ཨ་རིའི་ཕྱི་སྲིད་ལྷན་ཁང་གིས་བོད་མི་མང་སྤྱི་འཐུས་ལྷན་ཚོགས་ལ་བཏང་བའི་འཕྲིན་ཡིག་ནང་བོད་རང་སྐྱོང་ལྗོངས་ནང་རང་སྐྱོང་འཐོབ་ཐབས་སུ་ཞེས་བྲིས་འདུག
ད་ལྟའི་ཆར་བཙན་བྱོལ་བོད་མིའི་གསར་ལམ་ཁག་དང་དང་སྤྱི་ཚོགས་དྲ་ལམ་ཁག་ཏུ།ཉེ་སྔོན་ཕྱི་ཟླ་༨ཚེས་༢ཉིན་ཨ་རིའི་བར་བརྒལ་རྒྱལ་སྲིད་དྲུང་ལས་(LisaPeterson)ལགས་ནས།བོད་ཀྱི་སྤྱི་འཐུས་གྲོས་ཚོགས་ཀྱི་ཚོགས་དྲུང་ཚེ་དབང་དངོས་གྲུབ་ལགས་ཀྱི་མཚན་ཐོག་ཏུ།བོད་ཀྱི་སྤྱི་འཐུས་གྲོས་ཚོགས་ནང་ཁུལ་ཁྲིམས་སྒྲིག་ལྟར་འགྲིག་མཐུན་ཡོང་དགོས་པའི་ཡིག་ཆ་ཞིག་བཏང་ཡོད་སྐོར་སྤེལ་བཞིན་ཡོད་པ་དང་།ད་ལྟའི་ཆར་བོད་མི་མང་པོས་སྤྱི་ཚོགས་དྲ་ལམ་སོགས་སུ་འཕྲིན་ཡིག་ཁྱབ་སྤེལ་ཤུགས་ཆེར་བརྒྱུད་སྐུར་བྱེད་བཞིན་ཡོད་ཀྱང་།འཕྲིན་ཡིག་དེའི་ནང་བོད་མི་མང་སྤྱི་འཐུས་ལྷན་ཚོགས་དང་བོད་མིའི་སྒྲིག་འཛུགས་ནས་རྒྱ་ནག་གཞུང་དང་ལྷན་དུ་བོད་རྒྱ་ཞི་མོལ་སླར་གསོ་ཡིས་བོད་རང་སྐྱོང་ལྗོངས་ནང་རང་སྐྱོང་འཐོབ་ཐབས་ཞེས་བཀོད་འདུག
ང་ཚོས་བོད་མིའི་གྲོས་ཚོགས་འཐུས་མི་གསར་པའི་ནང་དམ་འབུལ་ཞུ་རྒྱུ་འགོར་འགྱངས་གནང་གི་ཡོད་པ་ཤེས་རྟོགས་བྱུང་།ཕྱི་ཟླ་དགུ་བའི་གྲོས་ཚོགས་འཚོག་ལ་ཉེ་བ་དང་བསྟུན་དུས་ཡུན་ཐུང་ཐུང་ཞིག་གི་རིང་ལས་དོན་མང་པོ་ཞིག་བསྒྲུབ་རྒྱུ་ཡོད་པ་རེད།བོད་མི་མང་སྤྱི་འཐུས་ལྷན་ཚོགས་དང་བོད་མིའི་སྒྲིག་འཛུགས་ནས་རྒྱ་ནག་གཞུང་དང་ལྷན་དུ་བོད་རྒྱ་ཞི་མོལ་སླར་གསོ་ཡིས་བོད་ལ་མིང་དོན་མཚུངས་པའི་རང་སྲིད་རང་སྐྱོང་འཐོབ་ཐབས་དང་།བོད་ཀྱི་སྐད་ཡིག་རིག་གཞུང་དང་ཆོས།དེ་བཞིན་བོད་མིའི་འགྲོ་བ་མིའི་ཐོབ་ཐང་སོགས་སྲུང་སྐྱོབ་བྱ་རྒྱུར་རྒྱལ་སྤྱིའི་སྤྱི་ཚོགས་ཀྱིས་མིག་གིས་བལྟས་བསྡད་ཡོད་སྐོར་བཀོད་ཡོད་འདུག
འཕྲིན་ཡིག་དེའི་ནང་མུ་མཐུད་གྲོས་ཚོགས་ཀྱི་བྱ་རིམ་དང་འབྲེལ་བའི་རྩོད་རྙོག་དུས་ཐོག་དང་ཁྲིམས་གཞིར་བཟུང་སེལ་མ་ཐུབ་པ་དེས།བོད་མི་མང་དང་རྒྱལ་སྤྱིའི་སྤྱི་ཚོགས་ཀྱིས་བོད་མིའི་སྒྲིག་འཛུགས་དང་སྤྱི་འཐུས་ལྷན་ཚོགས་ལ་བཅོལ་བའི་ཡིད་ཆེས་ཁྱད་གསོད་གཏོང་གི་ཡོད།དེར་བརྟེན།ང་ཚོས་བདམས་ཐོན་བྱུང་བའི་སྤྱི་འཐུས་ཚོས་འདས་པའི་མི་མཐུན་པའི་ཕྱོགས་ཕར་བཞག་སྟེ།ད་ལྟ་ཁ་ཚ་དགོས་གཏུགས་ཀྱི་ལས་དོན་ཐོག་དོ་ནན་བྱ་དགོས་པའི་སྐུལ་ལྕག་གཏོང་གི་ཡོད་སོགས་བརྗོད་འདུག
གཞན་ཡང་བོད་མིའི་སྒྲིག་འཛུགས་མང་གཙོའི་ལམ་དུ་བསྐྱོད་པ་དང་མང་གཙོའི་གྲུབ་ཆར་གྱུར་བའི་ལྷན་ཁང་ཁག་གི་ལས་འགན་ནི་འཛམ་གླིང་ཡུལ་གྲུ་གང་སར་ཁྱབ་པའི་བོད་མི་ཚོར་རྒྱབ་སྐྱོར་བྱ་རྒྱུ་མཚོན་པའི་ཧ་ཅང་གལ་ཆེན་པོ་ཆགས་ཡོད་སྟབས།ཨ་རིའི་གཞུང་དང་བོད་མིའི་སྒྲིག་འཛུགས་ཀྱི་མཉམ་འབྲེལ་ལ་འགྱུར་བ་མེད་པར།ཨ་རིས་མུ་མཐུད་བོད་མིའི་སྒྲིག་འཛུགས་དང་དེའི་ལས་དོན་ཐོག་རྒྱབ་སྐྱོར་གང་ཐུབ་ཞུ་རྒྱུ་ཡིན་སྐོར་སོགས་བཀོད་འདུག