༧གོང་ས་མཆོག་ཕྱི་ལོ་ ༢༠༢༠ ལོའི་ཨ་རིའི་མི་མང་གིས་ཆེས་དགའ་མོས་ཞུ་སའི་དབུ་འཁྲིད་བཅུའི་ཁྲོད་བདམས་འདུག
དེ་རིང་ཕྱི་ཟླ་ ༡༢ ཚེས་ ༢༩ ཉིན། ཨ་རིའི་རྒྱལ་ས་ཝ་ཤིན་ཊོན་དུ་བརྟན་གཞི་བྱས་ཡོད་པའི་ཨ་རིའི་གྷ་ལུབ(Gallup)ཞེས་པའི་སྤྱི་མང་བསམ་ཚུལ་རྟོག་ཞིབ་ཁང་གིས་དྲ་ལམ་བརྒྱུད། ཨ་རིའི་མི་མང་ལ་ཕྱི་ལོ་ ༢༠༢༠ ལོའི་ཆེས་དགའ་མོས་ཞུ་སའི་འཛམ་གླིང་གི་དབུ་འཁྲིད་འོས་འདེམས་བྱས་པའི་ཁྲོད། འཛམ་གླིང་གི་སྐྱེས་པ་ཕོ་མོ་འདེམས་སྒྲིག་གིས་གྲུབ་འབྲས་ཕྱིར་བསྒྲགས་བྱས་པའི་ནང་། ཨ་རིའི་སྲིད་འཛིན་ཊོམ་ཕུ་མཆོག་ཨང་དང་པོ་དང་༧གོང་ས་མཆོག་སྔར་བཞིན་ཨང་རིམ་ ༡༠ ནང་བདམས་འདུག
དེ་འབྲེལ་གནས་ཚུལ་སྐོར་ལ་གྷ་ལུབ་ལྟེ་གནས་ཁང་གིས། སྤྱིར་ན་ལོ་རེ་བཞིན་ཕོ་བྲང་དཀར་པོའི་ཆབ་སྲིད་མི་སྣ་ཚོ་མི་མང་གི་ཆེས་དགའ་མོས་ཞུ་ཡུལ་ཁྲོད་རང་བཞིན་གྱིས་ཡོང་གི་ཡོད་པ་དང་། འདི་ལོ་སྲིད་འཛིན་ཊོམ་ཕུ་མཆོག་ཨང་དང་པོར་འདེམས་ཐོན་བྱུང་དོན་གཙོ་བོ། སྲིད་འཛིན་ཊོམ་ཕུ་མཆོག་ཨ་རིའི་སྤྱི་མཐུན་ཚོགས་པའི་ཁྲོད་ཤུགས་རྐྱེན་ཆེན་པོ་ཡོད་པས་ཡིན་པ་དང་། དམངས་གཙོ་ཚོགས་པའི་འོས་གཞི་མི་སྣ་མང་པོ་ཡོད་སྟབས་འོས་ཤོག་ཁ་འཐོར་དུ་སོང་བས་ཡིན་པ་དང་། གལ་ཏེ་མ་འོངས་པར་དམངས་གཙོ་ཚོགས་པའི་འོས་ཤོག་མི་སྣ་མང་པོར་ཁ་འཐོར་དུ་སོང་བ་ཡིན་ན། སྲིད་འཛིན་ཊོམ་ཕུ་མཆོག་མུ་མཐུད་ཨང་དང་པོ་གདམ་རྒྱུ་ཡིན་སྐོར་བཀོད་འདུག
ཐེངས་འདིར་ཆེས་དགའ་མོས་ཞུ་སའི་སྐྱེས་པའི་ཁྲོད་ཨང་དང་པོ་ལས་ཐོག་སྲིད་འཛིན་ཊོམ་ཕུ(Donald Trump)མཆོག་དང་། ཨང་གཉིས་པ་སྲིད་འཛིན་ཟུར་པ་ཨོ་བྷ་མ་(Barack Obama)དང་། གསུམ་པ་ཨ་རིའི་སྲིད་འཛིན་གཞོན་པ་ཟུར་པ་ཇའོ་བྷེ་ཌིན་(Joe Biden)། བཞི་པ་ཨ་རིའི་ཆེད་མཁས་སྨན་པ་ཨན་ཐོ་ནཱེ་ཧྥོ་ཅའེ(Dr. Anthony Fauci)། ཨང་ལྔ་པ་ཡེ་ཤུའི་བླ་ཆེན་ཕོབ(Pope Francis)། དྲུག་པ་ཨ་རིའི་འཕྲུལ་ལས་བཟོ་སྐྲུན་གྱི་ཕྱུག་བདག་ཆེན་མོ་སྐུ་ཞབས་ཨེ་ལོན་མ་སེཀ་(Elon Musk)། བདུན་པ་དམངས་གཙོ་ཚོགས་པའི་སྲིད་འཛིན་འོས་མི་བྷེར་ནེ་སན་ཌིར་སི(Bernie Sanders)། བརྒྱད་པ་ཁེ་ལས་པ་གྲགས་ཅན་བྷེལ་གྷ་ཊི(Bill Gates)། དགུ་པ་ཨ་རིའི་ལག་རྩེད་སྤོ་ལོ་རྩེད་མོ་གྲགས་ཅན་ལའེ་བྷི་རོན་རྗམ་སི(LeBron James)དང་། ཨང་བཅུ་པ་༧གོང་ས་རྒྱལ་བ་རིན་པོ་ཆེ་མཆོག་བཅས་ཡིན་འདུག
དེ་བཞིན་བུད་མེད་ཁྲོད་ཆེས་དགའ་མོས་ཞུ་ས་ཨང་དང་པོ་ཨ་རིའི་སྐུ་ལྕམ་དང་པོ་ཟུར་པ་མཱེ་ཤལ་ཨོ་བྷ་མ་(Michelle Obama)དང་། གཉིས་པ་ཨ་རིའི་དམངས་གཙོ་ཚོགས་པའི་སྲིད་འཛིན་གཞོན་པའི་འོས་མི་ལྕམ་ཀརྨ་ལ་ཧཱ་རེ་སི(Kamala Harris)། ཨང་གསུམ་པ་ད་ལྟའི་ཨ་རིའི་སྐུ་ལྕམ་དང་པོ་མལ་ལཱ་ནེ་ཡ་ཊོམ་ཕུ་(Melania Trump)། ཨང་བཞི་པ་ཨ་རིའི་མདོ་འཛིན་མ་གྲགས་ཅན་ཨོབ་ར་ཝིན་ཧྥི་རི་(Oprah Winfrey)། ལྔ་པ་འཇར་མན་གྱི་སྲིད་བློན་ཨེན་ཇི་ལ་མར་ཁིལ་(Angela Merkel)། དྲུག་པ་དམངས་གཙོ་ཚོགས་པའི་ལྕམ་ཧེ་ལ་རེ་ཁི་ལིན་ཊོན་(Hillary Clinton)། བདུན་པ་དམངས་གཙོ་ཚོགས་པའི་འཐུས་མི་ཨལེཀ་ཛན་སྒྲི་རཱ་ཨོ་ཀཱ་སོ(Alexandria Ocasio-Cortez)། བརྒྱད་པ་དབྱིན་ཇིའི་རྒྱལ་མོ་ཨེ་ལི་རྫ་བྷི་ཊི་(Elizabeth)། དགུ་པ་ཨ་རིའི་ཆེས་མཐོའི་ཁྲིམས་ཁང་གི་ཁྲིམས་དཔོན་ལྕམ་རཱ་ཐི་བྷ་ཌིར་གྷིན་སི་བྷག (Amy Coney Barrett)། ཨང་བཅུ་པ་སི་ཝེ་ཌེན་(Sweden)རྒྱལ་ཁབ་ཀྱི་ཁོར་ཡུག་ལས་འགུལ་བ་གྲགས་ཆེན་བུ་མོ་གྷེ་རེ་ཊ་ཐན་བྷག་(Greta Thunberg)བཅས་ཡིན་འདུག
ད་བར་ཨ་རིའི་གྷ་ལུབ་རྟོག་ཞིབ་ཁང་གི་འོས་འདེམས་ཁྲོད། འཛམ་གླིང་གི་དབུ་འཁྲིད་དང་ཨ་རིའི་ཆབ་སྲིད་པ་སོགས་ཀྱི་འོས་བསྡུའི་གྲུབ་འབྲས་ལ་འཕར་ཆག་ཆེན་པོ་བྱུང་གི་ཡོད་པ་དང་། ཨང་རིམ་མཐོ་ཤོས་ཁྲོད་ཚུད་ཀྱང་རྗེས་ལོར་མར་ལྷུང་སོང་བ་མང་པོ་བྱུང་གི་ཡོད་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་ལོ་བསྟུད་མར་མི་མང་གི་ཆེས་དགའ་མོས་ཞུ་སའི་མི་གྲངས་ ༡༠ ནང་ཚུད་ནས་མར་ལྷུང་མེད་པ་མ་ཟད། ཨང་རིམ་མཐོན་པོར་སོན་པ་མང་པོ་བྱུང་ཡོད་པ་རེད། དེ་སྔ་འོས་གྲངས་མཐོན་པོར་སོན་པ་ཨ་རིའི་སྲིདའཛིན་ཟུར་པ་བྷོ་ཤི་ཞེ་གསུམ་པ་(George W. Bush)དང་། སྲིད་འཛིན་ཟུར་པ་བྷེལ་ཁུ་ལེན་ཊིན(Bill Clinton)ལགས་སོགས་འདི་ལོ་ཨང་རིམ་བཅུའི་ནང་མ་ཚུད་པར་མར་ལྷུང་ཡོད་འདུག
གྷ་ལུབ་ནི་ཨ་རིའི་སྤྱི་ཚོགས་ཞིབ་འཇུག་པ་སྐུ་ཞབས་ཇོར་ཇི་ཧོ་རེ་སི་གྷ་ལུབ་(George Horace Gallup)ཞེས་པ་ཞིག་གིས་ཕྱི་ལོ་ ༡༩༣༥ ལོར་གསར་འཛུགས་བྱས་ཤིང་། ཕྱི་ལོ་ ༡༩༤༨ ནས་མགོ་འཛུགས་ཀྱིས་དབུ་འཁྲིད་འོས་འདེམས་བྱས་ཡོད་པ་དང་། ཚོགས་པ་དེའི་དམིགས་ཡུལ་གཙོ་བོ་ནི་སྤྱི་ཚོགས་ཀྱི་དཀའ་ངལ་མང་པོ་ཞིག་སྤྱི་དམངས་ཀྱི་བསམ་ཚུལ་ལས་ཐག་གཅོད་སོགས་བྱེད་བཞིན་ཡོད་པ་རེད།