--------བོད་ཀྱི་རོང་འབྲོག་ཁུལ་གྱི་སློབ་མར་རྩིས་དངོས་རྫས་གསུམ་བོད་སྐད་དང་བོད་ཡིག་གིས་ཁྲིད་ན་འཚམ།
བསྒྱུར་དང་འགྱུར་ལ་ལམ་ལུགས་ཀྱི་ཐད་ནས་སྤྱི་བསྟུན་དང་འགྱུར་མོས་ཀྱི་ཆ་རྐྱེན་འོག་ད་གཟོད་ལག་ལེན་དང་མངོན་འགྱུར་འབྱུང་དུ་འཇུག་པ་ལས། དངོས་ཟོག་གང་རུང་ཞིག་གི་མདོག་དང་རྣམ་པ་གཞན་ཞིག་ཏུ་བསྒྱུར་བ་ལྟ་བུ་ཞིག་བྱེད་ག་ལ་རུང་། མི་རིགས་རེ་རེའི་སྐད་ཡིག་ནི་རྒྱལ་ཁབ་གང་དང་འཛམ་གླིང་གི་རིག་གནས་ཀྱི་གྲུབ་ཆ་གལ་ཆེན་ཞིག་ཡིན་ལ།
སྐད་དང་ཡི་གེ་ནི་འགྲོ་བ་མིའི་རིགས་ཀྱི་རྩིས་ཐང་དང་ཁེ་དབང་ལ་འབྲེལ་བ་ཡོད་པ་ཞིག་རེད། ངོ་མ་འཇིག་ནས་རྣམ་པ་གཞན་འགྱུར་དང་སིམ་འཛུལ་བྱས་ཟིན་པའི་དུས་སུ་རན་དུས་མི་རིགས་འདི་དང་ས་ཁུལ་འདི་ལ་མཚོན་ན་སུ་ཞིག་གི་ལག་ནས་འཇིག་མིན་གཙོ་བོ་མ་རེད།འཇིག་པའི་འབྲས་བུའམ་ཡང་ན་གཞན་འགྱུར་གྱི་འབྲས་བུས་སྤྱི་ཚོགས་དང་མི་རིགས་འདི་ལ་ཤུགས་རྐྱེན་ག་རེ་བཟོ་མིན་དེ་རེད། དེ་ནི་སྤྱི་ཚོགས་ཀྱི་རླབས་རྒྱུན་ཞིག་དང་རིག་གནས་ཀྱི་ཁོར་ཡུག་ཞིག་གིས་བཏུམས་སོང་བས་རེད། སྤྱིར་ན་བོད་ཡིག་བོད་སྐད་ཀྱི་ནུས་པས་རང་གི་འཚོ་འཚིས་དང་ཁ་རྒྱབ་སྐྱོར་བའི་བོད་ཀྱི་ལས་བྱེད་པ་དང་དགེ་རྒན་མང་པོ་ཞིག་གི་ཁྲོད་དུ་རང་གི་བུ་ཕྲུག་ཐབས་ལམ་གཉིས་པའི་ལམ་ལུགས་སུ་འགྲོ་རུ་འཇུག་མཁན་ཇེ་མང་ནས་ཇེ་མང་རེད། ཁ་ནས་མི་རིགས་ཀྱི་ཆག་འཇིག་དང་དར་སྒུད་ལ་སེམས་ཁུར་ཅི་འདྲ་ག་འདྲ་ཡོད་ཟེར་བ་དང་། མི་རིགས་རིག་གནས་ཀྱི་བདེན་པའི་ཨུ་ཚུགས་ཅི་འདྲ་སྲུང་བཞིན་ཡོད་ཟེར་ཡང་། དངོས་ཡོད་གནས་ཚུལ་ལ་གཞོལ་དུས་ཚང་མ་སྟོང་གཏམ་རེད། དེ་ཡང་གཙོ་བོ་“རྗེས་ལུས་ཐེབས་ནས་རྡུང་རྡེག་མྱོང”་མ་འདོད་པས་ལོས་ཡིན། འདི་ལྟ་བུའི་མི་མངོན་པའི་རིག་གནས་ཀྱིས་བཙན་འཛུལ་ཐེབས་ཀྱིན་ཐེབས་ཀྱིན་ང་ཚོའི་ལམ་ལུགས་འདི་གཞན་དུ་མི་འགྱུར་བའི་ངེས་པ་ལར་ནས་མེད་མོད།
དོན་དངོས་སུ་ད་སྐབས་ང་ཚོའི་རོང་འབྲོག་མི་དམངས་ཀྱི་རིག་གནས་ཆུ་ཚད་དེ་རྒྱའི་རིག་གནས་ཀྱི་འཁོར་རྒྱུག་ཏུ་མཉམ་འདྲེས་བྱེད་ཐུབ་པའི་ཚད་ག་འདྲ་ཡིན་པ་དང་། མཉམ་འདྲེས་མཉམ་གནས་བྱེད་ཐུབ་པའི་ཚད་ལ་ཐོན་ཡོད་དམ་མེད། དེ་གནད་དོན་རེད། ལམ་ལུགས་འདི་འདྲ་ང་ཚོའི་ཕྱོགས་སུ་འདྲེན་ཡོང་དོན་ཡང་ལྷ་སའི་ས་ཆ་འགའ་རེ་ལམ་ལུགས་འདིས་འོག་དྲུད་བྱས་ནས་བསྒྱུར་ཟིན་པས་ཡིན་ས་རེད། ཡིན་ཡང་མགོ་ལོག་ཏུ་ལམ་ལུགས་འདིས་བཀག་རྡོ་བཟོས་ཡོད་པ་ང་ཚོས་དྲན་དགོས་ཚོད་རེད།
ཉེ་ཆར་སློབ་ཁྲིད་ལམ་ལུགས་བསྒྱུར་རྒྱུ་ཡིན་པའི་སྐོར་གྱི་གཏམ་ངན་རྣ་བར་ལྷུང་དུས། རང་གི་སྐད་ཡིག་ལ་བརྟེན་ནས་ཁ་གསོ་རྒྱབ་འགེབས་བྱེད་བཞིན་པའི་དགེ་རྒན་སྤྱིར་བཏང་བ་ཞིག་གི་ངོས་ནས། བོད་ཀྱི་རོང་འབྲོག་ཁུལ་གྱི་་སློབ་མར་རྩིས་དངོས་རྫས་གསུམ་བོད་སྐད་དང་བོད་ཡིག་གིས་ཁྲིད་ན་འཚམ་ཞེས་ཞུ་འདོད་པ་ཡིན།
༢༠༡༧ལོར་ང་ཚོའི་སློབ་གྲྭར་མན་ཡང་གི་དངོས་ལུགས་དགེ་རྒན་ཞིག་འཛུབ་སྟོན་ཏུ་ཡོང་། ང་ཚོའི་སློབ་གྲྭས་བཀོད་སྒྲིག་ལྟར་ངེད་གཉིས་ཀྱིས་མཐར་ཕྱིན་འཛིན་གྲྭ་གཅིག་ཁག་གཉིས་སུ་བགོས་ནས་ཁྲིད་པ་ཡིན་ལ། འཛིན་གྲྭའི་ནང་གི་སྦྱངས་འབྲས་བཟང་ཤོས་མང་ཤས་ཁོས་ཁྲིད་སའི་གྲས་ན་ཡོད། མཐར་ཕྱིན་དུས་ཁོས་ཁྲིད་སའི་ཚན་ཆུང་དུ་མི་༢༦དང་ངས་ཁྲིད་སའི་ཚན་ཆུང་དུ་མི་༤༤འདུག ཁོར་མཚོན་ན་ལོ་ངོ་ཉི་ཤུ་ལྷག་གི་རིང་ལ་སློབ་ཁྲིད་བྱས་པས། ཉམས་མྱོང་དང་ཆུ་ཚད་གང་གི་ཐད་ནས་ང་ལས་བཟང་བོ་འདུག། འོན་ཀྱང་ངའི་སློབ་ཁྲིད་དུ་ཡོང་བའི་སློབ་མའི་ཁ་གྲངས་ཁོ་ལས་མང་བས་རྒྱུ་མཚན་ལ་རྒྱུས་ལོན་ཞིག་བྱས་པ་ཡིན་ཏེ། གཅིག་ནས་ཁོའི་ཁྲིད་འགྲོས་མགྱོགས་པས་རྗེས་མི་ཟིན་པ་དང་། གཉིས་ནས་སློབ་མར་དྲི་བ་ཡོད་དུས་རྒྱ་སྐད་ཀྱིས་ཡག་པོ་བཤད་ཤེས་ཀྱིན་མི་འདུག དེ་བས་རོང་འབྲོག་ཁུལ་གྱི་སློབ་མ་འདི་ཚོར་འཛིན་གྲྭ་༼
མི་༧༠༽གཅིག་གི་ནང་དུ་རྒྱ་སྐད་ཀྱིས་དྲི་བ་འདོན་ཐུབ་མིན་གྱི་མང་ཉུང་འདི་འདྲ་ཡོད་ཚེ་སློབ་གྲྭ༼ མི ༢༦༠༠༽ ་ཡོངས་ཀྱི་ནང་ན་མི་ག་ཙམ་ཡོད་དམ། འདི་ལྟ་བུའི་རོང་འབྲོག་ཁུལ་གཞན་གྱི་སློབ་གྲྭ་རུ་ག་ཙམ་ཡོད་དམ།
སྔོན་ཆད་ནང་ལོགས་སུ་རྩིས་དངོས་རྫས་གསུམ་གྱི་ཁྲིད་ཚན་དབྱིན་ཡིག་དང་དབྱིན་སྐད་ཀྱིས་ཁྲིད་ན་ཤེས་སླ་བར་འདོད་མཁན་འགའ་རེ་བྱུང་བར། སྐབས་ཐོག་དེར་ཁ་ཅིག་ཏུ་རྒོལ་བ་ཐེབས་ནས་ལག་བསྟར་བྱས་མེད། དེ་བཞིན་དུ་སློབ་ཁྲིད་ལམ་ལུགས་བསྒྱུར་དགོས་མིན་གྱི་གླེང་ཕྱོགས་ཡོད་པ་དང་བསྟུན་ནས། ང་ཚོས་རང་ལ་འཚམ་པའི་སློབ་ཁྲིད་ལམ་ལུགས་དང་། མི་རིགས་ཀྱི་སྐད་དང་ཡི་གེར་ཁྲིམས་མཐུན་གྱིས་སྲུང་སྐྱོབ་བྱེད་རྒྱུ་གལ་ཆེན་རེད།
ད་བར་དུ་རྒྱལ་ཡོངས་སུ་སློབ་གསོའི་མ་ལག་གི་སྒྲིག་འཛུགས་འདི་ལ་གནད་དོན་ཡོད་པ་ཤེས་ཡོད་མོད། ཤར་མར་ལེགས་བཅོས་བྱས་ཆོག་པའི་ཐབས་ཤེས་ཡག་པོ་ཞིག་རྙེད་མེད་ཚོད་རེད། དེ་བས་སློབ་ཁྲིད་སློབ་གསོའི་ཐབས་ལམ་དང་མཐོ་རྒྱུགས་ལམ་ལུགས་ལོ་རེ་བཞིན་དལ་བུར་ལེགས་བཅོས་བཟོ་བཞིན་པ་དེ་རེད། དེ་འདྲ་བྱེད་དོན་ཡང་སློབ་གསོའི་ལམ་ལུགས་འདི་ལོ་རྒྱུས་ཁྲོད་ཀྱི་ཆབ་སྲིད་ལས་འགུལ་བསླང་བའི་ཚུལ་གྱིས་གསར་བརྗེ་བྱས་ན་མི་རབས་གཅིག་ཚོད་ལྟ་བྱས་ནས་བརླག་འགྲོ་བའི་ཉེན་ཁས་འཇིགས་དངངས་སྐྱེ་བཞིན་པས་རེད། དེ་ འདྲ་བྱེད་སུས་ཕོད་དམ། ཡིན་ཡང་། མིང་འཛིན་པ་རེ་འགས་གང་འདོད་འདོད་ཀྱིས་ང་ཚོ་སྣང་མེད་དུ་བཞག་ནས་བཅོས་བསྒྱུར་བྱེད་དོན་ཅི་ཡིན་ནམ། སློབ་གསོ་ནི་ཡོངས་ཁྱབ་ཀྱི་ཆོས་ཉིད་ཅིག་སྟེ། མི་རིགས་དང་རྒྱལ་ཁབ།ས་ཆའི་རིག་གནས་དང་ཡུལ་སྲོལ་གོམས་གཤིས་ལ་བསྟུན་པའི་འོག་ནས་ད་གཟོད་འཕེལ་རྒྱས་གཏོང་བ་ལས། འགྱུར་བའི་ཆོས་ཉིད་ལ་བརྩི་སྲུང་མི་བྱེད་པར་མི་རིགས་ཀྱི་རྩིས་ཐང་རྡོག་རོལ་དང་ཁེ་དབང་སྣང་མེད་དུ་བཞག་ཚེ་མི་རིགས་མཉམ་གནས་ཟེར་བ་ཡང་ཁ་འབོད་ཙམ་ཞིག་མ་ཡིན་ནམ།
------༢༠༢༠ལོའི་ཟླ༤པའི་ཚེས་༡༤ཉིན་མཛོད་དགེ་བོད་ཡིག་སློབ་འབྲིང་གི་དགེ་མིང་ཙམ་འཛིན་པ་དཔལ་མགོན་སྐྱབས་ནས།