རྒྱ་གར་གྱིས་ཏོག་ནད་སྔོན་འགོག་སྨན་ཁབ་ཅིག་ལ་ཆོག་མཆན་སྤྲད་ཡོད་འདུག

རྒྱ་གར་གཞུང་གིས་ཏོག་ནད་འགོག་ཁབ་གཅིག་ཛ་དྲག་ངང་སྤྱོད་རྒྱུར་ཆོག་མཆན་དང་འགོག་སྨན་རྒྱག་མཁན་མང་པོར་སྦྱོང་བརྡར་སྤྲོད་བཞིན་ཡོད་འདུག

ཕྱི་ཟླ་ ༡ ཚེས་ ༢ ཉིན། རྒྱ་གར་གསར་ལམ་ཁག་ཏུ་སྤེལ་བའི་གནས་ཚུལ་ལྟར་ན། རྒྱ་གར་གཞུང་གིས་དབྱིན་ཡུལ་གྱི་ཨ་སི་ཊི་རཱ་ཛེ་ནཱེ་ཁཱ(Astra Zeneca)སྨན་རྫས་བཟོ་སྐྲུན་ཁང་དང་ཨོག་སོ་ཧྥོར་ཊི(Oxford)གཙུག་ལག་སློབ་གྲྭ་གཉིས་ནས།  རྒྱ་གར་པའོ་ནེ་(Pune)གྲོང་ཁྱེར་གྱི་སའེ་རཱམ(Serum Institute of India)མཐོ་སློབ་ཁང་དུ་བཟོ་བཞིན་པའི་ཏོག་ནད་སྔོན་འགོག་སྨན་ཁབ། ཁོ་ཝེ་ཤལ་སྒྲི(Covishield)སྨན་ཁབ་དེ་རྒྱ་གར་ནང་ཛ་དྲག་གིས་སྤྱོད་ཆོག་པའི་ཆོག་མཆན་སྤྲད་ཡོད་འདུག

 

དེ་འབྲེལ་གནས་ཚུལ་ཐད་རྒྱ་གར་དྲིལ་བསྒྲགས་བློན་ཆེན་སྐུ་ཞབས་པཱ་རཱ་ཀཤ་ཇ་བཱ་དི་ཀར་(Prakash Javadekar)ལགས་ནས། རྒྱ་གར་གཞུང་གིས་ཏོག་ནད་སྔོན་འགོག་སྨན་ཁབ་སྤྱོད་རྒྱུའི་ཆོག་མཆན་དེ་ཕྱི་ཚེས་ ༡ ཉིན་ནས་སྤྲད་ཡོད་པ་དང་། ཏོག་ནད་འགོག་ཁབ་དེ་ནི་རྒྱ་གར་ནང་ཛ་དྲག་གིས་སྤྱོད་རྒྱུར་ཆོག་མཆན་སྤྲད་པའི་སྨན་ཁབ་གཅིག་པུ་ཡིན་པ་དང་། ད་དུང་སྔོན་འགོག་སྨན་ཁབ་ ༤ གྲ་སྒྲིག་ཡིན་སྐོར་བསྒྲགས་འདུག

 

དེ་བཞིན་རྒྱ་གར་འཕྲོད་བསྟེན་བློན་ཆེན་ཧར་ཤི་ཝར་དྷན(Harsh Vardhan)ལགས་ནས། རྒྱ་གར་ནང་ཏོག་ནད་སྔོན་འགོག་སྨན་ཁབ་རྒྱག་རྒྱུའི་གྲ་སྒྲིག་དང་། སྔོན་འགོག་སྨན་ཁབ་རྒྱག་མཁན་ལ་སྦྱོང་བརྡར་སོགས་སྤྲོད་བཞིན་ཡོད་ལ། མི་རིང་བར་ཏོག་ནད་འགོག་ཁབ་ཀྱི་ནུས་པ་དང་བདེ་འཇགས་སོགས་ལ་གཞིགས་ནས། རྒྱ་གར་རྒྱལ་ཡོངས་ཀྱི་མི་མང་ཚང་མར་ཏོག་ནད་འགོག་ཁབ་རིན་མེད་ངང་ཐོབ་རྒྱུ་ཡིན་པ་དང་། མི་མང་ངོས་ནས་འགོག་སྨན་ལ་དོགས་གཞི་དང་སྤྱི་ཚོགས་ཁྲོད་འཆལ་གཏམ་རིགས་མི་སྤེལ་རྒྱུའི་འབོད་སྐུལ་བྱས་འདུག

ཐེངས་འདིར་རྒྱ་གར་གྱི་འགོག་སྨན་དེ་རྒྱ་གར་གཞུང་འབྲེལ་སྨན་རྫས་དང་ཟས་རིགས་བདེ་འཇགས་ཁང་གིས་རྟོག་ཞིབ་བརྒྱུད། རྒྱ་གར་འཕྲོད་བསྟེན་ཆེད་མཁས་པའི་ཚོགས་འདུའི་སྟེང་ཆོག་མཆན་སྤྲད་ཡོད་ན་ཡང་། ད་ལྟའི་ཆར་རྒྱ་གར་སྨན་རྫས་དང་ཟས་རིགས་དོ་དམ་ཁང་གིས་དེ་འབྲེལ་གྱི་གསལ་བསྒྲགས་དང་འགོག་སྨན་དེ་ག་དུས་ཤིག་ནས་དངོས་སུ་རྒྱག་མགོ་ཚུགས་རྒྱུ་ཡིན་སྐོར་གང་ཡང་མེད་པ་དང་། གནས་ཚུལ་ལྟར་ན་ད་ལྟའི་ཆར་རྒྱ་གར་གྱི་ས་ཁུལ་ ༡༢༥ ཙམ་ནང་སྨན་ཁབ་རྒྱག་མཁན་ ༩༦༠༠༠ ཙམ་ལ་སྦྱོང་བརྡར་སྤྲོད་བཞིན་ཡོད་པ་དང་། མགྱོགས་མྱུར་ཕྱི་ཟླ་དང་པོའི་ནང་དངོས་སུ་རྒྱག་རྒྱུ་ཡིན་སྐོར་བརྗོད་འདུག 

 

ད་ལྟ་རྒྱ་གར་ནང་དངོས་སུ་བརྟག་དཔྱད་ཀྱི་རིམ་པ་འགྲོ་བཞིན་པའི་སྔོན་འགོག་སྨན་ཁབ་ ༦ ཡོད་པ་དང་། དེ་དག་ལས་རྒྱ་གར་རང་གིས་བཟོས་པའི་(Bharat Biotech)ཞེས་པའི་འགོག་སྨན་དེའི་བརྟག་དཔྱད་རིམ་པ་གསུམ་སོང་ཟིན་ཡོད་པ་མ་ཟད། མི་རིང་བར་ཆོག་མཆན་ཐོབ་པ་དང་དངོས་སུ་སྤྱོད་རྒྱུའི་སྨན་ཁབ་གྲས་སུ་ཡོད་པ་དང་། སྤྱིར་རྒྱ་གར་གྱིས་དེ་སྔ་ནས་འགོག་སྨན་ས་ཡ་ཁ་ཤས་བཟོས་ནས་ཛ་དྲག་གི་སྐབས་སུ་སྤྱོད་རྒྱུར་གྲ་སྒྲིག་བྱས་ཡོད་ཀྱང་། དེ་འབྲེལ་གནས་ཚུལ་ད་བར་ཕྱི་བསྒྲགས་གང་ཡང་བྱས་མེད་འདུག