བོད་དོན་དང་འབྲེལ་ནས་རྒྱ་ནག་ལ་སྐྱོན་བརྗོད་བྱས་མྱོང་མཁན་འཛམ་གླིང་གི་རྐང་སྤོལ་རྩེ་མོ་བ་གྲགས་ཅན་ཞིག་འདས་གྲོངས་སུ་སོང་།
དྷེ་གྷོ་མཱ་རཱ་དྷོ་ནཱ་འདས་གྲོངས་སུ་སོང་བའི་སྐོར་ལ་ཡུལ་དེའི་སྲིད་འཛིན་(Alberto
Fernandez)ལགས་ནས། ཁོང་ནི་རྒྱལ་ཁབ་ཀྱི་ཆེས་སྤོབས་པ་སྐྱེས་གཞི་ཞིག་དང་། ཁོང་གི་དཀའ་དྲིན་ལ་རྒྱལ་ཁབ་སྐད་གྲགས་ཆགས་བྱུང་བས་དཀའ་དྲིན་ཆེན་པོ་ཡིན་སྐོར་བརྗོད་ཡོད་པ་དང་།
དེ་བཞིན་འཛམ་གླིང་གི་རྐང་སྤོལ་རྩད་མོ་གྲགས་ཅན་གཙོའི་སྒྱུ་རྩལ་ལས་རིགས་ཁག་གི་སྐར་ཆེན་མི་སྣ་མང་པོས་ཁོང་གློ་བུར་རྐྱེན་འདས་སུ་སོང་བར་བློ་ཕམ་དང་མྱ་ངན་ཤུགས་ཆེར་ཞུ་བཞིན་ཡོད་པ་དང་།
རྒྱ་གར་ལྷོ་ཕྱོགས་ཀེ་ར་ལ་མངའ་སྡེ་གཞུང་གིས་ཉིན་གསུམ་རིང་ཁོང་ལ་མྱ་ངན་ཞུ་རྒྱུ་ཡིན་པ་ཐག་གཅོད་བྱས་འདུག
དྷེ་གྷོ་མཱ་རཱ་དྷོ་ནཱ་ནི་འདི་ལོ་དགུང་ལོ་ ༦༠ ཡིན་པ་དང་། ཁོང་ཕྱི་ལོ་ ༡༩༧༦ ལོ་ནས་ཡུལ་དེའི་རྐང་སྤོལ་རྩེད་འགྲན་ཚོགས་པ་ཞིག་ཏུ་ཞུགས་ཏེ། རིམ་བཞིན་རྒྱལ་ཡོངས་དང་རྒྱལ་སྤྱིའི་ནང་སྐད་གྲགས་ཆགས་པ་མ་ཟད།་ཁོང་གི་སྣེ་ཁྲིད་པའི་ཡུལ་དེའི་རྒྱལ་ཡོངས་རྐང་རྩེད་སྤོལ་རུ་ཁག་གིས་རྒྱལ་སྤྱིའི་སྟེང་གྲགས་ཆེ་བའི་རྩེད་འགྲན་མང་པོར་རྒྱལ་ཁ་བླངས་སྟེ། ཡུལ་དེའི་ང་རྒྱལ་དང་སྤོབས་པ་སྐྱེས་གཞི་ཞིག་ཆགས་པ་མ་ཟད། འཛམ་གླིང་ཡོངས་སུ་ཁོང་གི་ཁྱད་འཕགས་ཀྱི་རྩེད་སྟངས་ལ་བསྟོད་བསྔགས་དང་། ཀུན་གྱིས་དགའ་མོས་དང་གུས་བཀུར་བྱ་ཡུལ་གྱི་མི་སྣ་ཞིག་ཆགས་ཡོད་པ་རེད།
ཕྱི་ལོ་ ༢༠༠༨ ལོར་རྒྱ་ནག་ནང་རྒྱལ་སྤྱིའི་ཨོ་རྩལ་འགྲན་ཚོགས་ཚུགས་སྐབས། རྒྱ་ནག་གིས་བོད་ནང་དྲག་རྩུབ་སྲིད་བྱུས་ལག་བསྟར་དང་། བོད་ནང་གི་འགྲོ་བ་མིའི་ཐོབ་ཐང་དྲག་གནོན་བྱེད་བཞིན་པ་དང་འབྲེལ་ནས་ཁོང་གིས། བོད་ཀྱི་གནད་དོན་ཐད་ནས་རྒྱ་ནག་ནོར་ཡོད་པས་ང་རྒྱ་ནག་གི་ཨོ་རྩལ་འགྲན་བསྡུར་ལ་མཉམ་ཞུགས་མི་བྱེད་པ་མ་ཟད།
བརྙན་འཕྲིན་སོགས་ནས་ལྟ་ཡི་མིན་ལ། ང་ལ་མཚོན་ན་བོད་ནི་གནད་དོན་ཧ་ཅང་གལ་ཆེན་ཞིག་སྐོར་བརྗོད་ཡོད་པ་རེད།