རྒྱ་ནག་གཅིག་གི་སྲིད་བྱུས་རྩིས་མེད་གཏོང་དགོས་པའི་ཁྲིམས་འཆར་བཏོན།

ཁ་སང་ཕྱི་ཟླ་༣ ཚེས་ཚེས་༡ ཉིན། ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཊོམ་ཊེ་ཧྥི་ནའེ་(Tom Tiffany)ལགས་དང་། སྐུ་ཞབས་སི་ཁོ་ཊི་པེ་རི་(Scott Perry)གཉིས་ཀྱིས་ཨ་རིའི་གཞུང་ལ་རྒྱ་ནག་གཅིག་གི་སྲིད་བྱུས་མཚམས་འཇོག་བྱས་ཏེ། ཐའེ་ཝན་དང་མཉམ་དུ་གཞུང་འབྲེལ་གྱི་འབྲེལ་ལམ་བསྐྱར་གསོ་བྱེད་དགོས་པའི་ཁྲིམས་འཆར་ཞིག་བཏོན་ཡོད་འདུག

གྲོས་ཚོགས་འཐུས་མི་གཉིས་ནས་སྤེལ་བའི་དེ་འབྲེལ་གསལ་བསྒྲགས་ནང་། སྐུ་ཞབས་ཊོམ་ཊེ་ཧྥི་ནའེ་ལགས་ནས་འདས་པའི་ལོ་ངོ་ ༤༠ ལྷག་རིང་།  ཨ་རིའི་སྲིད་འཛིན་ཚོས་དམར་ཤོག་ཚོགས་པའི་སྐྱག་རྫུན་དང་དྲིལ་བསྒྲགས་བསྐྱར་ཟློས་བྱས་ཏེ། ཐའེ་ཝན་དེ་བཞིན་རྒྱ་ནག་ཆ་ཤས་ཤིག་ཡིན་པར་བཤད་ཡོད་ན་ཡང་། དོན་དངོས་གནས་ཚུལ་དེ་ལྟར་མིན་སྐོར་དང་། ད་ལྟ་ཨ་རིའི་ཕྱོགས་ནས་དུས་ཚོད་ཡོལ་ཟིན་པའི་སྲིད་བྱུས་རྙིང་པ་དེ་རྩིས་མེད་གཏོང་དགོས་པའི་དུས་ལ་བབ་ཡོད་སྐོར་བརྗོད་འདུག

 

ཡང་གྲོས་ཚོགས་འཐུས་མི་སྐུ་ཞབས་སི་ཁོ་ཊི་པེ་རི་ལགས་ནས། ཨ་རི་ནི་ལས་དོན་སྣ་མང་ཕྱོགས་ནས་ཐའེ་ཝན་དང་མཉམ་འབྲེལ་བྱེད་མཁན་གྱི་རང་བཙན་རྒྱལ་ཁབ་ཅིག་དང་། ཨ་རིའི་སྤོབས་པ་དང་གཟི་བརྗིད་ངང་ནས་འཛམ་གླིང་ལ།  འདས་པའི་ལོ་ངོ་༧༠ ལྷག་གི་རིང་ལ་ཐའེ་ཝན་དེ་བཞིན་རང་བཙན་རྒྱལ་ཁབ་ཅིག་ཡིན་ཞེས་བཤད་པའི་ཐོབ་ཐང་ཡོད་སྐོར་སོགས་བསྒྲགས་འདུག

དེ་བཞིན་ཁྲིམས་འཆར་དེའི་ནང་། ཕྱི་ལོ་ ༡༩༧༩ སྔོན་དུ་ཨ་རི་དང་ཐའེ་ཝན་གཉིས་ཀྱི་བར་དུ་གཞུང་འབྲེལ་གྱི་འབྲེལ་ལམ་བྱུང་ཡོད་ན་ཡང་།  སྐབས་དེའི་ཨ་རིའི་སྲིད་འཛིན་ཐེངས་ ༣༩ པ་སྐུ་ཞབས་(James Earl Carter Jr)གྱིས་ཁྲིམས་ཐོག་གི་མོས་མཐུན་མེད་པར། ཐའེ་ཝན་གྱི་འབྲེལ་ལམ་མཚམས་འཇོག་བྱས་ཏེ། པེ་ཅིན་གྱི་དམར་ཤོག་སྲིད་གཞུང་ངོས་འཛིན་བྱེད་པའི་ཐག་བཅད་པ་སོགས་བཀོད་འདུག

 

ཐེངས་འདིར་ཁྲིམས་འཆར་འདོན་མཁན་གྱི་གྲོས་ཚོགས་འཐུས་མི་གཉིས་ནི་ནམ་རྒྱུན་བོད་དང་ཐའེ་ཝན། ཧོང་ཀོང་སོགས་རྒྱ་ནག་གི་དྲག་རྩུབ་འོག་མྱོང་བཞིན་པ་ཁག་གི་འགྲོ་བ་མིའི་ཐོབ་ཐང་དང་། མི་རིགས་དེ་དག་གི་ལོ་རྒྱུས་རིང་བཞིན་གྱི་ཁླེ་དབང་ལ་རྒྱབ་སྐྱོར་ཤུགས་ཆེར་གནང་མཁན་གཉིས་ཡིན་པ་དང་། ལྷག་པར་དུ་གྲོས་ཚོགས་འཐུས་མི་སྐུ་ཞབས་སི་ཁོ་ཊི་པེ་རི་ལགས་ནས་ཨ་རིའི་སྲིད་འཛིན་ཟུར་བ་སྐུ་ཞབས་ཊོམ་ཕུ་ལགས་སུ། བོད་དེ་རང་བཙན་རྒྱལ་ཁབ་ལ་ངོས་འཛིན་དགོས་པའི་ཞུ་ཡིག་ཕུལ་བ་མ་ཟད། རྒྱ་ནག་གི་མགོ་ཁྲིད་ཞི་ཅིན་ཕིན་ལ་ཨ་རིའི་གཞུང་འབྲེལ་ཐོག་ནས་སྲིད་འཛིན་ཞེས་པའི་མིང་བེད་སྤྱོད་གཏོང་མི་རུང་བ་སོགས་ཀྱི་ཁྲིམས་འཆར་བཏོན་ཡོད་པ་རེད།

 

སྐུ་ཞབས་སི་ཁོ་ཊི་པེ་རེ་ལགས་ནི་ཨ་རིའི་མངའ་སྡེ་(Pennsylvania)ཡི་གྲོས་ཚོགས་འཐུས་མི་ཞིག་ཡིན་པ་དང་། ཁོང་གིས་ཕྱི་ལོ་ ༢༠༡༩ ཟླ་ ༥ ནང་ཁོང་དང་ཨ་རིའི་གྲོས་ཚོགས་འཐུས་མི་ ༣༢ ནས། ཨ་རིའི་སྲིད་འཛིན་ཊོམ་ཕུ་གཞུང་གིས་ཕྱི་ལོ་ ༢༠༠༢ ལོའི་ཨ་རིའི་བོད་དོན་ཐོག་འཛིན་པའི་སྲིད་བྱུས་ལག་བསྟར་དང་བོད་ནང་འགྲོ་འོང་འདྲ་མཉམ་གྱི་སྲིད་བྱུས་ལ་རྒྱབ་སྐྱོར་ཐོབ་ཡོད་པ་དང་། ཁོང་གིས་སྲིད་འཛིན་ཟུར་བ་ཊོམ་ཕུ་འཛིན་སྐྱོང་གི་འོག་ནས་ཨ་རིའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་རྒྱུན་ལས་ཀྱི་འགན་ཡང་འཁུར་མྱོང་ཡོད་པ་རེད།