རྒྱ་ནག་གཞུང་གིས་ཞིབ་འཇུག་གྲུབ་དོན་གང་བྱུང་ལ་ཁ་གཡར་ནས། ཏོག་ནད་ཀྱི་འབྱུང་ཁུངས་ཆབ་སྲིད་ལ་སྒྱུར་ཐབས་ཀྱི་ཉེས་འཛུགས་བྱེད་མགོ་ཚུགས་བཞིན་ཡོད་སྐོར་བརྗོད་འདུག
འདི་ལོའི་ཕྱི་ཟླ་ ༩ ནང་མཉམ་འབྲེལ་རྒྱལ་ཚོགས་ཀྱི་ཏོག་ནད་འབྱུང་ཁུངས་རྩ་ཞིབ་ཚོགས་པ་ཞིག་རྒྱ་ནག་ཝུ་ཧན་དུ་བཏང་ནས། ཏོག་ནད་འབྱུང་ཁུངས་ཐད་ཞིབ་འཇུག་བྱས་ཡོད་ཀྱང་དོན་དངོས་གྲུབ་འབྲས་གང་ཡང་མ་བྱུང་བར་ཕྱིར་ལོག་ཡོད་པ་དང་། བར་སྐབས་དེར་རྒྱ་ནག་གཞུང་གིས་ཞིབ་འཇུག་གྲུབ་དོན་ཡིན་སྐོར་བརྗོད་ནས་ཐོག་མར་ཏོག་ནད་ཀྱི་འབྱུང་ཁུངས་བྷང་ལ་དྷེ་ཤི་ཡིན་པའི་ཉེས་འཛུགས་དང་། དེའི་རྗེས་ཨ་རི་ལ་དང་གྷི་རེ་ཁི། ཨོ་སི་ཊི་ལི་ཡ། ཨེ་ཊི་ལེ། ཅེག་སྤྱི་མཐུན་རྒྱལ་ཁབ། ཨུ་རུ་སུ། ད་ལྟ་རྒྱ་གར་སོགས་རྒྱལ་ཁབ་ ༡༠ ལ་ཏོག་ནད་འབྱུང་ཁུངས་སྐོར་ནས་ཉེས་འཛུགས་བྱས་ཡོད་པ་དང་། ཉེས་འཛུགས་གནད་དོན་ཕལ་ཆེ་བ་ཆབ་སྲིད་ཀྱི་རྩོད་རྙོག་དང་འགལ་འདུ་དང་འབྲེལ་ནས་བཙུགས་ཡོད་པ་རེད།
རྒྱ་ནག་གཞུང་གིས་རྒྱལ་སྤྱིའི་སྟེང་རང་ཉིད་ཀྱི་ནག་ཉེས་དེའི་ཁ་ཕྱོགས་བསྒྱུར་ཐབས་སུ།
མཉམ་འབྲེལ་རྒྱལ་ཚོགས་ཀྱི་འཕྲོད་བསྟེན་ཚོགས་པ་རྒྱ་ནག་ནང་ཡོང་བཅུག་སྟེ། གནས་ཚུལ་དངོས་སྦས་གསང་དང་འབྲེལ་མཉམ་འབྲེལ་རྒྱལ་ཚོགས་ཀྱིས་དེ་སྔ་ཏོག་ནད་ཀྱི་འབྱུང་ཁུངས་རྒྱ་ནག་ཡིན་པའི་ངེས་པ་མེད་སྐོར་བརྗོད་པ་དེ་དྲིལ་བསྒྲགས་ཤུགས་ཆེར་བྱེད་བཞིན་ཡོད་པ་མ་ཟད།
ཕྱི་ཟླ་ ༡༡ ཟླ་མགོར་རྒྱ་ནག་གཞུང་འབྲེལ་གསར་ལམ་ཁག་གིས་ཏོག་ནད་ཀྱི་འབྱུང་ཁུངས་ཕྱི་ལོག་ནས་ནང་འདྲེན་བྱས་པའི་ཟས་རིགས་འཁྱག་པ་དང་།
ཡང་མཚམས་རེར་རྒྱལ་ཁབ་གཞན་གྱི་ཚན་རིག་ཞིབ་འཇུག་ཁང་གི་ཞིབ་འཇུག་ཤོག་བུ་བརྒྱུད་སྤྲོད་བྱས་པ་ལས་མཆེད་པ་ཡིན་སྐོར་སོགས་གང་བྱུང་ཉེས་འཛུགས་ཐབས་བྱེད་བཞིན་ཡོད་པ་རེད།