རྒྱ་གཞུང་གིས་བོད་ཀྱི་ཕོ་བྲང་པོ་ཏ་ལའི་ས་འོག་ཏུ་མུ་མཐུད་བརྟག་དཔྱད་འཚོལ་ཞིབ་བྱས་པ་བརྒྱུད་ཁང་བརྩེགས་དང་རྩིག་རྨང་བར་ཤོད་མང་པོ་རྙེད་སོན་བྱུང་སྐོར་བརྗོད་འདུག
སྔར་ལོ་ནས་བཟུང་རྒྱ་ནག་གཞུང་གིས་བོད་ཀྱི་ཕོ་བྲང་པོ་ཏ་ལའི་འོག་ཤོད་ནས་ཁང་པའི་དབྱིབས་ཅན་གྱི་རྩིག་རྨང་
༡༢༠༠ ལྷག་གསར་རྙེད་བྱུང་ཡོད་སྐོར་བསྒྲགས་ཡོད་པ་ལྟར། ཕྱི་ཟླ་ ༡༢ ཚེས་ ༢༣ ཉིན་རྒྱ་ནག་གཞུང་འབྲེལ་(CCTV)ཟེར་བས་གནས་ཚུལ་སྤེལ་བ་ལྟར་ན།
རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏ་ལའི་ས་འོག་ཏུ། ཚན་རིག་རང་བཞིན་གྱི་འཚོལ་ཞིབ་མུ་མཐུད་བྱེད་བཞིན་ཡོད་པ་མ་ཟད། ཕོ་བྲང་པོ་ཏ་ལའི་འོག་ཤོད་དུ་རྩིག་རྨང་དང་བར་ཤོད་དོང་ལམ་སོགས་མང་པོ་རྙེད་སོན་བྱུང་ཡོད་སྐོར་བཀོད་འདུག
དེ་འབྲེལ་གནད་དོན་ཐད་ཕོ་བྲང་པོ་ཏ་ལའི་བདེ་འཇགས་དོ་དམ་ཁང་ཟེར་བས།
ཕོ་བྲང་པོ་ཏ་ལའི་ས་འོག་ཏུ་ཐོག་རྩེག་ཁང་པ་བརྒྱད་ཡོད་ཅིང་། འོག་ཤོད་ཀྱི་དུང་ལམ་ནི་ཕོ་བྲང་པོ་ཏ་ལའི་རྩིག་རྨང་ཡིན་པ་དང་།
བརྟག་ཞིབ་པ་ཚོས་ཕོ་བྲང་པོ་ཏ་ལའི་ས་འོག་གྱང་ངོས་གཡས་གཡོན་གྱི་རི་མོ་དང་། ཚན་རིག་ལག་རྩལ་གསར་ཤོས་ལ་བརྟེན་ནས་ད་བར་བར་ཤོད་དོང་ལམ་
༡༢༠༠ ལྷག་རྩད་ཆོད་ཡོད་པ་དང་། མུ་མཐུད་རྩད་ཞིབ་བྱ་རྒྱུ་ཡིན་སྐོར་བརྗོད་འདུག
ཡང་གནས་ཚུལ་ནང་ད་ལྟའི་བར་ཕོ་བྲང་པོ་ཏ་ལའི་ལས་དོན་བརྟག་ཞིབ་མི་སྣས་ཕོ་བྲང་པོ་ཏ་ལའི་འོག་ཤོད་ཁག་ཏུ་འཚོལ་ཞིབ་བྱས་ཏེ།
ས་འོག་ཏུ་རྙེད་སོན་བྱུང་བའི་བར་ཤུར་དང་རྩིག་རྨང་ཁག་གིས་ཕོ་བྲང་པོ་ཏ་ལའི་ལྗིད་ཚད་ཧྲིལ་པོ་བཏེགས་ཡོད་པ་དང་།
དེ་དག་ནི་ཕོ་བྲང་པོ་ཏ་ལའི་འཛུགས་སྐྲུན་གྱི་བདེ་འཇགས་དང་འབྲེལ་བ་ཆེན་པོ་ཡོད་སྐོར་སོགས་བརྗོད་འདུགཕྱི་ལོ་ ༢༠༡༩ ཟླ་ ༣
ཚེས་ ༢༧ ཉིན་ནས་བཟུང་རྒྱ་ནག་གཞུང་གིས་བོད་ཀྱི་ཕོ་བྲང་པོ་ཏ་ལའི་ སྤྱི་ཡོངས་བདེ་འཇགས་ཞིབ་བཤེར་ཟེར་བ་ཞིག་ལ་ཁ་གཡར་ནས།
ཕོ་བྲང་པོ་ཏ་ལའི་ས་འོག་ཏུ་ཞིབ་བཤེར་བརྟག་ཞིབ་གང་བྱུང་བྱེད་བཞིན་ཡོད་པ་མ་ཟད། པོ་ཏ་ལའི་འོག་ནས་ཁང་པའི་དབྱིབས་ཀྱི་རྩིག་རྨང་མང་པོ་རྙེད་སོན་བྱུང་བ་དང་།
དེ་དག་གི་གཏིང་ཐུང་ཤོས་རྨི་ཊིར་གཉིས་གསུམ་ཡས་མས་དང་རིང་ཤོས་རྨི་ཊིར་བཅུ་བཞི་བཅོ་ལྔ་ཡིན་པ་དང་།
མུ་མཐུད་ཚན་རིག་ལག་རྩལ་ལ་བརྟེན་ནས་པོ་ཏ་ལ་སྤྱི་ཡོངས་ཀྱི་བཀོད་པར་ཞིབ་བཤེར་དང་སྲུང་སྐྱོབ་བྱེད་བཞིན་ཡོད་སྐོར་བསྒྲགས་ཡོད་པ་རེད།
རྒྱ་ནག་གཞུང་གིས་བོད་ས་བཙན་འཛུལ་བྱས་པ་ནས་ཤུལ་བཞག་རིག་དངོས་སྲུང་སྐྱོབ་ལ་ཁ་གཡར་ཏེ་བོད་ཀྱི་ཕོ་བྲང་པོ་ཏ་ལའི་ཕྱི་ནང་གི་རྟེན་དང་བརྟེན་པར་ཞིབ་བཤེར་ཐོ་འགོད་དང་གནས་ཡུལ་བརྗེ་སྤོར།
ཉམས་ལེགས་བཅོས་ཟེར་བ་སོགས་མང་པོ་བྱས་ཡོད་པ་མ་ཟད། ཕྱི་ལོ ༢༠༡༠ ལོར་རྒྱ་ནག་གཞུང་གིས་ཕོ་བྲང་པོ་ཏ་ལའི་འོག་ཏུ་ཤར་ནས་ནུབ་ལ་སྦྲེལ་བའི་ས་འོག་གཞུང་ལམ་བཟོས་རྐྱེན།
ཕོ་བྲང་གི་ཉེ་འཁོར་གྱི་ས་ངོས་སུ་སེར་ག་གས་ཏེ་ཕོ་བྲང་གི་བརྟན་གནས་ལ་གནོད་པ་བཟོ་ཡི་ཡོད་པའི་གནས་ཚུལ་ཐོན་ཡོད་པ་རེད།
