རྒྱ་ནག་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ཕོ་བྲང་དཀར་པོའི་ནང་གཟིགས་སྐོར་ཕེབས་པ་དེ་ཨ་རིའི་རྒྱ་ནག་གི་ནང་སྲིད་ལ་ཐེ་བྱུས་ཚབ་ཆེན་བྱས་ཡོད་སྐོར་བརྗོད་འདུག
 |
| བོད་མིའི་སྒྲིག་འཛིགས་ཀྱི་སྲིད་སྐྱོང་མཆོག་དང་ཨ་རིའི་སྐུ་ཚབ་དོན་གཅོད། པར་རིས་ཁུངས། བོད་མིའི་སྒྲིག་འཛུགས་དྲ་རྒྱ། |
རྒྱ་ནག་གོ་ལའི་དུས་བབ་ཀྱི་གསར་འགོད་པ་ལའོ་ཡེན་ཙི་(Lu
Yuanzhi)ཟེར་བའི་མིང་ཐོག་ནས་སྤེལ་བའི་དེ་འབྲེལ་གནས་ཚུལ་ནང་། བཙན་བྱོལ་བོད་མིའི་སྒྲིག་འཛུགས་ཀྱི་མགོ་ཁྲིད་བློ་བཟང་སེངྒེ་ཨ་རིའི་ཕོ་བྲང་དཀར་པོར་ལྟ་སྐོར་སོང་སྟེ།
ཨ་རིའི་བོད་དོན་འབྲེལ་མཐུད་པ་རའོ་བྷིར་ཊི(Robert Destro)དང་ཐུགས་འཕྲད་བྱས་ཡོད་པ་དང་།
བོད་བྱོལ་བོད་མིའི་སྒྲིག་འཛུགས་ནི་རྒྱ་ནག་ཁ་བྲལ་བྱེད་མཁན་གྱི་ཆབ་སྲིད་ཚོགས་པ་ཞིག་དང་།
ཁོ་ཚོའི་དམིགས་ཡུལ་ནི་བོད་རང་བཙན་མངོན་འགྱུར་བྱ་རྒྱུ་དེ་ཡིན་པ་དང་། ཐེངས་འདིར་བོད་མིའི་སྒྲིག་འཛུགས་ཀྱི་མགོ་ཁྲིད་ཅིག་ཕོ་བྲང་དཀར་པོར་གཟིགས་སྐོར་ཕེབས་པ་ཐོག་མ་དེ་ཡིན་པ་དང་།
གནད་དོན་དེས་རྒྱལ་སྤྱིའི་སྟེང་བཙན་བྱོལ་བོད་མིའི་སྒྲིག་འཛུགས་ཀྱི་ཤུགས་རྐྱེན་ཧ་ཅང་ཉམ་དམའ་བོ་ཡིན་པ་མཚོན་གྱི་ཡོད་སྐོར་སོགས་བརྗོད་འདུག
ཡང་རྩོམ་ཡིག་ཟེར་བ་དེའི་ནང་མུ་མཐུད།
བོད་ཀྱི་གནད་དོན་ནི་རྒྱ་ནག་གི་ཆེས་གལ་འགང་ཆེ་བའི་ནང་སྲིད་གནད་དོན་ཞིག་ཡིན་པ་དང་། ཝ་ཤིན་ཊོན་གྱིས་ཐེངས་འདིར་བོད་མིའི་སྒྲིག་འཛུགས་ཀྱི་མགོ་ཁྲིད་དང་མཇལ་འཕྲད་གོ་སྒྲིག་བྱས་པ་དེས།
ཨ་རིའི་རྒྱ་ནག་གི་ནང་སྲིད་ལ་ཚབ་ཆེའི་ཐེ་བྱུས་བྱས་པ་ཞིག་ཡིན་པ་མ་ཟད། འདས་པའི་ཉིན་ཤས་ནས་བཟུང་ཨ་རིའི་ཐའེ་ཝན་ལ་གཞུང་འབྲེལ་མི་སྣ་གཟིགས་སྐོར་དུ་གཏོང་བ་དང་།
ཧོང་ཀོང་གནད་དོན་དང་འབྲེལ་ནས་རྒྱ་ནག་གི་གཞུང་འབྲེལ་ཐག་གཅོད་ལ་རྒྱུ་མཚན་གང་ཡང་མེད་པར་སྐྱོན་བརྗོད་བྱེད་པ་སོགས།
རྒྱ་ནག་གི་ནང་སྲིད་ལ་ཐེ་བྱུས་རིམ་པར་བྱེད་བཞིན་ཡོད་ན་ཡང་། ཨ་རིའི་བྱེད་སྟངས་དེ་དག་ནི་ངལ་བ་འབྲས་མེད་ཡིན་པ་དང་།
རྒྱལ་ཁབ་སུ་ཞིག་གིས་རྒྱ་ནག་གི་ནང་སྲིད་ལ་ཐེ་བྱུས་པ་ཡིན་ན་གུ་ཡངས་གཏན་ནས་གཏོང་གི་མིན་ལ།
པེ་ཅིན་གཞུང་ལ་རྒྱལ་ཁབ་ཀྱི་བདག་དབང་དང་མངའ་ཁོངས་སྲུང་སྐྱོབ་ཀྱི་ནུས་པ་ཆ་ཚང་ཡོད་སྐོར་བཀོད་འདུག
དེ་བཞིན་རྩོམ་ཡིག་ནང་དོ་སྣང་བྱེད་དགོས་པ་ཞིག་ལ་ད་ཐེངས་ཐུག་འཕྲད་ཀྱི་གནས་ཚུལ་གསར་ལམ་ཁག་ཏུ་སྤེལ་མཁན་བོད་མིའི་སྒྲིག་འཛུགས་ཡིན་པ་དང་། ཕོ་བྲང་དཀར་པོའི་ཕྱོགས་ནས་ཐུག་འཕྲད་དང་འབྲེལ་བའི་སྐད་ཆ་གང་ཡང་བཤད་མེད་པ་རེད་ལ། དེ་ནི་ཊུ་རིམ་ཕི་སྲིད་གཞུང་གིས་རྒྱ་ནག་ཕྱོགས་ནས་ཡ་ལན་ག་རེ་ཡོང་རྒྱུའི་ཚོད་ལྟ་ཞིག་དང་། གོམས་སྟབས་རྗེས་མར་ལས་དོན་ཇི་ལྟར་བྱ་དགོས་པའི་འཆར་གཞི་བཀོད་བཞིན་ཡོད་པ་དང་། ཊུ་རིམ་ཕི་སྲིད་གཞུང་ནང་རྒྱ་ནག་ལ་ངོ་རྒོལ་བྱེད་མཁན་སྲིད་དོན་པ་མང་པོ་ཡོད་སྐོར་དང་། གཞན་ཡང་སྲིད་སྐྱོང་ཕོ་བྲང་དཀར་པོར་ཕེབས་པ་དེས་ཊུ་རིམ་ཕི་སྲིད་གཞུང་གིས་སྲིད་དབང་རྩིས་སྤྲོད་མ་བྱས་གོང་། རྒྱ་ནག་ལ་དཀའ་རྙོག་བཟོ་རྒྱུའི་དམིགས་ཡུལ་གྱི་གོམས་སྟབས་གསར་བ་ཞིག་ཡིན་པ་མ་ཟད། ཊུ་རིམ་ཕི་གཞུང་གིས་ཨ་རྒྱའི་གནད་དོན་ཐད་མུ་མཐུད་རྩོད་རྙོག་མང་པོ་སློང་འདོད་ཡོད་པ་ལས། བོད་ཀྱི་གནད་དོན་དེ་དེ་དག་ལས་གཅིག་ཆགས་ཡོད་སྐོར་སོགས་བཀོད་འདུག
མཇུག་ཏུ་བྷ་དན་སྲིད་གཞུང་ཡོང་བ་ཡིན་ན་རྒྱ་ནག་དང་འབྲེལ་བའི་གནད་དོན་མང་པོ་ཞིག་གི་སྟེང་འགྱུར་བ་དེ་ཙམ་གཏོང་རྒྱུ་མིན་པ་དང་། རྒྱལ་སྤྱིའི་གནད་དོན་དབྱེ་ཞིབ་པ་མང་པོས་བྷ་དན་སྲིད་གཞུང་གིས་རྒྱ་ནག་ཐོག་སྲིད་བྱུས་ཡག་པོ་འཛིན་པའི་ངེས་པ་མེད་སྐོར་བཤད་བཞིན་ཡོད་པ་ལྟར། བྷ་དན་སྲིད་གཞུང་གིས་བོད་དང་ཡུ་གུར་ཧོང་ཀོང་སོགས་ཀྱི་གནད་དོན་ཐད་སྔར་བཞིན་གླེང་སློང་བྱ་རྒྱུ་ཡིན་པ་དང་། བྷ་དན་སྲིད་གཞུང་གི་སློབ་སྟོན་པ་མང་ཆེ་བ་དེ་སྔ་ཨོ་བྷ་མའི་སྐབས་ཀྱི་མི་སྣ་རྐྱང་ཡིན་པ་དང་། ཨོ་བྷ་མས་ཏཱ་ལའི་བླ་མ་ཐེངས་བཞི་ལ་ཕོ་བྲང་དཀར་པོར་གདན་འདྲེན་བྱས་ཡོད་པ་དང་། བྷ་དན་སྲིད་གཞུང་རྒྱ་ནག་སྒང་ལ་དེ་ལས་བཙན་ཤུགས་ཆེ་བ་བྱུང་སྐོར་སོགས་བརྗོད་འདུག
ཏེངས་འདིར་སྲིད་སྐྱོང་མཆོག་ཨ་རིའི་ཕོ་བྲང་དཀར་པོའི་ནང་གཟིགས་སྐོར་དང་།
ཨ་རིའི་གནད་ཡོད་མི་སྣ་ཁག་དང་མཇལ་འཕྲད་གནང་བ་དེར་རྒྱལ་སྤྱིའི་སྟེང་གླེད་སློང་ཤུགས་ཆེར་ཡོང་བཞིན་ཡོད་པ་མ་ཟད།
རྒྱལ་སྤྱིའི་གསར་ཁང་མང་པོས་གནད་དོན་དེ་ནི་བཙན་བྱོལ་བོད་མིའི་སྲིད་དོན་མགོ་ཁྲིད་ཅིག་ལོ་ངོ་
༧༠ མ་ཟིན་ཙམ་རིང་། ཨ་རིའི་ཕོ་བྲང་དཀར་པོའི་ནང་གཞུང་འབྲེལ་གཟིགས་སྐོར་ཕེབས་པ་ཐོག་མ་ཡིན་པ་དང་།
གནད་དོན་དེས་ཨ་རིའི་བོད་དོན་ཐད་གོམས་སྟབས་གསར་བ་ཞིག་སྤོ་མགོ་ཚུགས་ཡོད་སྐོར་སོགས་བཀོད་ཡོད་པ་རེད།