རྒྱ་གར་འཕྲོད་བསྟེན་ཁྱད་མཁས་པ་ཚོས་གནམ་གཤིས་གྲང་ངར་ཆེ་ཁུལ་དུ་ཏོག་ནད་སྔོན་འགོག་གི་འཕྲོད་བསྟེན་ལ་སྔར་ལས་ཡིད་གཟབ་དགོས་སྐོར་བརྗོད་འདུག
དེ་རིང་རྒྱ་གར་གསར་ལམ་ཁག་ཏུ་སྤེལ་བའི་གནས་ཚུལ་ལྟར་ན། རྒྱ་གར་ཧི་མ་ཅལ་མངའ་སྡེའི་སྦལ་ཏི་རྫོང་ལཱ་ཧིལ(Lahaul)གྲོང་སྡེའི་ཡུལ་མི་གཅིག་ལ་ཏོག་ནད་ནད་རྟགས་ཐོན་རྗེས། གྲོང་སྡེ་དེའི་མི་ཚང་མར་བརྟག་དཔྱད་བྱེད་སྐབས་མི་གཅིག་མ་གཏོགས་ཡུལ་མི་ཚང་མར་ནད་རྟགས་ཐོན་ཡོད་པ་དང་། རྒྱ་གར་འཕྲོད་བརྟེན་ལྷན་ཁང་ནས་གནས་ཚུལ་དེ་ནི་ཡུལ་དེའི་མི་འབོར་ལ་གཞིག་པས། ཏོག་ནད་བྱུང་ཡུལ་སྡུག་ཤོས་ཆགས་ཡོད་སྐོར་བརྗོད་འདུག
དེ་འབྲེལ་གནས་ཚུལ་ནང་གྲོང་སྡེ་དེར་ཐོག་མར་ནད་རྟགས་ཐོན་མཁན་མིང་ལ་བྷ་ཤིན་ཐ་ཁོར(Bhushan
Thakur)ཞེས་པའི་ལོ་ན་ ༥༢ ཅན་གྱི་མི་ཞིག་ཡིན་པ་དང་། དེའི་རྗེས་ཡུལ་མི་ཚང་མས་འདོད་མོས་ལྟར་བརྟག་དཔྱད་བྱེད་སྐབས་མི་གྲངས་
༤༢ ཡོད་པ་ལས། མི་གཅིག་མ་གཏོགས་ཚང་མར་ནད་རྟགས་ཐོན་ཡོད་སྐོར་བརྗོད་ཡོད་པ་དང་། ཡང་གནས་ཚུལ་ཡོང་ཁུངས་གཞན་ཞིག་གིས་བརྗོད་པ་ལྟར་ན།
འདས་པའི་ཉིན་ཤས་སྔོན་གྲོང་སྡེ་དེའི་ཡུལ་མི་ཚང་མ། ཆོས་ལུགས་བྱེད་སྒོ་ཞིག་གི་ཆེད་མཉམ་དུ་འཛོམས་པ་ཡོད་པ་དང་།
མི་མང་པོ་ཞིག་གིས་བྱེད་སྒོ་དེ་དང་འབྲེལ་ནས་ཁྱབ་གདལ་ཕྱིན་སྐོར་བརྗོད་བཞིན་ཡོད་འདུག
ལཱ་ཧིལ་འཕྲོད་བསྟེན་འགན་འཛིན་སྨན་པ(Dr Palzor)ལགས་ནས། ལཱ་ཧིལ་དང་སྦལ་ཏི་ཕྱོགས་ཀྱི་ཡུལ་མི་ཚང་མས་དང་བླང་དགོས་བརྟག་དཔྱད་བྱས་པ་ཡིན་ན།
ཏོག་ནད་ཁྱབ་གདལ་སྔོན་འགོག་ཐུབ་པ་དང་། ད་ལྟའི་ཆར་ནམ་ཟླ་དགུན་ཁ་བསླེབས་རྐྱེན་མངོན་གསལ་མ་ཡིན་པའི་ངང་ཏོག་ནད་དང་ཆམ་རིམས་ཁྱབ་གདལ་འགྲོ་བཞིན་ཡོད་པས། ས་ཁུལ་དེ་དག་ལ་ཏོག་ནད་གནས་སྟངས་ཛ་དྲག་ཆགས་ཡོད་སྐོར་སོགས་བརྗོད་འདུག
ཉེ་སྔོན་ཧི་མ་ཅལ་མངའ་སྡེའི་རོ་ཐང་ཕུག་ལམ་སྒོ་ཕྱེ་བ་ནས་བཟུང་། ས་གནས་དེ་དག་ལ་རྒྱ་གར་ས་ཕྱོགས་ག་ས་ནས་ཡུལ་སྐོར་བ་ཕོན་ཆེན་འབྱོར་བཞིན་ཡོད་པ་དང་།
ཡུལ་མི་ཚོས་ཡུལ་སྐོར་བ་ཚོས་ཏོག་ནད་འགོས་ཁྱབ་བྱུང་བར་ཡ་ལན་སྤྲོད་བཞིན་ཡོད་ཀྱང་། རྒྱ་གར་དབུས་འཕྲོད་བསྟེན་ཀྱད་མཁས་བ་མང་པོས་ནམ་ཟླ་ཇེ་འཁྱག་ཏུ་སོང་བས་རིམས་ནད་འགོས་ཁྱབ་ཤུགས་ཆེ་རུ་འགྲོ་བཞིན་ཡོད་པས།
གནམ་གཤིས་གྲང་ངར་ཆེ་ཁུལ་དུ་ཏོག་ནད་སྔོན་འགོག་གི་འཕྲོད་བསྟེན་ལ་སྔར་ལས་ཡིད་གཟབ་དགོས་སྐོར་བརྗོད་འདུག